ຈຳນວນຜູ້ເສຍຊີວິດເພິ່ມເປັນ 78 ຄົນ ຈາກເຫດໂຮງງານເຄມີລະເບີດຢູ່ປະເທດຈີນ

243

ຈຳນວນຜູ້ເສຍຊີວິດຈາກໂຮງງານຜະລິດວັດຖຸດິບເຄມີໄດ້ລະເບີດ ແລະ ມີໄຟໄໝ້ ທາງພາກຕາເວັນອອກຂອງຈີນ ເພິ່ມຂຶ້ນເປັນ 78 ຄົນ ເມື່ອວັນຈັນ ແລະ ຜູ້ທີ່ໄດ້ຮັບບາດເຈັບຍັງຮັບການຮັກສາຢູ່ໂຮງໝໍອີກກວ່າ 500 ຄົນ.

ສໍານັກຂ່າວເອເອັຟພີ ລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນທີ 25 ມີນາ ວ່າ ເຫດລະເບີດເມື່ອວັນທີ 21 ມີນາ ຜ່ານມາ ທີ່ໂຮງງານສານເຄມີ “ຖຽນເຈ່ຍຢີ່ ເຄມີຄອລ” ໃນນິຄົມອຸດສາຫະກໍາເມືອງຫຍານເສິງ ມົນທົນຈຽງຊູ ເຮັດໃຫ້ອາຄານໂຮງງານຫັກເພເປັນພື້ນທີ່ກວ້າງ ແລະ ສ້າງຄວາມເສຍຫາຍແກ່ອາຄານອີກຫຼາຍຫຼັງທີ່ຢູ່ອ້ອມຮອບ ເຈົ້າໜ້າທີ່ເມືອງຫຍານເສິງ ເຜີຍວ່າ ປະຊາຊົນ ກວ່າ 500 ຄົນ ຍັງຮັບການຮັກສາຢູ່ທີ່ໂຮງໝໍຫຼາຍແຫ່ງ ໂດຍ 13 ຄົນ ໃນຈໍານວນນີ້ ອາການຂັ້ນໂຄມ່າ ແລະ 66 ຄົນອາການສາຫັດ.

ປະຊາຊົນ 28 ຄົນ ທີ່ມີລາຍງານເມື່ອວັນເສົາວ່າໄດ້ສູນຫາຍ ພົບວ່າເສຍຊີວິດແລ້ວ 25 ຄົນ ສ່ວນອີກ 3 ຄົນ ໄດ້ຮັບການຊ່ວຍເຫຼືອລອດຊີວິດມາໄດ້ ເຫດການລະເບີດຄັ້ງນີ້ ອາຄານບ້ານເຮືອນປະມານ 89 ຫຼັງໄດ້ຮັບຄວາມເສຍຫາຍໜັກຈົນບໍ່ສາມາດປັບປຸງໄດ້ ຂະນະທີ່ໂຮງຮຽນ 11 ແຫ່ງ ທີ່ຢູ່ໃກ້ຄຽງທີ່ໄດ້ຮັບຄວາມເສຍຫາຍ ແລະ ໄດ້ປິດການສອນ ແຕ່ບາງສ່ວນກໍ່ກັບມາເປີດການສອນອີກຄັ້ງເມື່ອເຊົ້າວັນຈັນ ຜ່ານມາ.

ເຈົ້າໜ້າທີ່ເຜີຍອີກວ່າ ໂຮງງານເຄມີຖຽນເຈ່ຍຢີ່ ກໍ່ຕັ້ງເມື່ອປີ 2002 ຫຼ້າສຸດມີພະນັກງານ ລວມ 195 ຄົນ ຜະລິດວັດຖຸດິບເຄມີເປັນຫຼັກ ລວມເຖິງ ແອນນິໂຊລ ເຊິ່ງເປັນສານໄວໄຟສູງ.