ປະເພນີສືບທອດຫຼາຍລຸ້ນຈົດປັດຈຸບັນ ໃນປີໃໝ່ລາວ

293

ການສົງນໍ້າພະເປັນຮີດຄອງປະເພນີຂອງຄົນບູນຮານທີ່ສືບທອດມາເຖິງປັດຈຸບັນ ເຊັ່ນ: ສົງພະພຸດທະຮູບໃນວັດ, ສົງທາດປູ່ຍ່າຕາຍາຍທີ່ລ່ວງລັບໄປ ແລະ ສົງສະຖານທີ່ສັກສິດຂອງເມືອງ ຕົວຢ່າງ: ທາດພັງພາຍ, ທາດຄໍາກອນ ແລະ ສົງນໍ້າຜູ້ໃຫຍ່ຕະຫຼອດຮອດຜູ້ປົກຄອງ ຫຼື ພະນັກງານການນໍາ.

ສະນັ້ນ, ເມື່ອຮອດປີໃໝ່ທຸກປີທຸກຄອບຄົວຈະເອົາໃຈໃສ່ໃນເລື່ອງກະກຽມນໍ້າສົງ ໂດຍເລີ່ມຈາກການກຽມນໍ້າສະອາດປາສະຈາກມົນທິນ, ນໍ້າຫອມ ຫຼື ນໍ້າໝາກໄມ້ ເຊັ່ນ: ໝາກຂີ້ຫູດໃນສະໄໝກ່ອນຈະຄັ້ນນໍ້າໝາກໄມ້ປ່າແທນນໍ້າຫອມ. ກຽມນໍ້າສະອາດແລ້ວກໍຈະມີຫວ້ານຫອມ, ຂີ້ມິ້ນ, ໝາກສົ້ມປ່ອຍ, ໝາກຂີ້ຫູດ ( ຊ່ວຍປົດປ່ອຍວິນຍານຊົ່ວຮ້າຍ ), ໃບຫວ້ານຊົນ ( ປັດເປົ່າຄວາມເຈັບຄວາມເມື່ອຍ ) ແລ້ວນໍາໝາກສົ້ມປ່ອຍມາເຜົາແລ້ວແຊ່ໃນນໍ້າທີ່ກຽມໄວ້ຊອຍໝາກຂີ້ຫູດ ແລະ ໃບຫວ້ານຊົນລົງ. ນອກຈາກນີ້, ເພື່ອເພີ່ມຄວາມເປັນສີລິມຸງຄຸນກໍຈະໃສ່ດອກໄມ້ອື່ນໆຕາມທີ່ມັກ ເຊັ່ນ: ດອກສະມັ່ງ, ດອກມະລິ, ດອກຈໍາປາ ຫຼື ດອກຄູນ.

ເມື່ອຮຽບຮ້ອຍແລ້ວກໍຈະໄປສົງພະເປັນຄອບຄົວ ແລະ ໃນສະໄໝກ່ອນບາງວັດຍັງມີການສົງພະສົງ ຫຼື ເຈົ້າອາວາດຮ່ວມນໍາ. ຫຼັງສົງພະພຸດທະຮູບ ຫຼື ສິ່ງສັກສິດສໍາເລັດແລ້ວ ພໍ່ແມ່ປະຊາຊົນກໍໄດ້ເອົາຂັນ, ພາຊະນະໃສ່ນໍ້າທີ່ສົງພະແລ້ວກັບເມື່ອບ້ານເພື່ອເອົາໄປລູບຫົວຜູ້ທີ່ບໍ່ໄດ້ມາສົງ ແລະ ຫົດໃສ່ເຮືອນຊານເພື່ອປັດເປົ່າສິ່ງບໍ່ດີອອກໄປນໍາປີເກົ່າ, ຕາມປົກກະຕິແລ້ວຈະນິຍົມສົງພະ 3 – 7 – 9 ວັດ ສາເຫດທີ່ນິຍົມສົງ 9 ວັດແມ່ນເພື່ອຄວາມເປັນສີລິມຸງຄຸນ ( ບາງຄົນກໍເລືອກວັດທີ່ນິຍົມ ຫຼື ໂດ່ງດັງ ). ນອກຈາກສົງພະ ຄົບ 9 ວັດແລ້ວ ຍັງໄດ້ຮັບພອນດີໆອີກດ້ວຍ ທຸກວັດຈະເອົາພະພຸດທະຮູບລົງມາໃຫ້ພໍ່ແມ່ປະຊາຊົນໄດ້ສົງແມ່ນປະມານບ່າຍ 14:00 ໂມງ ໃນມື້ສັງຂານລ່ວງ.

  • ໃນວັນສັງຂານລ່ວງ ໝາຍເຖິງວັນສຸດທ້າຍຂອງ ຈ.ສ 1380 ( ເປັນຂໍ້ມູນບູຮານ ) ໂດຍເປັນວັນອາທິດຂຶ້ນ 10 ຄໍ່າ ເດືອນ 5 ລາວ ເວລາ 8:48 ຕອນເຊົ້າ ເຊິ່ງກົງກັບວັນອາທິດວັນທີ 14/4/2019.
  • ໃນວັນສັງຂານເນົາ ແມ່ນມື້ວັນຈັນ 11 ຄໍ່າ ເດືອນ 5 ລາວ ກົງກັບວັນທີ 15/4/2019 ເປັນມື້ພິເສດທີ່ຂ້າມຜ່ານປະຕິທິນປີເກົ່າໄປຫາປີໃໝ່.
  • ໃນວັນສັງຂານຂຶ້ນ ( ມື້ທີໜຶ່ງຂອງປີ  ຈ.ສ 1381 ) ເປັນວັນອັງຄານຂຶ້ນ 12 ຄໍ່າ ເດືອນ 5 ລາວ ກົງກັບວັນທີ 16/4/2019 ຕ້ອນຮັບປີໃໝ່ຈຸລະສັງກາດ ຈ.ສ 1381.

