ການຄ້າ ຈັດເຈົ້າໜ້າທີ່ລົງຕິດຕາມການຊື້ – ຂາຍສິນຄ້າໃນໄລຍະປີໃໝ່

286

ເລີ່ມແຕ່ວັນທີ 11 ເມສາ 2019 ເປັນຕົ້ນໄປ ເຈົ້າໜ້າທີ່ສະເພາະກິດຂະແໜງການຄ້າ ພ້ອມລົງຕິດຕາມກວດກາລາຄາ ແລະ ຄຸ້ມຄອງວຽກງານການຄ້າໃນຕະຫຼາດຢູ່ນະຄອນຫຼວງວຽງຈັນທຸກມື້ ໂດຍເນັ້ນ 4 ເມືອງໃນ ກວມເອົາ 16 ຕະຫຼາດ ສ່ວນສິນຄ້ານໍາເຂົ້າຈາກຕ່າງປະເທດ ຕ້ອງຂຶ້ນໂຄງປະກອບລາຄາກ່ອນນໍາເຂົ້າ.

ທ່ານ ນາງ ວັນມະນີ ພິມມະສານ ຮອງຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໃຫ້ຮູ້ວ່າ: ພະແນກ ອຄ ນະຄອນຫຼວງວຽງຈັນ ໄດ້ມີການກະກຽມແຜນການໃນການຈັດຕັ້ງປະຕິບັດຄຸ້ມຄອງລາຄາສິນຄ້າໃນໄລຍະປີໃໝ່ລາວໂດຍຈະແບ່ງເປັນຈຸງານລົງສຳຫຼວດ ໂດຍສະເພາະແມ່ນ 4 ຕົວເມືອງ, ສ່ວນເມືອງອື່ນແມ່ນມອບໃຫ້ກັບຫ້ອງການອຸດສາຫະກຳການຄ້າເມືອງດັ່ງກ່າວຮັບຜິດຊອບ. ສໍາລັບການຈັດຕັ້ງປະຕິບັດແມ່ນຈະລົງກວດກາໃນແຕ່ລະຕະຫຼາດ ຖ້າພົບເຫັນໃນກໍລະນີທີ່ກ່າວມາກໍຈະນໍາຕົວຜູ້ກ່ຽວມາເຮັດບົດບັນທຶກ ແຕ່ຖ້າກວດພົບອີກຈົນເຖິງ 3 ຄັ້ງ ຂຶ້ນໄປແມ່ນຈະມີການປັບໃໝ, ຈະມີໜ່ວຍງານລົງໄປກວດກາຕົວຈິງໃນແຕ່ລະຕະຫຼາດທຸກມື້ ເຊິ່ງຈະເລີ່ມແຕ່ວັນທີ 11 ເມສາເປັນຕົ້ນໄປ ຈົນສໍາເລັດເທດສະການປີໃໝ່ລາວ ພ້ອມທັງຈະມີແຈ້ງການກ່ຽວກັບມາດຕະການຄວບຄຸມລາຄາສິນຄ້າໃຫ້ແກ່ທຸກຄົນຮັບຮູ້ຢ່າງທົ່ວເຖິງ. ເຖິງຢ່າງໃດກໍຕາມ, ເນື່ອງຈາກວ່າໄລຍະປີໃໝ່ເປັນໄລຍະທີ່ອາດຈະສະໜອງສິນຄ້າໄດ້ບໍ່ພຽງພໍຕາມຄວາມຕ້ອງການຂອງປະຊາຊົນ ໂດຍສະເພາະແມ່ນຊີ້ນ ພວກເຮົາກໍໄດ້ມີແຜນການສົມທົບກັບບັນດາໂຮງງານຂ້າສັດໃນການກະກຽມຊີ້ນສະໜອງຕະຫຼາດໃຫ້ພຽງພໍ ແຕ່ກົງກັນຂ້າມຖ້າສິນຄ້າບໍ່ພຽງພໍອາດສົ່ງຜົນໃຫ້ແມ່ຄ້າບາງຈໍານວນໃຊ້ໂອກາດນີ້ເອົາປຽບຜູ້ບໍລິໂພກ. ດັ່ງນັ້ນ, ຈະເນັ້ນຄວບຄຸມບໍ່ໃຫ້ເກີດເຫດການດັ່ງກ່າວຂຶ້ນ.

ພ້ອມດຽວກັນນີ້, ທ່ານຍັງກ່າວຕື່ມວ່າ: ຜ່ານມາເຄີຍກວດພົບແມ່ຄ້າຈໍານວນໜຶ່ງທີ່ສວຍໂອກາດຂຶ້ນລາຄາໂດຍບໍ່ໄດ້ຮັບອະນຸຍາດ ເຊິ່ງກໍໄດ້ມີການເຮັດບົດບັນທຶກ. ພ້ອມນີ້, ກໍໄດ້ມີການປະສານສົມທົບກັບຫ້ອງການອຸດສາຫະກໍາ ແລະ ການຄ້າເມືອງ, ຈັດສັນຕະຫຼາດ ເພື່ອຊ່ວຍໃຫ້ການເຮັດວຽກດໍາເນີນໄປຢ່າງເປັນລະບົບ ແລະ ມີປະສິດທິພາບ. ຕໍ່ກັບພະຍາດອະຫິວາໝູອາຟຣິກກາ ທີ່ກໍາລັງລະບາດໃນປະເທດໃກ້ຄຽງ ແລະ ມີແຈ້ງການຈາກຂັ້ນເທິງເລື່ອງຫ້າມນໍາເຂົ້າຊີ້ນໝູ ທາງພະແນກເອງກໍໄດ້ເຂັ້ມງວດກວດກາຢູ່ຕະຫຼອດ ແລະ ເຄັ່ງຄັດຖ້າຫາກວ່າພົບເຫັນການນໍາເຂົ້າ ຫຼື ຝ່າຝືນໃດໆກໍຕາມແມ່ນຈະຢຶດ ແລະ ນໍາໄປທໍາລາຍຖິ້ມ ສ່ວນສິນຄ້ານໍາເຂົ້າປະເພດອື່ນແມ່ນຕ້ອງໄດ້ມີການຂຶ້ນໂຄງປະກອບລາຄາກ່ອນຈຶ່ງຈະສາມາດນໍາເຂົ້າມາຈໍາໜ່າຍໄດ້.

Credit: Laoedaily