ຈີນສັ່ງຊື້ ແອຣ໌ບັສ 300 ລໍາ ກວ່າ ສອງແສນຕື້ກີບ ລະຫວ່າງປະທານປະເທດສີ ຈິ້ນຜິງ ຢ້ຽມຢາມຝຣັ່ງ

341

ລັດຖະບານຈີນຕົກລົງສັ່ງຊື້ຍົນຈາກແອຣ໌ບັສ 2 ລຸ້ນ ລວມ 300 ລໍາ ກວ່າ 2 ແສນຕື້ກີບ ໂດຍການລົງນາມເກີດຂຶ້ນລະຫວ່າງປະທານປະເທດສີ ຈິ້ນຜິງ ຢ້ຽມຢາມຝຣັ່ງ ຢ່າງເປັນທາງການ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນອັງຄານ ທີ 26 ມີນາ  ວ່າ ປະທານປະເທດສີ ຈິ້ນຜິງ ແລະ ປະທານາທິບໍດີເອັມມານູເອລ ມາຄຣົງ ຮ່ວມເປັນສັກຂີພິຍານໃນການລົງນາມຂໍ້ຕົກລົງ ລະຫວ່າງ ບໍລິສັດດ້ານເທັກໂນໂລຢີ ແລະ ອາກາດສະຍານຈີນ (CASC: China Aerospace Science and Technology Corporation) ເຊິ່ງເປັນສ່ວນໜຶ່ງຂອງສໍານັກງານການບິນແຫ່ງຊາດຈີນ ກັບ ບໍລິສັດແອຣ໌ບັສ ໃນການທີ່ ຊີເອເອັສຊີ ສັ່ງຊື້ຍົນໂດຍສານ ແອຣ໌ບັສ ເອ 320 ລວມ 290 ລໍາ ແລະ ເອ 350 ອີກ 10 ລໍາ ສໍາລັບໃຊ້ບໍລິການໃນສາຍການບິນຂອງຈີນ 13 ແຫ່ງ ໂດຍພິທີລົງນາມມີຂຶ້ນທີ່ປາແລເດີເລລີເຊ ເມື່ອວັນຈັນ ຜ່ານມາ ເຖິງວ່າທັງສອງຝ່າຍປະຕິເສດການເປີດເຜີຍມູນຄ່າຂອງຂໍ້ຕົກລົງດັ່ງກ່າວ ແຕ່ສື່ທ້ອງຖິ່ນຫຼາຍແຫ່ງ ລາຍງານວ່າ ມີມູນຄ່າສູງເຖິງ 30.000 ລ້ານເອີໂຣ (ປະມານ 291.000 ຕື້ກີບ) ແລະ ມູນຄ່ານີ້ເປັນລາຄາທີ່ແອຣ໌ບັສສະເໜີໃຫ້ແກ່ລັດຖະບານປັກກິ່ງ  “ເປັນກໍລະນີພິເສດ”.

ທັງນີ້ ລາຍການສັ່ງຊື້ດັ່ງກ່າວເປັນມູນຄ່າຫຼາຍກວ່າທີ່ສື່ຫຼາຍແຫ່ງເປີດເຜີຍກ່ອນໜ້ານີ້ ເຊິ່ງ ທ່ານມາຄຣົງ ກ່າວວ່າ ຂໍ້ຕົກລົງມູນຄ່າມະຫາສານດັ່ງກ່າວ ຈະເປັນພື້ນຖານໃນການປູທາງສູ່ການຂະຫຍາຍກອບຄວາມຮ່ວມມືໃນອີກຫຼາຍດ້ານ ລະຫວ່າງ ຈີນ ກັບ ຝຣັ່ງ ຕໍ່ໄປ. ນອກຈາກນີ້, ມີລາຍງານດ້ວຍວ່າຈີນຕົກລົງເພິ່ມການເປີດຕະຫຼາດໃຫ້ກັບໄກ່ສົດແຊ່ແຂງຈາກຝຣັ່ງອີກດ້ວຍ.

ສໍາລັບການຢ້ຽມຝຣັ່ງ ຂອງຜູ້ນໍາຈີນໃນຄັ້ງນີ້ ເປັນຈຸດໝາຍຕໍ່ຈາກການຢ້ຽມຢາມອິຕາລີ ເມື່ອທ້າຍອາທິດ ທີ່ຜ່ານມາ ເຊິ່ງລັດຖະບານໂຣມເປັນປະເທດຕາເວັນຕົກ ແລະ ສະມາຊິກຈາກກຸ່ມປະເທດອຸດສາຫະກໍາຊັ້ນນໍາຂະໜາດໃຫຍ່ 7 ແຫ່ງ “ຈີ 7” ແຫ່ງທໍາອິດທີ່ລົງນາມເປັນສະມາຊິກຂອງແຜນຫຸ້ນສ່ວນທາງຍຸດທະສາດ “ໜຶ່ງແຖບໜຶ່ງເສັ້ນທາງ” ຫຼື “ເສັ້ນທາງສາຍໄໝແຫ່ງສະຕະວັດທີ 21” ຂອງຈີນ ແລະ ໃນອາທິດນີ້ ຍັງຈະມີການປະຊຸມສົນທິສັນຍາຫຼາຍຝ່າຍ ລະຫວ່າງ ຈີນ ກັບ ເຢຍລະມັນ, ຝຣັ່ງ ແລະ ຄະນະກຳມາທິການເອີຣົບ (EC: European Commission) ເຊິ່ງເປັນຝ່າຍບໍລິຫານຂອງສະຫະພາບເອີຣົບ (EU: European Union) ທີ່ນະຄອນຫຼວງປາຣີສ ເຊິ່ງຄາດວ່າ ເປັນການເພື່ອກຽມຄວາມພ້ອມກ່ອນການປະຊຸມສຸດຍອດ ອີຢູ – ຈີນ ທີ່ນະຄອນຫຼວງບຣັສເຊລສ໌ ປະເທດເບລຢ້ຽມ ໃນເດືອນເມສາ ນີ້.

French President Emmanuel Macron, right, and Chinese President Xi Jinping share a toast during a state dinner at the Elysee Palace in Paris, France, Monday, March 25, 2019. Chinese President Xi Jinping is on a 3-day state visit in France where he is expected to sign a series of bilateral and economic deals on energy, the food industry, transport and other sectors. (Ludovic Marin/Pool Photo via AP)