ພາຍຸລະດູຮ້ອນ!! ໃນວັນທີ 28-31 ຈະມີຝົນຕົກ ຢູ່ທົ່ວທຸກພາກຂອງປະເທດລາວ

366

ໃນໄລຍະວັນທີ 28-31 ມີນາ 2019 ຄວາມກົດດັນສູງຂອງອາກາດເຢັນຈາກປະເທດຈີນຈະມີກຳລັງອ່ອນປົກຄຸມຢູ່ທົ່ວທຸກພາກຂອງປະເທດລາວ ສົມທົບກັບກະແສລົມຕາເວັນຕົກ-ຕາເວັນຕົກສ່ຽງໃຕ້ ພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ມີຝົນຕົກ ພ້ອມມີລົມພັດແຮງຢູ່ບາງທ້ອງຖິ່ນໃນແຕ່ລະພາກ. ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນ ໃຫ້ມີສະຕິຕໍ່ສະພາບອາກາດທີ່ຈະເກີດຂຶ້ນໃນໜຶ່ງອາທິດຕໍ່ໜ້າ ແລະ ໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.

ກົມອຸຕຸນິຍົມ ແລະ ອຸທົກກະສາດ ໄດ້ອອກບົດລາຍງານຄາດຄະເນສະພາບອາກາດ ສະບັບເລກທີ 0409 ລົງວັນທີ 25 ມີນາ 2019. ໃນໄລຍະ ໜຶ່ງອາທິດຕໍ່ໜ້າ ວັນທີ 25-31 ມີນາ 2019 ບໍລິເວນຄວາມກົດດັນຕໍ່າຂອງກາດຮ້ອນທີ່ມີກຳລັງອ່ອນ ຫາ ປານກາງ ຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດລາວ, ສົມທົບກັບກະແສລົມຕາເວັນຕົກ – ຕາເວັນຕົກສ່ຽງໃຕ້ພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ອາກາດໂດຍທົ່ວໄປ ຮ້ອນຂຶ້ນໃນຕອນບ່າຍໃນແຕ່ລະພາກ ແລະ ຈະມີຝົນຕົກໃນລະດັບຄ່ອຍ ແລະ ປານກາງ ພ້ອມມີລົມພັດແຮງຢູ່ບາງທ້ອງຖິ່ນໃນຕອນບ່າຍຫາຄໍ່າ ແຂວງພາກກາງ ຫາ ພາກໃຕ້.

ພາກເໜຶອດ້ານຕາເວັນອອກ: ໃນໄລຍະວັນທີ 25-27 ມີນາ 2019 ໂດຍທົ່ວໄປ ອາກາດເຢັນໃນຕອນກາງຄືນ ຫາ ຕອນເຊົ້າ ແລະ ໃນຕອນບ່າຍ ຫາ ຄໍ່າ ອາກາດຈະຮ້ອນຂຶ້ນ. ຈາກນັ້ນ ວັນທີ 28 -31 ມີນາ 2019 ຈະມີຝົນຕົກໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນແຂວງຜົ້ງສາລີ, ຫົວພັນ ແລະ ຊຽງຂວາງ. ອຸນຫະພູມຕໍ່າສຸດ 17-19 ອົງສາ ແລະ ສູງສຸດ 28-30 ອົງສາ.

ພາກເໜຶອດ້ານຕາເວັນຕົກ: ໃນໄລຍະວັນທີ 25-27 ມີນາ 2019 ອາກາດເຢັນໃນຕອນເຊົ້າພ້ອມມີໝອກບາງປົກຫຸ້ມໃນຕອນເຊົ້າ, ສ່ວນໃນຕອນບ່າຍອາກາດຈະຮ້ອນຂຶ້ນພ້ອມມີໝອກແຫ້ງປົກຫຸ້ມຢູ່ທົ່ວໄປ. ຈາກນັ້ນວັນທີ 28-31 ມີນາ 2019 ຈະມີຝົນຕົກ ໃນລະດັບຄ່ອຍ ແລະ ຕົກປານກາງເປັນບາງໂອກາດ. ອຸນຫະພູມຕໍ່າສຸດ 17-19 ອົງສາ ແລະ ສູງສຸດ 35-37 ອົງສາ.

ພາກກາງ: ໃນໄລຍະວັນທີ 25-27 ມີນາ 2019 ອາກາດຈະຮ້ອນຂຶ້ນໃນໄລຍະຕອນບ່າຍ. ຈາກນັ້ນວັນທີ 28-31 ມີນາ 2019 ອາກາດສືບຕໍ່ຮ້ອນໃນໄລຍະຕອນບ່າຍ ແລະ ຈະມີຝົນຕົກ ໃນລະດັບຄ່ອຍຢູ່ທົ່ວໄປ ແລະ ຕົກລະດັບປານກາງ ຢູ່ບາງທ້ອງຖິ່ນແຂວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ພ້ອມມີລົມພັດແຮງເປັນບາງໂອກາດ. ອຸນຫະພູມຕໍ່າສຸດ 22-24​ ອົງສາ ແລະ ສູງສຸດ 35-37 ອົງສາ.

ພາກໃຕ້: ໃນໄລຍະວັນທີ 25-27 ມີນາ 2019, ອາກາດຮ້ອນ ພ້ອມມີໝອກແຫ້ງປົກຫຸ້ມຢູ່ທົ່ວໄປໃນຕອນກາງເວັນ ແລະ ຈະມີຝົນຕົກ ພ້ອມມີລົມພັດແຮງຢູ່ບາງທ້ອງຖິ່ນ. ຈາກນັ້ນ ໃນວັນທີ 28-31 ມີນາ 2019 ອາກາດຍັງສືບຕໍ່ຮ້ອນ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນແຂວງ ສາລະວັນ ແລະ ຈຳປາສັກ, ເຊກອງ ແລະ ອັດຕະປື. ອຸນຫະພູມຕໍ່າສຸດ 22-24 ອົງສາ ແລະ ສູງສຸດ 36-38 ອົງສາ.

Credit: ກົມອຸຕຸນິຍົມ ແລະ ອຸທົກກະສາດ