ຫຼວງພະບາງ ແຈ້ງຫ້າມຂຶ້ນລາຄາສິນຄ້າ ແລະ ຄ່າບໍລິການ

343

ໃນໄລຍະເທດສະການຕ່າງໆ ໂດຍສະເພາະໃນໄລຍະບຸນປີໃໝ່ລາວ ໃນແຕ່ລະປີຈະມີການສວຍໂອກາດຂຶ້ນລາຄາສິນຄ້າ ແລະ ຄ່າບໍລິການຕ່າງໆຢູ່ເປັນປະຈຳ ຈົນເກີດມີການສຽງພາກວິຈານເປັນວົງກວ້າງ ປີນີ້ກໍເຊັ່ນດຽວກັນບຸນປີໃໝ່ລາວ ພ.ສ 2562 ໃກ້ຈະມາເຖິງໃນອີກບໍ່ເທົ່າໃດອາທິດຂ້າງໜ້ານີ້ ພະແນກອຸດສາຫະກຳ ແລະ ການຄ້າ ໃນຂອບເຂດທົ່ວປະເທດເລີ່ມທະຍອຍອອກແຈ້ງການເພື່ອບໍ່ໃຫ້ຜູ້ປະກອບການໃນທຸກຂະແໜງການສວຍໂອກາດຂຶ້ນລາຄາໂດຍພະລະການ.

ໃນອາທິດຜ່ານມາ ພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ກໍໄດ້ອອກແຈ້ງການ ສະບັບເລກທີ 041/ອຄ.ນຫຼບ ລົງວັນທີ 18 ມີນາ 2019 ການກຳນົດລາຄາສິນຄ້າ, ຫ້າງຮ້ານ ແລະ ພໍ່ແມ່ປະຊາຊົນໃນທົ່ວນະຄອນຫຼວງພະບາງ.

ໂດຍໄດ້ແຈ້ງເຖິງອຳນາດການປົກຄອງບ້ານ, ບໍລິສັດ, ນັກທຸລະກິດ, ເຮືອນພັກ, ໂຮງແຮມ, ຣີສອດ, ຮ້ານກິນດື່ມ – ຮ້ານອາຫານ, ຫ້າງຮ້ານ, ຜູ້ຮັບຜິດຊອບສະຖານທີ່ທ່ອງທ່ຽວຕ່າງໆ, ພະນັກງານ, ທະຫານ – ຕຳຫຼວດ ແລະ ປະຊາຊົນບັນດາເຜົ່າໃນທົ່ວນະຄອນຫຼວງພະບາງ ຊາບທົ່ວເຖິງກັນ ວ່າ: ຜູ້ປະກອບການ ຫຼື ຜູ້ສະໜອງສິນຄ້າ ແລະ ຜູ້ໃຫ້ບໍລິການດ້ານຕ່າງໆຕ້ອງວາງລາຄາສິນຄ້າ ແລະ ຄ່າບໍລິການ ບໍ່ໃຫ້ມີການເອົາລັດເອົາປຽບໂດຍບໍ່ເໝາະສົມ ຫຼື ບໍ່ເປັນທຳຕໍ່ສັງຄົມ ໃຫ້ພາກສ່ວນທີ່ກ່ຽວຂ້ອງ ຫຼື ພາກສ່ວນລຸ່ມນີ້ກຳນົດ ແລະ ຊ່ວຍຄຸ້ມຄອງການກຳນົດລາຄາສິນຄ້າ ແລະ ຄ່າບໍລິການຢ່າງສົມເຫດສົມຜົນ.

  1. ເຮືອນພັກ, ຣີສອດ ແລະ ໂຮງແຮມຕ່າງໆໃຫ້ກຳນົດລາຄາຫ້ອງພັກ ແລະ ບໍລິການເສີມຕ່າງໆກັບທຸລະກິດທີ່ກ່ຽວພັນ.
  2. ບັນດາຮ້ານອາຫານ – ຮ້ານກິນດື່ມ, ສະຖານທີ່ທ່ອງທ່ຽວຕ່າງໆ.
  3. ການບໍລິການຄ່າລົດໂດຍສານ, ລົດໃຫ້ເຊົ່າ ແລະ ຝາກລົດຕ່າງໆ.
  4. ພາກລັດ ຫຼື ຜູ້ສຳປະທານຄ່າເຂົ້າຊົມສະຖານທີ່ແຫຼ່ງທ່ອງທ່ຽວດ້ານວັດທະນະທຳ – ທຳມະຊາດ ແລະ ການຄຸ້ມຄອງຄ່າບໍລິການອື່ນໆທີ່ຕິດພັນກັບການທ່ອງທ່ຽວ.
  5. ທຸກໆພາກສ່ວນໃນການຈັບຈ່າຍຊື້ສິນຄ້າ ແລະ ຄ່າບໍລິການ, ການຊຳລະສິນຄ້າ, ຄ່າບໍລິການ, ຕ້ອງຕິດລາຄາ, ໂຄສະນາຕ້ອງເປັນເງິນກີບ.
  6. ຫ້າມບໍ່ໃຫ້ຂຶ້ນລາຄາສິນຄ້າ ແລະ ຄ່າບໍລິການ ທີ່ຂະແໜງການກ່ຽວຂ້ອງກຳນົດໄວ້ ບໍ່ວ່າຈະນອນຢູ່ໃນລາຍການຄວບຄຸມລາຄາ ຫຼື ບໍ່ກໍຕາມ.