ເຈົ້າໜ້າທີ່ຈັບເຮືອເກົາຫຼີໃຕ້ລັກລອບຂົນສົ່ງນໍ້າມັນໃຫ້ເກົາຫຼີເໜືອ

269

ເຮືອບັນທຸກນໍ້າມັນຂອງເກົາຫຼີໃຕ້ຖືກກັກ ແລະ ຫ້າມແລ່ນອອກຈາກທ່າເຮືອເມືອງປູຊານ ດົນ 6 ເດືອນແລ້ວ ໂທດຖານຕ້ອງສົງໄສວ່າລະເມີດມາດຕະການຂວໍ້າບາດຂອງ ຢູເອັນ ດ້ວຍການລັກລອບບັນທຸກນໍ້າມັນເຊື້ອໄຟສົ່ງໃຫ້ເກົາຫຼີເໜືອຈາກການເປີດເຜີຍຂອງເຈົ້າໜ້າທີ່ເກົາຫຼີໃຕ້ ເມື່ອວັນພຸດ ຜ່ານມາ.

ສໍານັກຂ່າວເອພີລາຍງານຈາກນະຄອນດວລ ປະເທດເກົາຫຼີໃຕ້ ເມື່ອວັນທີ 3 ເມສາ ວ່າ ການເປີດເຜີຍຂໍ້ມູນມີຂຶ້ນລະຫວ່າງຄວາມວິຕົກກັງວົນກ່ຽວກັບຄວາມພະຍາຍາມທຸກວິທີທາງຂອງເກົາຫຼີເໜືອ ທີ່ຈະຫຼີກລ່ຽງມາດຕະການຂວໍ້າບາດຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດ (UNSC) ເຊິ່ງລົງໂທດໂຄງການອາວຸດນິວເຄຣຍ ແລະ ຂີປະນາວຸດຂອງເກົາຫຼີເໜືອ.

South Korean fishing boat P-PIONEER is seen a port in Busan, South Korea, Wednesday, April 3, 2019. Officials say a South Korean ship is being held at a domestic port over suspicions that it illegally provided oil to heavily sanctioned North Korea. (Kim Jae-hong/Yonhap via AP)

ເຈົ້າໜ້າທີ່ໜ່ວຍເຮືອລາດຕະເວນຍາມຝັ່ງເກົາຫຼີໃຕ້ ໄດ້ເປີດເຜີຍວ່າ ເຮືອບັນທຸກນໍ້າມັນ ພີ-ໄພໂອເນຍ ນ້ຳໜັກ 5.160 ໂຕ້ນ ຖືກສັ່ງຫ້າມແລ່ນອອກຈາກທ່າເຮືອປູຊານ ຕັ້ງແຕ່ເດືອນຕຸລາ ປີທີ່ຜ່ານມາ ຈາກຂໍ້ລະບຸວ່າ ໄດ້ມີການລັກລອບຂົນສົ່ງນໍ້າມັນກາຊວນສົ່ງໃຫ້ເກົາຫຼີເໜືອ ໂດຍຂົນຖ່າຍນໍ້າມັນໃສ່ເຮືອເກົາຫຼີເໜືອ 2 ລໍາ ໃນເຂດໜ້ານໍ້າສາກົນຂອງທະເລຈີນຕາເວັນອອກ ເມື່ອເດືອນກກັນຍາ 2017 ແຕ່ເຈົ້າໜ້າທີ່ບໍ່ຢືນຢັນປະລິມານນໍ້າມັນທີ່ລັກລອບຂົນສົ່ງ.

ສໍານັກຂ່າວຢອນຮັບຂອງເກົາຫຼີໃຕ້ ໄດ້ລາຍງານໂດຍອ້າງແຫຼ່ງຂ່າວທີ່ບໍ່ເປີດເຜີຍ ວ່າ ເຮືອເກົາຫຼີເໜືອ 2 ລໍາ ທີ່ຮັບນໍ້າມັນຈາກເຮືອພີ – ໄພໂອເນຍ ຄືເຮືອຄຸມອຸນຊານ ແລະ ເຮືອຢູ ຊອນ ໂດຍເຊື່ອກັນວ່າເຮືອລໍາທໍາອິດເປັນເຮືອຫຼັກທີ່ເກົາຫຼີເໜືອໃຊ້ຂົນຖ່າຍນໍ້າມັນແບບເຮືອສູ່ເຮືອຫຼາຍທີ່ສຸດ.

ລາຍງານຂອງຢູເອັນເອັສຊີ ເມື່ອເດືອນທີ່ຜ່ານມາ ລະບຸວ່າ ສະມາຊິກລັດ ທີ່ “ບໍ່ລະບຸຊື່” ຂອງຢູເອັນ ເຜີຍວ່າ ເກົາຫຼີເໜືອໃຊ້ເຮືອບັນທຸກນໍ້າມັນຂອງປະເທດປະມານ 23 ລໍາ ສໍາລັບລັກລອບຂົນຖ່າຍນໍ້າມັນ  ໂດຍ ເຮືອ 6 ລໍາ ໃນຈໍານວນດັ່ງກ່າວລວມເຖິງເຮືອຄຸມອຸນຊານ ທີ່ຂົນຖ່າຍປະມານເຄິ່ງຫນຶ່ງຂອງປະລິມານນ້ຳມັນທັງໝົດ.

ທາງດ້ານເຈົ້າໜ້າທີ່ກະຊວງການຕ່າງປະເທດເກົາຫຼີໃຕ້ໄດ້ລາຍງານວ່າ ຖືເປັນຄັ້ງທຳອິດທີ່ເຮືອຂອງເກົາຫຼີໃຕ້ຖືກຈັບ ຈາກຂໍ້ກ່າວຫາລະເມີດມາດຕະການຂວໍ້າບາດຂອງຢູເອັນ ຕໍ່ເກົາຫຼີເໜືອ ແລະ ນອກຈາກເຮືອພີ-ໄພໂອເນຍແລ້ວ ທາງການເກົາຫຼີໃຕ້ຍັງຈັບເຮືອຂອງຕ່າງຊາດອີກ 3 ລຳ ທີ່ລັກລອບຂົນສົ່ງນໍ້າມັນໃຫ້ເກົາຫຼີເໜືອ ຫຼື ຂົນຖ່າຍຖ່ານຫິນທີ່ຜະລິດໃນເກົາຫຼີເໜືອ.