ບາງທ່ານຄິດວ່າປີໃໝ່ລາວແມ່ນຕ້ອນຮັບ ພ.ສ 2562 ເປັນຄວາມເຂົ້າໃຈຜິດພາດທີ່ປ່ຽນຈາກ ພ.ສ 2561 ເປັນ ພ.ສ 2562 ຄວາມຈິງແມ່ນວັນວິສາຄະບູຊາ ເຊິ່ງເປັນວັນປະສູດຕັດສະລຸ ແລະ ປະລິນິບພານຂອງພະພຸດທະເຈົ້າ; ປີນີ້ຖືກ 15 ຄໍ່າ ເດືອນ 6 ລາວ ກົງກັບວັນທີ 18 ເດືອນ 5 ປີ 2019 ( ໜຶ່ງເດືອນຫຼັງປີໃໝ່ລາວຈຶ່ງປ່ຽນ ພ.ສ ).

ນອກຈາກການໄປສົງພະຢູ່ວັດແລ້ວ ເຮືອນຫຼັງໃດທີ່ມີຮ້ານພະກໍຈະເອົາພະພຸດທະຮູບ ແລະ ເຄື່ອງສັກສິດມາຊະລ້າງອະນາໄມບົວລະບັດປັດຂີ້ຝຸ່ນຈຶ່ງນໍາມາວາງໄວ້ໂຕະ ເອີ້ນລູກຫຼານໃນຄອບຄົວມາຫົດສົງເພື່ອເປັນສີລິມຸງຄຸນ. ກ່ອນຈະເອົາພະພຸດທະຮູບລົງມາອະນາໄມຕ້ອງໄດ້ແຕ່ງຂັນ 5, ຂັນ 8 ເມື່ອຈະເອົາພະຂຶ້ນກໍໄດ້ແຕ່ງຂັນ 5 ແລະ ຂັນ 8. ນອກຈາກສົງຢູ່ວັດ, ສົງຢູ່ເຮືອນ, ສົງທາດພໍ່ແມ່ພີ່ນ້ອງກໍຕ້ອງອະນາໄມທາສີ, ຈັດດອກໄມ້ທູບທຽນໄປບູຊາ ໂດຍຈະປະຕິບັດກ່ອນມື້ປີໃໝ່ ແລະ ໃນມື້ປີໃໝ່ຈຶ່ງໄປຫົດສົງອີກ. ຫຼັງຈາກປີໃໝ່ຜ່ານໄປ 3 ມື້ ກໍສົມມາພໍ່ແມ່ຜູ້ມີບຸນຄຸນທີ່ເຄົາລົບນັບຖືດ້ວຍການຊື້ອາຫານ ແລະ ເຄື່ອງນຸ່ງຫົ່ມເປັນຂອງຂວັນປີໃໝ່ໃຫ້ເທົ່ານີ້ເພິ່ນກໍມີຄວາມສຸກແລ້ວ.

ການສົມມາພໍ່ – ແມ່ ແລະ ຍາດຕິພີ່ນ້ອງ, ປູ່ຍ່າ, ຕາຍາຍ ເພື່ອຄວາມເປັນສີລິມຸງຄຸນໃຫ້ແກ່ຊີວິດຕົນເອງ ແລະ ຄອບຄົວ ແມ່ນສາມາດເຮັດໄດ້ທຸກເທດສະການ ແຕ່ຖ້າຈະໃຫ້ດີແທ້ແມ່ນພາຍຫຼັງບຸນປີໃໝ່ລາວຂອງທຸກໆປີ ເພາະການສົມມາພໍ່ແມ່ເປັນສິ່ງທີ່ລູກຫຼານທຸກຄົນຕ້ອງໄດ້ເຮັດ ເພາະໃນໄລຍະ 1 ປີຜ່ານມາ ເຮົາບໍ່ອາດຮູ້ໄດ້ວ່າມີສິ່ງໃດແດ່ທີ່ເຮົາເຮັດຜິດລົງໄປ ແລະ ເປັນເຫດໃຫ້ພໍ່ແມ່ບໍ່ພໍໃຈ, ບໍ່ສະບາຍໃຈ ບໍ່ວ່າເຮັດໂດຍຕັ້ງໃຈ ຫຼື ບໍ່ຕັ້ງໃຈກໍຕາມ ແລະ ການສົມມາພໍ່ແມ່ຍັງເປັນການສະແດງອອກເຖິງຄວາມສຳນຶກຮູ້ບຸນຄຸນທີ່ພໍ່ແມ່ລ້ຽງດູເຮົາມາໃຫ້ມີຊີວິດທີ່ດີຈົນເທົ່າທຸກວັນນີ້.