ອາກອນ ນວ ສືບຕໍ່ເປີດຂະບວນການເສຍຄ່າທໍານຽມທາງ ແລະ ພາສີທີ່ດິນ

323

ສ່ວຍສາອາກອນ ປະຈຳນະຄອນຫຼວງວຽງຈັນ ( ນວ ) ຮ່ວມກັບທະນາຄານການຄ້າຕ່າງປະເທດລາວ ມະຫາຊົນ ( ທຄຕລ ) ແລະ ຫ້ອງວ່າການກະຊວງປ້ອງກັນປະເທດ ໄດ້ເປີດຂະບວນການເສຍຄ່າທໍານຽມທາງ ແລະ ພາສີທີ່ດິນຜ່ານລະບົບທະນາຄານ ປະຈຳປີ 2019 ໂດຍກຳນົດຫາກກາຍເດືອນນີ້ຈະປັບໃໝ 0,1% ກາຍປີຈະປັບໃໝ່ 20%.

ວັນທີ 22 ມີນາຜ່ານມາ ໄດ້ມີພິທີເປີດຂະບວນການເສຍຄ່າທໍານຽມທາງ ແລະ ພາສີທີ່ດິນຢູ່ກະຊວງປ້ອງກັນປະເທດ ໂດຍການເຂົ້າຮ່ວມຂອງ ທ່ານ ພົນຈັດຕະວາ   ຄໍາມວນ ເລືອງວັນຫຼ້າ ຮອງຫົວໜ້າຫ້ອງວ່າການກະຊວງປ້ອງກັນປະເທດ, ມີ ທ່ານສົມພອນ ພິມມະສອນ ຮອງຫົວໜ້າສ່ວຍສາອາກອນ ນວ, ມີຜູ້ຕາງໜ້າ ທຄຕລ, ບັນດານາຍ ແລະ ພົນທະຫານອ້ອມຂ້າງກະຊວງປ້ອງກັນປະເທດເຂົ້າຮ່ວມ.

ໂອກາດນີ້, ທ່ານ ພົນຈັດຕະວາ ຄໍາມວນ ເລືອງວັນຫຼ້າ ໄດ້ມີຄຳເຫັນ ວ່າ: ການເປີດຂະບວນການເສຍຄ່າທໍານຽມທາງ ແລະ ພາສີທີ່ດິນເພື່ອເປັນການຊຸກຍູ້ປຸກລະດົມນາຍ ແລະ ພົນທະຫານ, ບັນດາພະແນກການອ້ອມຂ້າງກະຊວງປ້ອງກັນປະເທດທີ່ນໍາໃຊ້ລົດລັດ, ລົດສ່ວນຕົວ ແລະ ທີ່ດິນທີ່ຕົນຄອບຄອງສິດນຳໃຊ້ໄດ້ມາປະຕິບັດພັນທະຂອງຕົນຢ່າງຄົບຖ້ວນ. ພ້ອມດຽວກັນນີ້, ຍັງເປັນການປຸກລະດົມ, ຊຸກຍູ້, ອຳນວຍຄວາມສະດວກໃຫ້ແກ່ອົງການຈັດຕັ້ງພັກ – ລັດ, ພະນັກງານ – ລັດຖະກອນ, ບັນດານາຍ ແລະ ພົນທະຫານ ໄດ້ມາເສຍຄ່າທຳນຽມທາງ ແລະ ພາສີທີ່ດິນໃຫ້ເປັນຂະບວນຟົດຟື້ນ, ທີ່ສໍາຄັນເປັນແບບຢ່າງນໍາໜ້າ, ສະແດງເຖິງສະຕິຕື່ນຕົວ, ຄວາມສະໝັກໃຈ, ປະກອບສ່ວນພັນທະເຂົ້າງົບປະມານແຫ່ງລັດ.

ຂະບວນການເສຍຄ່າທຳນຽມທາງ ແລະ ພາສີທີ່ດິນຜ່ານລະບົບທະນາຄານ ປະຈຳປີ 2019 ໃນໄລຍະຜ່ານມາ ໄດ້ຈັດມາແລ້ວ 4 ຄັ້ງ, ຄັ້ງທີ 1 ຈັດຢູ່ຫ້ອງວ່າການສຳນັກງານປົກຄອງ ນວ; ຄັ້ງທີ 2 ຈັດຢູ່ສຳນັກງານປົກຄອງເມືອງໄຊທານີ; ຄັ້ງທີ 3 ຢູ່ສໍານັກງານປົກຄອງເມືອງສີສັດຕະນາກ; ຄັ້ງທີ 4 ຢູ່ກະຊວງການເງິນ ແລະ ຄັ້ງທີ 5 ຢູ່ກະຊວງປ້ອງກັນປະເທດ ແລະ ຈະສືບຕໍ່ຈັດຢູ່ສໍານັກງານປົກຄອງເມືອງໄຊເສດຖາ, ເມືອງຈັນທະບູລີ, ສີໂຄດຕະບອງ, ກົມໃຫຍ່ພະລາທິການກອງທັບ ( ຫຼັກ 5 ) ກະຊວງປ້ອງກັນປະເທດ ນຳອີກດ້ວຍ.

ສ່ວນກໍານົດເວລາໃນການຈັດຕັ້ງປະຕິບັດການເກັບຄ່າທໍານຽມທາງ ປະຈຳປີ 2019 ເລີ່ມແຕ່ວັນທີ 1 ມັງກອນ 2019 ຫາ ວັນທີ 31 ມີນາ 2019, ຖ້າກາຍກໍານົດດັ່ງກ່າວຈະຖືກປັບໃໝວັນລະ 0,1%, ຖ້າປີ 2018 ບໍ່ຈ່າຍຈະຖືກປັບໃໝ 40%, ຖ້າປີ 2017 ບໍ່ຈ່າຍຈະຖືກປັບໃໝ 60%, ສ່ວນກໍານົດການເສຍພາສີທີ່ດິນແມ່ນປະຕິບັດຕາມແຜນງົບປະມານຂອງແຕ່ລະປີ ( 1 ມັງກອນ – 31 ທັນວາຂອງແຕ່ລະປີ ) ຖ້າກາຍປີແມ່ນຈະໄດ້ມີການປັບໃໝໃນມູນຄ່າ 20% ຂອງມູນຄ່າການເສຍ.

credit: laoedaily
[ ຮູບ – ຂ່າວ: ກະຊວງການເງິນ ]