ບໍລິສັດລົດຕູ້ຢືນຢັນ!! ຈະຊ່ວຍເຫຼືອເບື້ອງຕົ້ນ 1 ແສນບາດ

268

ສະຖານທູດ ຕິດຕາມຢ່າງໃກ້ຊິດອຸບັດຕິເຫດຢູ່ຈັງຫວັດການຈະນະບູຣີ ທີ່ມີແຮງງານລາວເສຍຊີວິດ5 ຄົນ, ສ່ວນບໍລິສັດລົດຕູ້ຢືນຢັນ!! ຈະຊ່ວຍເຫຼືອເບື້ອງຕົ້ນ 1 ແສນບາດ.

ພາຍຫຼັງເກີດເຫດການ ກໍລະນີລົດພວງຕຳລົດຕູ້ຕົກລົງຄອງນໍ້າ ເມື່ອວັນທີ 23 ມີນາ 2019 ຜ່ານມາ ທີ່ຈັງຫວັດການຈະນະບູຣີ ປະເທດໄທ ສົ່ງຜົນເຮັດໃຫ້ແຮງງານລາວ-ຫຽດນາມ ໃນລົດຕູ້ຄັນດັ່ງກ່າວເສຍຊີວິດຄາທີ່ 10 ລາຍ ແລະ ບາດເຈັບສາຫັດ 4 ຄົນ ແລະ ໜຶ່ງໃນຜູ້ບາດເຈັບມີຊາວໄທ 1 ຄົນ ເຊິ່ງເປັນຄົນຂັບລົດ.

ຫຼ້າສຸດ, ບໍລິສັດ CPS (ລົດຕູ້ໂດຍສານ) ຢືນຢັນວ່າຈະໃຫ້ການຊ່ວຍເຫຼືອເບື້ອງຕົ້ນ 100.000 ບາດ ຫຼື ປະມານ 28 ລ້ານກີບ ໃຫ້ແກ່ຄອບຄົວຜູ້ເສຍຊີວິດ ເພື່ອນຳຈັດສົ່ງຊາກສົບໄປຈັດພິທີທາງສາສະໜາ. ສ່ວນຜູ້ທີ່ໄດ້ບາດເຈັບແມ່ນອອກຈາກໂຮງໝໍແລ້ວ.

ອີງຕາມເພຈ: ປະເທດລາວ Pathedlao ຂອງສໍານັກຂ່າວສານປະເທດລາວ ລາຍງານວ່າ: ສະຖານເອກອັກຄະລັດຖະທູດລາວ ປະຈຳບາງກອກປະເທດໄທ ແຈ້ງໃຫ້ຮູ້ວ່າ: ປັດຈຸບັນແຮງງານລາວ ທີ່ໄດ້ບາດເຈັບຈາກການເກີດອຸບັດຕິເຫດເມື່ອວັນທີ 23 ມີນາ ຜ່ານມາ ທີ່ຈັງຫວັດການຈະນະບູຣີ ປະເທດໄທ ໄດ້ອອກຈາກໂຮງໝໍ ແລະ ໄປພັກຟື້ນຢູ່ນຳພີ່ນ້ອງແລ້ວ. ສ່ວນສົບຂອງ 5 ຄົນ ທີ່ເສຍຊີວິດ ທາງເຈົ້າໜ້າທີ່ໄທ ໄດ້ນຳສົ່ງໄປພິສູດຢູ່ສະຖາບັນນິຕິເວດ ໂຮງໝໍຕຳຫຼວດທີ່ບາງກອກ.

ສຳລັບການຊ່ວຍເຫຼືອເບື້ອງຕົ້ນ ທາງບໍລິສັດລົດຕູ້ໂດຍສານໄດ້ສະເໜີຈະໃຫ້ 100.000 ບາດ ຫຼື ປະມານ 28 ລ້ານກີບ ເພື່ອຈັດສົ່ງຊາກສົບໄປຈັດພິທີທາງສາສະໜາ. ຫຼັງຈາກນັ້ນ, ຈຶ່ງຈະດໍາເນີນການທາງດ້ານກົດໝາຍເພື່ອຈ່າຍຄ່າຫົວອີງຕາມກົດໝາຍປະກັນໄພຂອງໄທ.

ປັດຈຸບັນຄະດີດັ່ງກ່າວຍັງຢູ່ໃນຂັ້ນຕອນສືບສວນ-ສອບສວນຂອງເຈົ້າໜ້າທີ່ຕຳຫຼວດ ຈັງຫວັດການຈະນະບູຣີ ແລະ ທາງສະຖານທູດລາວກໍໄດ້ຕິດຕາມຢ່າງໃກ້ຊິດ ໂດຍໄດ້ປະສານງານໂດຍກົງກັບຫົວໜ້າຕຳຫຼວດກວດຄົນເຂົ້າເມືອງ ຈັງຫວັດການຈະນະບູຣີ.

ພ້ອມກັນນັ້ນ, ກໍໄດ້ໃຫ້ຄຳແນະນຳຕາມຂັ້ນຕອນທາງດ້ານກົດໝາຍເພື່ອໃຫ້ຄູ່ກໍລະນີຊົດເຊີຍຄ່າຫົວ ແລະ ຄ່າໃຊ້ຈ່າຍເພື່ອເອົາຊາບສົບກັບຄືນບ້ານເກີດເມືອງນອນ ພ້ອມທັງໄດ້ໃຫ້ການອຳນວຍຄວາມສະດວກໃນການອອກເອກະສານທີ່ກ່ຽວຂ້ອງ.

CR:laoedaily