ລັດແຈ້ງການ! ວັນທີ 17 ເມສາ ເປັນມື້ພັກຊົດເຊີຍປີໃໝ່ລາວ 2019

585

ຫຍັງຈໍ່ມໍ່ເຂົ້າມານັບມື້ແລ້ວ ສຳລັບເທດສະການບຸນຫົດນໍ້າ ຫຼື ບຸນປີໃໝ່ລາວ ປະຈຳປີ ພສ 2562 ເຊິ່ງປີນີ້ແມ່ນວັນທີ  14, 15, ແລະ 16 ເມສາ 2019 (ກົງກັບວັນອາທິດ, ວັນຈັນ ແລະ ວັນອັງຄານ) ຍ້ອນວັນທີ 14 ຖືກກັບອາທິດ ດັ່ງນັ້ນ, ລັດຖະບານຈຶ່ງກຳນົດເອົາວັນທີ 17 ເມສາ ເປັນວັນພັກຊົດເຊີຍປີໃໝ່ລາວ 2019 ຢ່າງເປັນທາງການ.

ຫ້ອງວ່າການສໍານັກງານນາຍົກລັດຖະມົນຕີ ໄດ້ອອກແຈ້ງການເລກທີ 506/ຫສນຍ ລົງວັນທີ 22 ມີນາ 2019 ກ່ຽວກັບ ການຈັດຕັ້ງສະເຫຼີມສະຫຼອງວັນບຸນປີໃໝ່ລາວ ພສ 2562.

ເຊິ່ງໃນແຈ້ງການລະບຸໄວ້ວ່າ: ຫ້ອງວ່າການສໍານັກງານນາຍົກລັດຖະມົນຕີ ຂໍຖືເປັນກຽດແຈ້ງການຕົກລົງ  ແລະ ຊີ້ນໍາຂອງທ່ານ ນາຍົກລັດຖະມົນຕີ ມາຍັງບັນດາທ່ານ ລັດຖະມົນຕີ,   ຫົວໜ້າອົງການທຽບເທົ່າກະຊວງ, ທ່ານເຈົ້າຄອງນະຄອນຫຼວງວຽງຈັນ, ບັນດາທ່ານເຈົ້າແຂວງ, ຫົວໜ້າອົງການຈັດຕັ້ງພັກ, ບັນດາອົງການຈັດຕັ້ງມະຫາຊົນ ຂັ້ນສູນກາງຕະຫຼອດຮອດ ພະນັກງານ-ລັດຖະກອນ, ຖະຫານ, ຕໍາຫຼວດ ແລະ ປະຊາຊົນບັນດາເຜົ່າໃນຂອບເຂດທົວປະເທດດັ່ງນີ້:

1 ການສະເຫຼີມສະຫຼອງ ບຸນປີໃໝ່ລາວປະຈໍາປີ ພສ 2562 ເປັນປີທີ່ມີຄວາມໝາຍສໍາຄັນ ເຊິ່ງເປັນປີທີ່ທົ່ວພັກ -ທົ່ວປວງຊົນລາວ ສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມ ໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ ປະຈໍາປີ 2019 ໃຫ້ໄດ້ຮັບໝາກຜົນເປັນຈິງ

2 ໃຫ້ຖືເອົາການສະເຫຼີມສະຫຼອງວັນບຸນປີໃໝ່ລາວ ປະຈໍາປີ ພສ 2562 ທີ່ຈະໝູນວຽນມາເຖິງນີ້ ເປັນໂອກາດໜຶ່ງທີ່ສໍາຄັນ ໃນການສືບຕໍ່ຂະຫຍາຍມູນເຊື້ອ ຮີດຄອງປະເພນີອັນດີງາມ ແລະ ຄວາມເປັນສາມັກຄີເປັນປືກແຜ່ນຂອງຊາດ ທີ່ມີມາແຕ່ດົນນານ  ເປັນບຸນໃຫຍ່ປະຈໍາຊາດ  ທີ່ປວງຊົນລາວທັງຊາດ  ຖືເອົາໂອກາດນີ້ອ່ວຍພອນໄຊເຊິ່ງກັນ ແລະ ກັນ, ຈັດຕັ້ງສະເຫຼີມສະຫຼອງດ້ວຍບັນຍາກາດ ເບີກບານມ່ວນຊື່ນ, ຖືກຕ້ອງຕາມຮີດຄອງປະເພນີ  ແລະ ວັດຖະນະທໍາອັນດີງາມຂອງຊາດ  ຕິດພັນກັບການສົ່ງເສີມການທ່ອງທ່ຽວ  ແລະ ບົນຈິດໃຈປະຢັດມັດທະຍັດ

3 ເນື່ອງຈາກວັນປີໃໝ່ລາວປີນີ້ ແມ່ນວັນທີ 14, 15, ແລະ 16 ເມສາ 2019 (ກົງກັບວັນອາທິດ, ວັນຈັນ ແລະ ວັນອັງຄານ) ຍ້ອນວ່າ ວັນທີ 14 ເມສາ ເປັນວັນອາທິດ ເຊິ່ງເປັນມື້ພັກທາງລັດຖະການ. ສະນັ້ນ, ຈຶ່ງຕົກລົງເຫັນດີ ກໍານົດເອົາວັນທີ 17 ເມສາ 2019 (ກົງກັບວັນພຸດ) ເປັນມື້ພັກຊົດເຊີຍ.

