ອັດຕະປື ກຽມພ້ອມຮັກສາຄວາມເປັນລະບຽບການສັນຈອນ ໃນໄລຍະປີໃໝ່ລາວ

281

ອີກບໍ່ພໍເທົ່າອາທິດ ກໍ່ໃກ້ຈະຮອດງານສະເຫຼີມສະຫຼອງປີໃໝ່ລາວປະຈຳປີ 2019 ແລ້ວ, ຫຼາຍໆຂົງເຂດໃນທົ່ວປະເທດ ກໍ່ໄດ້ມີການກະກຽມຄວາມພ້ອມໃນດ້ານຕ່າງໆ ທັງນີ້, ກໍ່ແນໃສ່ເຮັດໃຫ້ການສະຫຼອງບຸນປີໃໝ່ມີບັນຍາກາດເບີກບານມ່ວນຊື່ນ, ມີຄວາມເປັນລະບຽບຮຽບຮ້ອຍ, ມີຄວາມສະຫງົບ ແລະ ປອດໄພ ເຊັ່ນດຽວກັນກັບແຂວງ ອັດຕະປື ກໍ່ໄດ້ມີການກະກຽມຄວາມພ້ອມໃນດ້ານຕ່າງໆ ໂດຍສະເພາະແມ່ນບັນຫາການສັນຈອນ ຖ້າມີການລະເມີດກໍ່ຈະລົງໂທດຕາມລະບຽບກົດໝາຍ.

ທ່ານ ຮ້ອຍເອກ ຄໍາໃບ ແກ້ວພາວົງ ຮອງພະແນກຕຳຫຼວດ ຜູ້ຊີ້ນຳວຽກງານຈະລາຈອນ ກອງບັນຊາການປ້ອງກັນຄວາມສະຫງົບສຸກ ເມືອງສາມັກຄີໄຊ ແຂວງອັດຕະປື ໃຫ້ຮູ້ວ່າ: ເພື່ອເຮັດໃຫ້ການສັນຈອນບົນທ້ອງທະໜົນຫຼວງໃນໄລຍະບຸນປີໃໝ່ລາວ ພສ 2562 ທີ່ຈະມາເຖິງນີ້ ມີຄວາມເປັນລະບຽບຮຽບຮ້ອຍ ທາງໜ່ວຍງານຈະລາຈອນ ກອງບັນຊາການປ້ອງກັນຄວາມສະຫງົບສຸກ ເມືອງສາມັກຄີໄຊ ໄດ້ມີການຈັດຕັ້ງປະຕິບັດສະກັດກັ້ນການເກີດອຸບັດເຫດ ໂດຍສະເພາະແມ່ນໄລຍະແຕ່ວັນທີ 12-18 ເມສາ 2019 ດ້ວຍການວາງແຜນການໃນການປ້ອງກັນການນຳໃຊ້ລົດໃຊ້ຖະໜົນຂອງບັນດານັກຂັບຂີ່ໄວ ເປັນຕົ້ນ: ໄດ້ໂຄສະນາເຜີຍແຜ່ລະບຽບການສັນຈອນຕາມທ້ອງຖະໜົນຫຼວງ ດ້ວຍຫຼາຍຊ້ອງທາງເຊັ່ນ: ໂຄສະນາໂດຍການນໍາໃຊ້ຮູບພາບ, ອອກແຈ້ງການຜ່ານລະບົບໂທລະໂຄ່ງຊຸມຊົນ ເພື່ອເຕືອນສະຕິບັນດານັກຂັບຂີ່ໃຫ້ປະຕິບັດລະບຽບການສັນຈອນ.

ສໍາລັບມາດຕະການຕໍ່ຜູ້ຂັບຂີ່ໃນຍາມມືນເມົາ ແມ່ນຈະໄດ້ໃຊ້ມາດຕະການທີ່ເດັດຂາດກວ່າທຸກປີ,ທັງນີ້ກໍ່ເພື່ອປະຕິບັດຕາມດຳລັດ ແລະແຈ້ງການຂອງກະຊວງປ້ອງກັນຄວາມສະຫງົບ. ສ່ວນຈຸດທີ່ມີຄວາມສ່ຽງໃນການເກີດອຸບັດເຫດນັ້ນ ແມ່ນຈະໄດ້ວາງກຳລັງລົງໃສ່ແຕ່ລະຈຸດ, ພ້ອມຈັດວາງກໍາລັງລົງເຄື່ອນໄຫວຕັກເຕືອນມວນຊົນທີ່ຫຼິ້ນນໍ້າໃນຂອບເຂດທາງຫຼວງ, ທາງຊອຍ ບໍ່ໃຫ້ຫຼິ້ນແບບຊະຊາຍ ແລະ ບໍ່ຖືກຕາມລະບຽບການ. ພ້ອມດຽວກັນນັ້ນ, ກໍ່ຈະໄດ້ປະສານງານກັບຈະລາຈອນແຂວງ ເພື່ອເຮັດໃຫ້ການປະຕິບັດງານມີຄວາມຄ່ອງຕົວຫຼາຍຂຶ້ນ.

ທ່ານ ຮອງພະແນກຕຳຫຼວດ ຜູ້ຊີ້ນຳວຽກງານຈະລາຈອນ ກອງບັນຊາການປ້ອງກັນຄວາມສະຫງົບສຸກ ເມືອງສາມັກຄີໄຊ ຍັງໄດ້ຮຽກຮ້ອງໃຫ້ບັນດານັກຂັບຂີ່ ກໍ່ຄືຜູ້ໃຊ້ລົດໃຊ້ຖະໜົນ ຕ້ອງມີສະຕິໃນການຂັບພາຫະນະ, ເອົາໃຈໃສ່ປະຕິບັດລະບຽບການສັນຈອນ. ເດັດຂາດໃນເວລາມືນເມົາບໍ່ໃຫ້ຂັບຂີ່ພາຫະນະດ້ວຍຕົນເອງ ເນື່ອງຈາກມີຄວາມສ່ຽງທີ່ຈະເກີດອບັດເຫດ. ພ້ອມຮຽກຮ້ອງທຸກໆທ່ານຈົ່ງໃຫ້ຄວາມຮ່ວມມື ແລະ ປະກອບສ່ວນໃນການຈັດຕັ້ງປະຕິບັດໂຄງການຂັບຂີ່ປອດໄພຕາມທ້ອງຖະໜົນຫຼວງໃນໄລຍະປີໃໝ່ລາວໃຫ້ໄດ້ຮັບໝາກຜົນ. ທັງນີ້, ກໍ່ເພື່ອເຮັດໃຫ້ໃນໄລຍະບຸນປີໃໝ່ລາວທີ່ຈະມາເຖິງນີ້ມີຄວາມເປັນລະບຽບຮຽບຮ້ອຍ.

Credit: Media Laos