ຜິດປັບໄໝ ກວ່າ 6 ຕື້ກີບ! ລັດຖະບານສິງກະໂປສະເໜີຮ່າງກົດໝາຍ ກວາດລ້າງຂ່າວປອມ

261

ກະຊວງຍຸຕິທໍາປະເທດສິງກະໂປ ໄດ້ສະເໜີຮ່າງກົດໝາຍເພິ່ມຄວາມເຂັ້ມງວດໃນການຈັດການກັບການນໍາສະເໜີຂ່າວປອມຜ່ານທາງອອນລາຍ ເຊິ່ງລວມເຖິງການລຶບຂໍ້ມູນທີ່ເປັນໄພຕໍ່ຄວາມໝັ້ນຄົງ ໂດຍມີບົດລົງໂທດຈໍາຄຸກ ເຖິງ 10 ປີ ຫຼື ປັບໄໝ ກວ່າ 6 ຕື້ກີບ.

ສໍານັກຂ່າວຕ່າງປະເທດລາຍງານຈາກປະເທດສິງກະໂປ ເມື່ອວັນອັງຄານ ທີ 2 ເມສາ ວ່າ ກະຊວງຍຸຕິທຳຂອງປະເທດສິງກະໂປໄດ້ສະເໜີຮ່າງກົດໝາຍຕໍ່ສະພານິຕິບັນຍັດແຫ່ງຊາດ ເມື່ອວັນຈັນ ເພື່ອປະກອບການພິຈາລະນາແກ້ໄຂກົດໝາຍຄວາມໝັ້ນຄົງທາງໄຊເບີສະບັບປັດຈຸບັນ ໂດຍເນື້ອໃນສຳຄັນຂອງຮ່າງກົດໝາຍລວມເຖິງການທີ່ລັດຖະບານມີອຳນາດເຕັມໃນການກຳນົດໃຫ້ເວັບໄຊ ຫຼື ເພຈ໌ຂ່າວອອນລາຍ “ໃຫ້ເຜີຍແຜ່ຂໍ້ມູນຂ່າວສານທີ່ຖືກຕ້ອງ” ແລະ ແກ້ໄຂຂໍ້ມູນຂ່າວສານທີ່ລັດຖະບານພິຈາລະນາແລ້ວເຫັນວ່າ “ຜິດ ຫຼື ບໍ່ເໝາະສົມ” ຕະຫຼອດຈົນການຈັດເຮັດຊ່ອງທາງພິເສດ ເພື່ອແນະນໍາໃຫ້ຜູ້ໃຊ້ວຽກໃນດ້ານເຄືອຂ່າຍສັງຄົມອອນລາຍເຊັ່ນການຮັບຂໍ້ມູນຂ່າວສານຈາກສໍານັກຂ່າວທີ່ລັດຖະບານ ຮັບຮອງວ່າເປັນຂ່າວທີ່ຖືກຕ້ອງ.

ນອກຈາກນີ້, ຖ້າລັດຖະບານພິຈາລະນາຂໍ້ມູນຂ່າວສານໃດແລ້ວຖືວ່າ “ເປັນເທັດ” ເວັບໄຊ ຫຼື ເພຈ໌ທີ່ນໍາສະເໜີລາຍງານນັ້ນ ຕ້ອງລຶບຂໍ້ມູນດັ່ງກ່າວອອກຈາກລະບົບທັນທີ. ທັງນີ້, ບົດລົງໂທດຈໍາຄຸກໜັກ ສຸດແມ່ນ 10 ປີ ຫຼື ປັບໄໝເງິນສູງສຸດ 1 ລ້ານໂດລາສິງກະໂປ (ປະມານ 6.330 ລ້ານກີບ) ໂດຍບົດລົງໂທດສາມາດຄອບຄຸມການກະທຳຜິດທີ່ເປັນການເປີດໃຊ້ບັນຊີ ທີ່ເອີ້ນວ່າ “ບັອດ (BOT)” ເພື່ອເຈດຕະນາເຜີຍແຜ່ຂໍ້ມູນຂ່າວສານອັນເປັນເທັດດ້ວຍ.

ຂະນະທີ່ ທ່ານເຄ ຊຳມູກໍາ ເຊິ່ງດໍາລົງຕໍາແໜ່ງທັງລັດຖະມົນຕີກະຊວງມະຫາດໄທ ແລະ ກະຊວງຍຸຕິທໍາຂອງສິງກະໂປ ໄດ້ກ່າວເຖິງການສະເໜີຮ່າງກົດໝາຍດັ່ງກ່າວວ່າ ປະຊາຊົນທຸກຄົນມີສິດ ແລະ ເສລີພາບໃນການສະແດງຄວາມຄິດເຫັນ “ແຕ່ຕ້ອງຢູ່ໃນກອບຂອງກົດໝາຍ” ເພື່ອຄວາມໝັ້ນຄົງ ແລະ ຄວາມສະຫງົບຮຽບຮ້ອຍຂອງບ້ານເມືອງ ແຕ່ອົງກອນສິດທິມະນຸດສະທຳໄດ້ພາກັນອອກມາປະນາມຮ່າງກົດໝາຍດັ່ງກ່າວທັນທີ.

ຄວາມເຄື່ອນໄຫວຂອງລັດຖະບານສິງກະໂປ ໃນເລື່ອງສະເໜີຮ່າງກົດໝາຍຂ່າວປອມທາງອອນລາຍໄດ້ເກີດຂຶ້ນ ຂະນະດຽວກັນກັບທ່ານມາກຊັກເຄີເບີກ ປະທານຄະນະເຈົ້າໜ້າທີ່ບໍລິຫານ (CEO) ຂອງເຟຊບຸ໊ກ ໄດ້ອອກມາຮຽກຮ້ອງເມື່ອອາທິດ ຜ່ານມາ ວ່າ ລັດຖະບານຂອງແຕ່ລະປະເທດຄວນເພິ່ມການກວດກາກິດຈະກໍາຂອງແພລັດຟອມອອນລາຍ ໃນປະເທດຕົນເອງໃຫ້ຫຼາຍຂຶ້ນ.