ອິນເດຍ ປະສົບຄວາມສໍາເລັດທົດລອງລະບົບຈະຫຼວດທຳລາຍດາວທຽມ

237

ລັດຖະບານອິນເດຍ ປະສົບຄວາມສໍາເລັດ ໃນການທົດລອງລະບົບທຳລາຍດາວທຽມສອດແນມ ເຊິ່ງໂຄຈອນໃນລະດັບຕໍ່າ ຄວາມເຄື່ອນໄຫວດັ່ງກ່າວ ປາກິສຖານເຫັນວ່າເປັນການ “ສົ່ງສັນຍານທີ່ໜ້າສົງໄສ”.

ສໍານັກຂ່າວຕ່າງປະເທດລາຍງານຈາກນະຄອນຫຼວງນິວເດລີ ປະເທດອິນເດຍ ເມື່ອວັນພະຫັດ ທີ 28 ມີນາ ວ່າ ທ່ານນາຍົກລົດຖະມົນຕີເຣນທຣາ ໂມດີ ໄດ້ຖະແຫຼງຜ່ານສະຖານີໂທລະທັດແຫ່ງຊາດ ເມື່ອວັນພຸດ ຜ່ານມາ ວ່າ ການວິໄຈອາວະກາດອິນເດຍ (ISRO) ໄດ້ທໍາການທົດລອງລະບົບທໍາລາຍດາວທຽມສອດແນມທີ່ໂຄຈອນໃນລະດັບຕ່ຳ ດ້ວຍການຍິງຂີປະນາວຸດຈາກສະຖານີທົດລອງທີ່ລັດໂອທິສາ ຕັ້ງຢູ່ທາງພາກຕາເວັນອອກຂອງອິນເດຍ ສາມາດທຳລາຍດາວທຽມຕົວຢ່າງທີ່ໂຄຈອນຢູ່ລະດັບຄວາມສູງ 300 ກິໂລແມັດຈາກພື້ນໂລກ “ໄດ້ເຂົ້າເປົ້າ” ເຊິ່ງກໍ່ແນ່ນອນວ່າ ປະຕິບັດການດັ່ງກ່າວເປັນໄປດ້ວຍຄວາມຍາກລໍາບາກ ແຕ່ສາມາດປະສົບຄວາມສໍາເລັດຢ່າງງົດງາມ ຖືເປັນພາລະກິດທີ່ສາມາດສ້າງຄວາມພາກພູມິໃຈໃຫ້ກັບຊາວອິນເດຍ ວ່າ ສາມາດເຂົ້າສູ່ທຳນຽບໜຶ່ງໃນປະເທດແຖວໜ້າດ້ານເທັກໂນໂລຢີອາວະກາດຂອງໂລກໄດ້ແລ້ວ.

ເຖິງວ່າ ຜູ້ນໍາອິນເດຍ ຢືນຢັນວ່າ ການທົດລອງລະບົບຂີປະນາວຸດຕໍ່ຕ້ານດາວທຽມ (ASAT) ທີ່ລັດຖະບານນິວເດລີ ທົດລອງໃນຄັ້ງນີ້ ບໍ່ໄດ້ມີວັດຖຸປະສົງ “ສ້າງບັນຍາກາດຂອງສົງຄາມ” ກັບຝ່າຍໃດ ແຕ່ເພື່ອການກຽມຄວາມພ້ອມຮັບມືກັບ “ໄພຄຸກຄາມດ້ານຄວາມໝັ້ນຄົງ” ທີ່ອາດຈະມາຢາມໃນຮູບແບບດັ່ງກ່າວເທົ່ານັ້ນ. ຢ່າງໃດກໍ່ຕາມ ທ່ານ ແພັດຣິກ ຊານາຮານ ຮັກສາການລັດຖະມົນຕີກະຊວງປ້ອງກັນປະເທດຂອງອາເມຣິກາ ກ່າວວ່າ ລັດຖະບານວໍຊິງຕັນ “ໄດ້ຕິດຕາມເລື່ອງນີ້ຢ່າງໃກ້ຊິດ” ແລະ ເຕືອນທຸກຝ່າຍເລື່ອງຂີ້ເຫຍື້ອອາວະກາດຈາກເສດຊາກດາວທຽມ ທີ່ມາຈາກການທົດລອງຂອງອິນເດຍໃນຄັ້ງນີ້ ຂະນະທີ່ ກະຊວງການຕ່າງປະເທດຂອງປາກິສຖານ ໄດ້ອອກຖະແຫຼງການ ວ່າ ການທົດລອງຄັ້ງນີ້ ຄືການສົ່ງສານຈາກລັດຖະບານນິວເດລີ ເຖິງ ລັດຖະບານຂອງພວກຕົນຫຼາຍກວ່າ.