5 ສິ່ງຄວນເຮັດ ເພື່ອຄວາມເປັນສິລິມຸງຄຸນ ໃນວັນປີໃໝ່ລາວ

351

ບຸນປີໃໝ່ລາວ ຖືເປັນປາງບຸນໃຫຍ່ໜຶ່ງທີ່ສຳຄັນຂອງຄົນລາວ ເພາະເປັນການສະຫຼອງວັນຂຶ້ນປີໃໝ່ ລາວ ທີ່ໄດ້ສືບສານ ແລະ ປະຕິບັດກັນມາແຕ່ບູຮານນະການ. ນອກນີ້, ຍັງເປັນວັນຄອບຄົວ ທີ່ຈະໄດ້ຢູ່ພ້ອມໜ້າພ້ອມຕາ ເນື່ອງຈາກຫຼາຍໆຄອບຄົວ ທີ່ມີລູກໆຫຼານໄປເຮັດວຽກຢູ່ຕ່າງແຂວງ ຫຼື ຕ່າງປະເທດ ກໍ່ຈະໄດ້ໃຊ້ໂອກາດນີ້ມາລວມຕົວກັນອີກຄັ້ງໜຶ່ງ, ມາສົມມາພໍ່ແມ່, ຜູ້ມີພະຄຸນທັງຫຼາຍ ແລະ ຮ່ວມກັນເຮັດກິດຈະກຳຮ່ວມກັນ ທັງກິດຈະກຳໃນຄອບຄົວ ບໍ່ວ່າຈະເປັນການຫົດນໍ້າດຳຫົວຜູ້ໃຫຍ່ ຫຼື ກິດຈະກຳທີ່ມີປະໂຫຍດຕໍ່ສັງຄົມເຊັ່ນ: ການຂົນຊາຍເຂົ້າວັດ, ການເຮັດບຸນ-ເຮັດທານ ເພື່ອຄວາມເປັນສິລິມຸງຄຸນຕໍ່ຕົນເອງ ແລະ ຄອບຄົວ. ສະນັ້ນ, ມາຮູ້ນຳກັນວ່າ 5 ພິທີກຳທີ່ຄວນເຮັດ ໃນວັນຂຶ້ນປີໃໝ່ມີດັ່ງນີ້:

1 ທຳຄວາມສະອາດບ້ານເຮືອນ, ຮ້ານພະ, ສານພະພູມ-ສານເຈົ້າທີ່ ແລະ ສະຖານທີ່ຕ່າງໆພາຍໃນເຮືອນໃຫ້ມີຄວາມສະອາດຈົບງາມ ເພື່ອເປັນການຈຳກັດປັດເປົ່າເອົາສິ່ງທີ່ບໍ່ດີບໍ່ງາມອອກໄປໃຫ້ໝົດຕົກໄປນຳປີເກົ່າ ແລ້ວຕ້ອນຮັບເອົາສິ່ງໃໝ່ເຂົ້າມາ ເຊິ່ງພິທີກຳນີ້ແມ່ນນິຍົມເຮັດຕັ້ງແຕ່ວັນທີ 13-15 ເມສາ ເພາະຖືວ່າເປັນເລີກງາມຍາມດີ ແລະ ເຮັດເປັນປະຈຳທຸກໆປີ ເພາະຈະຊ່ວຍເສີມດວງໃຫ້ສິ່ງສັກສິດທັງຫຼາຍຄໍ້າຊູຊ່ວຍເຫຼືອ ພ້ອມທັງເສີມສ້າງຄວາມເປັນສິລິມຸງຄຸນໃຫ້ແກ່ຊີວິດ.

2 ເຮັດບຸນເຮັດທານໃຫ້ກັບບັນພະບູລຸດທີ່ລ່ວງລັບໄປແລ້ວ: ພິທີກຳນີ້ເປັນການລໍ້າລຶກເຖິງບັນພະບູລຸດທີ່ໄດ້ລ່ວງລັບຈາກໄປ ເຊິ່ງຜູ້ເປັນລູກຫຼານໆຈະໄດ້ທຳບຸນເຮັດທານຢາດນໍ້າໄປຫາ, ອີກທັງຍັງເປັນການລວມຍາດຕິພີ່ນ້ອງທີ່ຈະໄດ້ມາພົບປະສັງສັນ ແລະ ໃກ້ຊິດກັນ ພາຍຫຼັງທີ່ສຳເລັດໜ້າທີ່ວຽກງານຂອງຕົນເອງ ພ້ອມນັ້ນ, ຍັງເປັນການເສີມດວງບໍລິວານນຳອີກ.

