ເຮືອເຟີຣີ່ ຕຳເສົາຄ້ຳຂົວຂາດ ໃນບຣາຊິລ

265

ເກີດອຸຕິບັດເຫດເຮືອເຟີຣີ່ແລ່ນຕຳເສົາຄ້ຳຂົວຫັກ ເຮັດໃຫ້ພື້ນຂົວສ່ວນໜຶ່ງຂາດ ແລະ ລົດໃຫຍ່ອີກສອງຄັນຕົກລົງໄປໃນແມ່ນ້ຳໂມຈູ ລັດປາຣາ ທາງພາກເໜືອຂອງບຣາຊິລ ເຈົ້າໜ້າທີ່ເລັ່ງຄົ້ນຫາຜູ້ເຄາະຮ້າຍ.

ສໍານັກຂ່າວເອພີລາຍງານຈາກລັດປາຣາ ປະເທດບຣາຊິລ ເມື່ອວັນທີ 7 ເມສາ ວ່າ ທ່ານເຮລເດີ ບາບັນໂຢ່ ຜູ້ວ່າການລັດປາຣາ ທາງພາກເໜືອຂອງບຣາຊິລ ໄດ້ຖະແຫຼງວ່າ ຈາກຄໍາບອກເລົ່າຂອງພິຍານໃຫ້ຮູ້ວ່າ ມີລົດໃຫຍ່ 2 ຄັນ ຕົກລົງໄປໃນແມ່ນໍ້າໂມຈູ ຫຼັງຈາກເກີດເຫດເຮືອເຟີຣີ່ ແລ່ນໄປຕໍາໃສ່ກັບເສົາຄໍ້າຂົວຂ້າມແມ່ນໍ້າເທິງເສັ້ນທາງຫຼວງມຸ່ງໜ້າສູ່ເມືອງເບເລງ ເມືອງໃຫຍ່ຂອງລັດປາຣາ ເມື່ອວັນເສົາ ທີ່ຜ່ານມາ ແຕ່ບໍ່ຮູ້ວ່າມີຈັກຄົນຢູ່ໃນລົດໃຫຍ່ຄັນທີ່ຕົກລົງໄປພ້ອມກັບພື້ນຂົວສ່ວນໜຶ່ງ ສ່ວນທີມກູ້ໄພໄດ້ສົ່ງນັກດໍານໍ້າລົງໄປຄົ້ນຫາແລ້ວ.

ລັດຖະບານທ້ອງຖິ່ນຂອງລັດປາຣາ ໄດ້ຖະແຫຼງດ້ວຍວ່າ ສໍາລັບເຮືອເຟີຣີ່ທີ່ຂັບໄປຕໍາເສົານັ້ນ ມີຜູ້ໂດຍສານ 5 ຄົນ ຢູ່ເທິງ ທຸກຄົນເຮືອປອດໄພແລ້ວ ແຕ່ກໍ່ບໍ່ມີຂໍ້ມູນກ່ຽວກັບຜູ້ເຄາະຮ້າຍທີ່ຕົກລົງໄປພ້ອມກັບພື້ນຂົວຍາວປະມານ 200 ແມັດ.

ສ່ວນທາງສື່ທ້ອງຖິ່ນລາຍງານວ່າ ເຄີຍມີການກວດກາໂຄງສ້າງຂົວແຫ່ງນີ້ ເມື່ອເດືອນມັງກອນ ຜ່ານມາ ກໍ່ພົບວ່າບໍລິເວນຕີນຂົວມີການຖືກກັດເຊາະຂອງນໍ້າ ແຕ່ຂະນະນັ້ນ ລັດຖະບານທ້ອງຖິ່ນຄິດວ່າຍັງບໍ່ແມ່ນບັນຫາຮ້າຍແຮງເຖິງຂັ້ນຕ້ອງສັ່ງປິດຂົວ ແຕ່ໄດ້ເຮັດເລື່ອງຂໍງົບປະມານສໍາລັບການປັບປຸງເປັນການດ່ວນແລ້ວ ສ່ວນຕໍາຫຼວດກໍ່ໄດ້ສືບສວນຫາສາເຫດ ແລະ ກວດກາວ່າເຮືອເຟີຣີ່ທີ່ເກີດເຫດດັ່ງກ່າວນັ້ນ ໄດ້ຂຶ້ນທະບຽນຖືກຕ້ອງ ຫຼື ບໍ່.

ຂົວຂ້າມແມ່ນໍ້າໂມຈູ ເປັນສ່ວນໜຶ່ງຂອງໂຄງສ້າງຂົວເຊື່ອມຕໍ່ລະຫວ່າງພື້ນທີ່ບໍລິເວນລຸ່ມແມ່ນໍ້າອາເມຊອນ ເຊິ່ງຄົດບ້ຽວວົນວຽນຈຶ່ງຕ້ອງອາໄສເສັ້ນທາງຄົມມະນາຄົມທາງບົກໃນການເຊື່ອມຕໍ່ພື້ນທີ່ລະຫວ່າງລັດ ແລະ ເມືອງໃນຊົນບົດ.