ເປີດບັ້ນສອບເສັງນັກຮຽນເກັ່ງລະດັບຊາດ ປະຈຳສົກຮຽນ 2018 – 2019

388

ບັ້ນສອບເສັງນັກຮຽນເກັ່ງຊັ້ນມັດທະຍົມສຶກສາລະດັບຊາດ ໄຂຂຶ້ນຢ່າງເປັນທາງການໃນວັນທີ 26 ມີນາ ທີ່ສະໂມສອນມະຫາວິທະຍາໄລແຫ່ງຊາດມີນັກສອບເສັງທັງໝົດ 144 ຄົນ, ໂດຍການເຂົ້າຮ່ວມເປີດການສອບເສັງຂອງ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ.

ທ່ານ ນາງ ປອ. ສີສຸກ ວົງວິຈິດ ຫົວໜ້າກົມສາມັນສຶກສາກະຊວງສຶກສາ ແລະ ກີລາ ກ່າວວ່າ: ໃນແຕ່ລະສົກຮຽນ, ກົມສາມັນສຶກສາ ກະຊວງສຶກສາທິການ ແລະ ກີລາ ໄດ້ຈັດໃຫ້ມີການສອບເສັງແຂ່ງຂັນນັກຮຽນເກັ່ງຊັ້ນມັດທະຍົມສຶກສາລະດັບຊາດຂຶ້ນ ເຊິ່ງເປັນໜຶ່ງໃນກິດຈະກໍາບຸລິມະສິດທີ່ມີ ຄວາມສໍາຄັນປະຈໍາສົກຮຽນໃນແຕ່ລະປີ. ສໍາລັບຊັ້ນ ມ 4 ໄດ້ຈັດສອບເສັງເປັນປີທີ 10 ແລະ ມ 7 ເປັນປີທີ 9 ໂດຍມີຈຸດປະສົງລະດັບຄາດໝາຍ ເພື່ອສົ່ງເສີມ ແລະ ຊຸກຍູ້ຂະບວນການສອນດີ – ຮຽນເກັ່ງຢູ່ໃນໂຮງຮຽນມັດທະຍົມໃນຂອບເຂດທົ່ວປະເທດ ໃຫ້ມີບັນຍາກາດຟົດຟື້ນມີລັກສະນະແຂ່ງຂັນ ແລະ ມີຄຸນນະພາບ, ສ້າງໂອກາດໃຫ້ນັກຮຽນໄດ້ສະແດງອອກດ້ານ ຄວາມຮູ້ – ຄວາມສາມາດ, ພອນສະຫວັນ ແລະ ຫົວຄິດປະຄິດສ້າງຂອງຕົນເອງ.

ພ້ອມດຽວກັນນັ້ນ, ຍັງເປັນການວັດ ແລະ ປະເມີນຜົນສໍາເລັດດ້ານການສິດສອນ, ຮໍ່າຮຽນຂອງຄູ, ນັກຮຽນ, ເພື່ອຄັດເລືອກ ແລະ ສົ່ງເສີມນັກຮຽນເກັ່ງທີ່ມີພອນສະຫວັນໃນແຕ່ລະວິຊາເປັນຕົວແທນຂອງຊາດເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນ. ພ້ອມທັງເປັນການສ້າງໂອກາດໃຫ້ຄູນໍາພາ ແລະ ນັກສອບເສັງຈາກທົ່ວປະເທດໄດ້ແລກປ່ຽນ, ຖອດຖອນບົດຮຽນຮ່ວມກັນ. ນອກຈາກນັ້ນ, ຍັງຈະມີການຍ້ອງຍໍນັກຮຽນເກັ່ງ ແລະ ໃຫ້ໂອກາດແກ່ຜູ້ທີ່ສອບເສັງໄດ້ຊະນະເລີດ ອັນດັບທີ 1, 2 ແລະ 3 ແຕ່ລະວິຊາໄດ້ຮັບທຶນການສຶກສາ ເພື່ອຮຽນຕໍ່ໃນວິຊາທີ່ຕົນເອງມັກ ທັງພາຍໃນ ແລະ ຕ່າງປະເທດ.

ສ່ວນການສອບເສັງນັກຮຽນເກັ່ງລະດັບຊາດຊັ້ນມັດທະຍົມສຶກສາ ໃນສົກຮຽນ 2018 – 2019, ທາງກົມສາມັນສຶກສາ ໄດ້ປະຕິບັດຕາມຮູບແບບ, ວິທີການ ແລະ ມາດຕະຖານ ຄື: ດ້ານວິຊາການໄດ້ເຊີນຄູສອນຕົວຈິງ ແລະ ນັກວິຊາການທີ່ມີປະສົບການທັງສາຍສາມັນ ແລະ ມະຫາວິທະຍາໄລ ອອກຂໍ້ສອບເສັງເພື່ອສ້າງເປັນຄັງຂໍ້ສອບເສັງສໍາລັບນັກຮຽນເກັ່ງໃນ 4 ວິຊາ ທັງ ມ 4 ແລະ ມ 7 ໄດ້ຈໍານວນໜຶ່ງ ເພື່ອເປັນຂໍ້ມູນໃນການຄັດເລືອກຂໍ້ສອບເສັງ. ສໍາລັບມາດຕະຖານການຕັດສິນຜົນການສອບເສັງ ໄດ້ກໍານົດຄະແນນໃນວິຊາສອບເສັງ ຕ້ອງໄດ້ຄະແນນ 7 ຂຶ້ນໄປ ຈຶ່ງຈະຖືກຮັບຮອງເປັນນັກຮຽນເກັ່ງລະດັບຊາດ ເຊິ່ງການສອບເສັງ ປະກອບມີ 4 ວິຊາ ຄື: ຄະນິດສາດ, ພາສາລາວ – ວັນນະຄະດີ, ຟີຊິກສາດ ແລະ ເຄມີສາດ. ແຕ່ລະວິຊາແມ່ນໃຊ້ເວລາ 120 ນາທີ.

ສໍາລັບສົກຮຽນ 2018 – 2019 ມີນັກຮຽນເກັ່ງເຂົ້າຮ່ວມການສອບເສັງທັງໝົດຈຳນວນ 144 ຄົນ ຍິງ 55 ຄົນ ເຊິ່ງກວມເອົາຫຼາຍເຜົ່າ ຄື: ເຜົ່າລາວ ມີ 69 ຄົນ, ມົ້ງ 50 ຄົນ, ກຶມມຸ 6 ຄົນ, ກະລ່ຽງ 6 ຄົນ, ຜູ້ນ້ອຍ 2 ຄົນ, ຢ້າວ 2 ຄົນ, ລື້ 3 ຄົນ, ອາຄາ 2 ຄົນ, ແຢະ 1 ຄົນ, ໂອ້ຍ 2 ຄົນ ແລະ ຍວນ 1 ຄົນ. ໃນນັ້ນ, ມ 4 ມີນັກສອບເສັງທັງໝົດ 72 ຄົນ ຍິງ 32 ຄົນ. ສ່ວນ ມ 7 ມີນັກສອບເສັງທັງໝົດ 72 ຄົນ ຍິງ 23 ຄົນ.

ສຳລັບການປະກາດຜົນສອບເສັງຈະມີຂຶ້ນໃນຕອນບ່າຍຂອງວັນສຸກ ວັນທີ 29 ມີນາ 2019 ທີ່ສະໂມສອນ ມະຫາວິທະຍາໄລແຫ່ງຊາດ.

Credit Laoedaily, Picture: ຕຸ່ນຄໍາ