ຊົມເຊີຍ! ກຸ່ມຄົນອອກກຳລັງກາຍຊ່ວຍກັນທຳຄວາມສະອາດເດີ່ນທາດຫຼວງ

512

ປະເທດລາວເຮົາກຳລັງພັດທະນາໃນຫຼາຍດ້ານ ທັງດ້ານເສດຖະກິດ, ການສຶກສາ ແລະ ອີກຫຼາຍດ້ານ ແນ່ນອນເມື່ອພາຍໃນນະຄອນຫຼວງຍິ່ງມີການຂະຫຍາຍຕົວ ກໍ່ມີກຸ່ມຄົນຫຼາຍກຸ່ມທີ່ຫຼັງໄຫຼເຂົ້າສູ່ນະຄອນຫຼວງ ທັງນັກຮຽນນັກສຶກສາ ຫຼື ແມ້ແຕ່ແຮງງານທີ່ມາຈາກຕ່າງແຂວງ ແລະ ປະເທດອ້ອມຂ້າງ ຄວາມແອອັດມັນກໍ່ຍິງເພິ່ມຂຶ້ນ ສິ່ງທີ່ຕິດຕາມມານຳກໍ່ຄືຄວາມສະອາດ ແລະ ເປັນລະບຽບຮຽບຮ້ອຍກໍ່ເປັນສິ່ງທີ່ຍາກຫຼາຍຕໍ່ການຄວບຄຸມ.

ບັນຫາການຖິ້ມຂີ້ເຫຍື້ອຊະຊາຍຖືວ່າເປັນສິ່ງທີ່ຄວບຄຸມຍາກຫຼາຍໃນນະຄອນຫຼວງວຽງຈັນ ເຊິ່ງພົບເຫັນໄດ້ຫຼາຍກໍ່ແມ່ນແຄມທາງ, ພື້ນທີ່ດິນເປົ່າວ່າງທີ່ກຳລັງເປັນບັນຫາ, ສະຖາທີ່ທ່ອງທ່ຽວຕ່າງໆ ເຊັ່ນຕະຫຼາດນັດກາງຄືນແຄມຂອງ ຫຼື ແມ້ແຕ່ທາດຫຼວງ ທັ້ງໆທີ່ເຈົ້າໜ້າທີ່ເພິ່ນກໍ່ວາງຖັງໃສ່ຂີ້ເຫຍືອໄວ້ໃຫ້ຫຼາຍຈຸດ ແຕ່ມັນກໍ່ອາດຈະບໍ່ມີຄວາມສຳຄັນສຳລັບຄົນບາງກຸ່ມທີ່ມັກງ່າຍຢາກຖິ້ມໃສກະຖິ້ມ.

ຄວາມບໍ່ສະອາດມັນສົ່ງຜົນກະທົບການທ່ອງທ່ຽວທີ່ຊັດເຈັນຕໍ່ຄົນຕ່າງຊາດທີ່ເຫັນສະພາບຄວາມເປິເປື້ອນທີ່ເປັນທັງມົນລະພິດ ແລະ ເຊື້ອພະຍາດ ການບອກຕໍ່ໆກັນຂອງນັກທ່ອງທ່ຽວແນ່ນອນມັນສົ່ງຜົນຕໍ່ພາບພົດບ້ານເຮົາເຕັມໆ ແຕ່ວ່າກໍ່ມີກຸ່ມຄົນຈາກຫຼາຍໆກຸ່ມ ທີ່ພະຍາຍາມຮວມຕົວກັນເພື່ອຈັດກິດຈະກຳທຳຄວາມສະອາດຕົວເມືອງຂອງພວກເຮົາໃຫ້ມີຄວາມສະອາດ ເຊິ່ງໃນວັນທີ 3 ເມສາ 2019 ຜ່ານມາ ກຸ່ມແລ່ນເພື່ອສຸຂະພາບ ເດີ່ນທາດຫຼວງ ຮ່ວມມືກັບກຸ່ມຖີບໄປຍິ້ມໄປ ແລະ ປະຊາຊົນທີ່ມາອອກກຳລັງກາຍ ໄດ້ພ້ອມໃຈກັນເກັບຂີ້ເຫຍື້ອຢູ່ເດີ່ນທາດຫຼວງ.

ກິດຈະກໍາດັ່ງກ່າວ ກຸ່ມຂອງເຂົາເຈົ້າແມ່ນໄດ້ຈັດຂຶ້ນເດືອນລະ 2 ຄັ້ງ ໂດຍຈະຮວມຕົວກັນເກັບເສດຖົງຢາງ, ຈອກ ອື່ນໆ ໃນບໍລິເວນເດີ່ນເພື່ອຄວາມສະອາດຈົບງາມ ເພື່ີອປະກອບສ່ວນ 6 ສໍ ທີ່ ນະຄອນຫຼວງວຽງຈັນໄດ້ວາງອອກ.

ສະນັ້ນ ຂໍຮ້ອງໃຫ້ທຸກຄົນພ້ອມກັນໃຈຮັກສາຄວາມສະອາດຊ່ວຍກັນ ເພາະເດີ່ນທາດຫຼວງ ເປັນໃບໜ້າໃບຕາຂອງປະເທດ ແຕ່ລະວັນມີນັກທ່ອງທ່ຽງເປັນຈໍານວນຫຼວງຫຼາຍ ມາທ່ຽວຊົມ.

ເຖິງວ່າທາງການເພິ່ນໄດ້ປະຊາສຳພັນເລື່ອງການຊ່ວຍກັນຮັກສາຄວາມສະອາດທັງໃນບ້ານ ຫຼື ເມືອງ ຫຼື ພາກຫ້ອງການຫົວໜ່ວຍທຸກລະກິດຕ່າງໆກໍ່ມີກິດຈະກຳທຳຄວາມສະອາດພື້ນທີ່ ມັນກໍ່ຍັງບໍ່ພຽງພໍທີ່ຈະເຮັດໃຫ້ຂີ້ເຫຍືອມັນໝົດໄປ ແຕ່ທີ່ສຳຄັນກໍ່ຄືໃຈຂອງທ່ານເອງ ວ່າເລື່ອງພຽງແຄ່ນີ້ ພຽງວາງຄວາມມັກງ່າຍເອົາໄວ້ແລ້ວປະຕິບັດຄວາມສະອາດໃຫ້ເປັນນິໄສ ແລະ ປູກຝັງລູກຫຼານລຸ້ນຫຼັງໃຫ້ເຮັດປະຕິບັດຕາມ ເພື່ອສະພາບແວດລ້ອມທີ່ດີໃຫ້ປົກຄຸມບ້ານເຮົາຕະຫຼອດໄປ.

ພວກເຮົາຊ່ວຍກັນຮັກສາຄວາມສະອາດ ທຸກຢ່າງເລິ່ມຕົ້ນທີ່ຕົວທ່ານ

ຂອບໃຈ

Credit: Media Laos