3 ຂົນຊາຍເຂົ້າວັດ: ເປັນປະເພນີບູຮານທີ່ສືບທອດກັນມາ ໂດຍມີຄວາມເຊື່ອວ່າ ເມື່ອເຮົາເຂົ້າໄປໃນວັດ ຕອນອອກຈາກວັດນັ້ນເຮົາຢຽບດິນຊາຍ ແລະ ດິນຊາຍຈະຕິດເກີບເຮົາອອກມານຳ. ສະນັ້ນ, ການຂົນຊາຍເຂົ້າວັດຈຶ່ງປຽບເໝືອນໄດ້ຄືນດິນຊາຍໃຫ້ແກ່ວັດ ຫຼັງຈາກນັ້ນ, ພະສົງ-ສາມະເນນກໍ່ເອົາດິນຊາຍເຫຼົ່ານີ້ໄປໃຊ້ເພື່ອໃຫ້ເກີດປະໂຫຍດຕໍ່ໄປ ເຊິ່ງພິທີກຳນັ້ນ ມີຄວາມເຊື່ອວ່າເປັນການເສີມດວງອະສັງຫາລິມະຊັບ, ຫາກຕ້ອງການໃຫ້ມີຄວາມໝັ້ນຄົງທາງດ້ານອະສັງຫາລິມະຊັບ ຄວນຂົນດິນຊາຍເຂົ້າວັດ ພ້ອມກໍ່ເປັນເຈດີຊາຍ ແລ້ວໃຫ້ປັກທຸງຕາມວັນເກີດເຊັ່ນ: ເກີດວັນອາທິດ ແມ່ນປັກທຸງສີແດງ, ເກີດວັນຈັນ ແມ່ນປັກທຸງສີເຫຼືອງ ແລະ ວັນອື່ນໆຕາມດຳລັບ ເພາະຈະເປັນຊ່ວຍເສີມດວງດ້ານຊັບສິນຂອງເຮົານຳອີກ.

4 ຫົດນໍ້າດຳຫົວຜູ້ໃຫຍ່: ບໍ່ວ່າຈະເປັນພະສົງ, ເຖົ້າແກ່ອາວຸໂສທີ່ ລວມໄປເຖິງເຈົ້ານາຍທີ່ເຮົາເຄົາລົບນັບຖື. ການຫົດນໍ້າຜູ້ໃຫຍ່ນັ້ນ ສິ່ງທີ່ຕ້ອງກະກຽມປະກອບມີເຄື່ອງສົມມານຳ ບໍ່ວ່າຈະເປັນເສື້ອຜ້າອາພອນ ຫຼື ອື່ນໆທີ່ນຳໄປໃຊ້ປະໂຫຍດຕໍ່ໄດ້, ຈາກນັ້ນ, ກໍ່ມີດອກໄມ້ທູບທຽນ, ນໍ້າອົບນໍ້າຫອມນຳມາຫົດສົງທ່ານເພື່ອຂໍພອນ. ພິທີການຫົດນໍ້າດຳຫົວຜູ້ໃຫຍ່ນີ້ຈະໄດ້ຮັບຄວາມເມດຕາຈາກຜູ້ໃຫຍ່ ເພາະເປັນການເສີມດວງອຸປະຖຳຄໍ້າຊູຊີວິດໃຫ້ຈະເລີນກ້າວໜ້າ

5 ສົມມາພໍ່ແມ່: ໃນລະຫວ່າງປີເຮົາອາດຈະເຮັດຜິດຕໍ່ພໍ່ແມ່ ທັງເຈດຕະນາກໍ່ດີ, ບໍ່ເຈດຕະນາກໍ່ດີ ຕັ້ງຕໍ່ໜ້າ ແລະ ລັບຫຼັງ ບໍ່ວ່າຈະເປັນທາງກາຍ, ວາຈາ ແລະ ໃຈ. ສະນັ້ນ, ໃນຊ່ວງເທດສະການປີໃໝ່ນີ້ ຕ້ອງສົມມາພໍ່ແມ່ ເພື່ອຂໍໂທດຂໍອະໂຫສິກຳທີ່ເຮົາໄດ້ລ່ວງເກີນເພີ່ນ ຫຼື ເຮັດໃຫ້ເພີ່ນເສຍໃຈ ເພາະຫາກໄດ້ສົມມາພໍ່ແມ່ ແລະ ຮັບພອນຈາກທ່ານແລ້ວ ເຊື່ອວ່າຈະເຮັດໃຫ້ຊີວິດມີແຕ່ຄວາມຈະເລີນຮຸ່ງເຮືອງ ບໍ່ວ່າຈະທຳການຄ້າຂາຍ ກໍ່ຈະເຮັດໃຫ້ກິດຈະການຮຸ່ງເຮືອງ ທັງເປັນການເສີມດວງເພື່ອລ້າງບາບ ເພີ່ມຄວາມເປັນສີລິມຸງຄຸນ, ເຮັດໃຫ້ມີຄວາມຈະເລີນໃນຊີວິດ.   

ໃນໂອກາດນີ້, ຜູ້ຂຽນຂໍອວຍພອນໃຫ້ທຸກໆທ່ານ ຈົ່ງມີແຕ່ຄວາມສຸກກາຍສະບາຍໃຈ, ປະສົບຜົນສຳເລັດໃນໜ້າທີ່ການງານ ແລະ ພ້ອມກັນສະຫຼອງວັນປີໃໝ່ທີ່ໃກ້ຈະມາຮອດນີ້ ມີແຕ່ຄວາມເບີກບານມ່ວນຊື່ນ ແລະ ພ້ອມກັນປະຕິບັດໜ້າທີ່ຂອງຕົນເອງຢ່າງຫ້າວຫັນ ເປັນລູກທີ່ດີຂອງພໍ່ແມ່, ເປັນພໍ່ແມ່ທີ່ດີຂອງລູກ ແລະ ເປັນຄົນດີຂອງສັງຄົມຕະຫຼອດໄປ.