4 ມອບໃຫ້ກະຊວງອຸດສາຫະກໍາ ແລະ ການຄ້າ, ກະຊວງກະສິກໍາ ແລະ ປ່າໄມ້, ນະຄອນຫຼວງວຽງຈັນ ແລະ ບັນດາແຂວງ ໃນຂອບເຂດທົ່ວປະເທດເອົາໃຈໃສ່ ຊີ້ນໍາການຜະລິດສະບຽງອາຫານ, ການສະໜອງເຄື່ອງອຸປະໂພກ – ບໍລິໂພກ ໃຫ້ພຽງພໍກັບຄວາມຕ້ອງການຂອງສັງຄົມ , ລວມທັງການຕິດຕາມ, ກວດກາ  ແລະ ຄຸ້ມຄອງລາຄາສິນຄ້າໃນທ້ອງຕະຫຼາດ ເພື່ອບໍ່ໃຫ້ມີການສວຍໂອກາດ ຂຶ້ນລາຄາສິນຄ້າ ແລະ ສະບຽງອາຫານໂດຍບໍ່ມີເຫດຜົນ.

5 ໃຫ້ບັນດາກະຊວງ ອົງການຈັດຕັ້ງທຽບເທົ່າກະຊວງ ແລະ ທ້ອງຖິ່ນໃນຂອບເຂດທົ່ວປະເທດ ເອົາໃຈໃສ່ຊີ້ນໍາການຮັກສາຄວາມປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ  ໂດຍໃຫ້ມີການແບ່ງຄວາມຮັບຜິດຊອບ ໃນການຕິດຕາມ, ກວດກາເວນຍາມ ແລະ ປະຈໍາການຄັກແນ່ ເພື່ອປ້ອງການສໍານັກງານອົງການ ຕະຫຼອດໄລຍະຫຼິ້ນບຸນປີໃໝ່ລາວ ແລະ ໃຫ້ສາມາດປະສານໄດ້ຢ່າງປົກະຕິ.

6 ໃຫ້ກະຊວງປ້ອງກັນຄວາມສະຫງົບ ສົມທົບກັບກະຊວງໂຍທາທິການ ແລະ ຂົນສົ່ງ, ກະຊວງຖະແຫຼງຂ່າວວັດຖະນະທໍາ ແລະ ທ່ອງທ່ຽວ ແລະ ທ້ອງຖິ່ນ ຈັດສັນ ແລະ ອໍານວຍຄວາສະດວກ ໃນການສັນຈອນໄປ – ມາ ໃຫ້ມີຄວາມປອດໄພ ແລະ ໃຫ້ເພີ່ມທະວີການໂຄສະນາ  ເພື່ອສ້າງຈິດສໍານຶກໃຫ້ພົນລະເມືອງທົ່ວສັງຄົມເຄົາລົບກົດລະບຽບຈາລະຈອນ ເພື່ອປ້ອງກັນການເກີດອຸບັດຕິເຫດ.

7 ມອບໃຫ້ກະຊວງຖະແຫຼ່ງຂ່າວ ວັດຖະນະທໍາ ແລະ ທ່ອງທ່ຽວ, ນະຄອນຫຼວງວຽງຈັນ, ບັນດາແຂວງ ໃນຂອບເຂດທົ່ວປະເທດ ເພີ່ມທະວີໂຄສະນາປະຊາສໍາພັນໃຫ້ປະຊາຊົນໃນສັງຄົມໄດ້ຮັບຮູ້ ແລະ ເຂົ້າໃຈກ່ຽວກັບການສະເຫຼີມສະຫຼອງບຸນປີໃໝ່ປະຈໍາຊາດ ໃຫ້ຖືກຕ້ອງ ແລະ ສອດຄ່ອງກັບວັດຖະນະທໍາ ຮີດຄອງປະເພນີອັນດີງາມຂອງຊາດ ເພື່ອດຶງດູດການທ່ອງທ່ຽວ ໂດຍສະເພາະແມ່ນສົ່ງເສີມປີທ່ອງທ່ຽວລາວ – ຈີນປີ 2019 ໃຫ້ໄດ້ຮັບຜົນດີ.