ເຫຼືອເຊື່ອ! ບຣິຕິຊ ແອຣ໌ເວ ພາຜູ້ໂດຍສານລົງຈອດຜິດປະເທດ

992

ສາຍການບິນບຣິຕິຊ ແອຣ໌ເວ ຂອງອັງກິດ ນໍາພາຜູ້ໂດຍສານເດີນທາງ ຈາກນະຄອນຫຼວງລອນດອນ ໄປເມືອງດຸສເຊລດັອຟ ທາງພາກຕາເວັນຕົກຂອງເຢຍລະມັນ ແຕ່ນັກບິນ ໄດ້ບິນຕາມເອກະສານຄູ່ມືທີ່ໄດ້ຮັບມາຜິດສະບັບ ຈຶ່ງພາຍົນໄປລົງຈອດທີ່ເມືອງເອດິນບະຣະ ໃນປະເທດສະກັອດແລນ ເຊິ່ງເປັນເສັ້ນທາງຄົນລະທິດທາງ ແລະ ຫ່າງຈາກຈຸດໝາຍ ກວ່າ 800 ກິໂລແມັດ.

ເວັບໄຊຂ່າວທັອກເລດິໂອ ຂອງອັງກິດ ໄດ້ລາຍງານຈາກນະຄອນຫຼວງລອນດອນ ເມື່ອວັນຈັນ ທີ 25 ມີນາ ວ່າ ກັບຕັນຜູ້ນຳຖ້ຽວບິນ ບີເອ 3271 ຂອງບຣິຕິຊ ແອຣ໌ເວ ອອກເດີນທາງຈາກສະໜາມບິນລອນດອນ ຊິຕີ້ ເມື່ອເວລາປະມານ 7:30 ໂມງ ຂອງເຊົ້າວັນຈັນ ຕາມເວລາທ້ອງຖິ່ນ ແລະ ນັກບິນປະຕິບັດຕາມຄໍາສັ່ງໃນເອກະສານທີ່ໄດ້ຮັບ ເພື່ອນໍາຍົນໄປລົງຈອດທີ່ສະໜາມບິນເມືອງເອດິນບະຣະ ທາງພາກເໜືອຂອງເກາະອັງກິດ.

ຜູ້ໂດຍສານຫຼາຍຄົນເລິ່ມສັງເກດເຫັນຄວາມຜິດປົກກະຕິ ເມື່ອຍົນລົງຈອດຣັນເວ ແລະ ເບິ່ງຊອດອອກມາຈາກປ່ອງຢ້ຽມຂອງຍົນແລ້ວເຫັນປ້າຍ “ຍິນດີຕ້ອນຮັບສູ່ເອດິນບະຣະ” ຈຶ່ງແຈ້ງໃຫ້ພະນັກງານຕ້ອນຮັບເທິງຍົນຮູ້.

ຫຼັງລົງຈອດທີ່ສະໜາມບິນເອດິນບະຣະ ແລະ ນັກບິນພົບຄວາມຜິດພາດຍົນຕ້ອງເຕີມນໍ້າມັນເຊື້ອໄຟ ແລະ ອອກເດີນທາງຕໍ່ ເພາະຕ້ອງໄດ້ບິນກັບໄປເມືອງດຸສເຊລດັອຟ ເຊິ່ງຢູ່ຫ່າງອອກໄປປະມານ 804,6 ກິໂລແມັດ ແລະ ຍົນໄດ້ລົງຈອດທີ່ສະໜາມບິນດຸສເຊລດັອຟ ຊ້າກວ່າກໍານົດ ກວ່າ 3 ຊົ່ວໂມງເຄິ່ງ. ໂຄສົກຂອງສາຍການບິນບຣິຕິຊ ແອຣ໌ເວ ໄດ້ອອກຖະແຫຼງການຂໍໂທດຕໍ່ຜູ້ໂດຍສານ ໂດຍບອກວ່າບໍລິສັດຈະຕິດຕໍ່ຜູ້ໂດຍສານທຸກຄົນເປັນລາຍບຸກຄົນ ແລະ ຈະໄດ້ສອບຖາມຫາສາເຫດຂອງຄວາມຜິດພລາດທີ່ບໍ່ໜ້າເກີດຂຶ້ນໄດ້.