ອິຕາລີ-ຈີນ ລົງນາມຮ່ວມສ້າງເສັ້ນທາງສາຍໄຫມໃໝ່ ຢ່າງເປັນທາງການ

252

ລັດຖະບານອິຕາລີສ້າງປະວັດສາດເປັນສະມາຊິກກຸ່ມ ຈີ 7 ປະເທດທໍາອິດທີ່ເຂົ້າຮ່ວມເປັນຫຸ້ນສ່ວນຂອງແຜນຫຸ້ນສ່ວນທາງຍຸດທະສາດ “ໜຶ່ງແຖບໜຶ່ງເສັ້ນທາງ” ຫຼື “ເສັ້ນທາງສາຍໄຫມແຫ່ງສະຕະວັດທີ 21” ກັບຈີນ.

ສໍານັກຂ່າວຕ່າງປະເທດລາຍງານຈາກນະຄອນຫຼວງໂຣມ ປະເທດອິຕາລີ ເມື່ອວັນອາທິດ ທີ 24 ມີນາ ວ່າ ປະທານປະເທດສີ ຈິ້ນຜິງ ແລະ ນາຍົກລັດຖະມົນຕີຈູເຊບເປ ກອນເຕ ຮ່ວມກັນເປັນສັກຂີພິຍານໃນພິທີລົງນາມຂອງ “ຂໍ້ຕົກະລົງບໍ່ມີຜົນຜູກພັນ” ລວມທັງໝົດ 29 ສະບັບ ທີ່ເຮືອນຮັບຮອງວິລລາ ມາດາມາ ທາງຕາເວັນຕົກຂອງນະຄອນຫຼວງໂຣມ ເມື່ອວັນເສົາ ເຖິງວ່າລັດຖະບານຂອງທັງສອງປະເທດຍັງບໍ່ເປີດເຜີຍລາຍລະອຽດຂອງຂໍ້ຕົກະລົງອອກມາຢ່າງເປັນທາງການ ແຕ່ສື່ທ້ອງຖິ່ນຫຼາຍແຫ່ງຂອງອິຕາລີລາຍງານວ່າມູນຄ່າທັງໝົດຂອງຂໍ້ຕົກລົງນັ້ນ ຢູ່ລະຫວ່າງ 5.000 ເຖິງ 7.000 ລ້ານເອີໂຣ (ປະມານ 48.500 ຕື້ກີບ – 68.000 ຕື້ກີບ) ໂດຍສ່ວນຫຼາຍແມ່ນເນັ້ນການຮ່ວມລົງທຶນໃນໂຄງການພັດທະນາລະບົບໂຄງສ້າງພື້ນຖານ ແລະ ສາທາລະນູປະໂພກ ແຕ່ໃນເບື້ອງຕົ້ນຈະຍັງມີຂໍ້ຈໍາກັດການເພິ່ມການມີສ່ວນຮ່ວມໃນການພັດທະນາພາກກະເສດເຊັ່ນ ສວນໝາກກ້ຽງ ແລະ ການສົ່ງເສີມການທ່ອງທ່ຽວ.

ທັງນີ້, ການລົງນາມໃນຂໍ້ຕົກະລົງດັ່ງກ່າວ ສົ່ງຜົນໃຫ້ອິຕາລີຖືເປັນປະເທດຕາເວັນຕົກແຫ່ງທໍາອິດ ແລະ ສ້າງປະວັດສາດເປັນປະເທດທໍາອິດຈາກກຸ່ມປະເທດອຸດສາຫະກໍາຊັ້ນນໍາຂະໜາດໃຫຍ່ 7 ແຫ່ງ “ຈີ 7”  ເຊິ່ງລົງນາມເປັນສະມາຊິກຂອງແຜນຫຸ້ນສ່ວນທາງຍຸດທະສາດ “ໜຶ່ງແຖບໜຶ່ງເສັ້ນທາງ” ຫຼື “ເສັ້ນທາງສາຍໄໝແຫ່ງສະຕະວັດທີ 21” ຂະນະທີ່ຜູ້ນໍາຈີນຢໍ້າວ່າ ລັດຖະບານປັກກິ່ງມຸ່ງເນັ້ນເສີມສ້າງຄວາມສໍາພັນ ແລະ ຍົກລະດັບຄວາມຮ່ວມມືທາງການຄ້າກັບອິຕາລີ ໃນຮູບແບບຂອງການແລກປ່ຽນເຊິ່ງກັນ ແລະ ກັນ “ບໍ່ແມ່ນການຄ້າຂາຍປະຕູດຽວ” ພ້ອມທັງຢືນຢັນວ່າຂໍ້ຕົກະລົງທີ່ລົງນາມຮ່ວມກັບອິຕາລີ “ມີຄວາມຍຸດຕິທໍາ ແລະ ຮັກສາສົມດຸນທາງການຄ້າ” ລະຫວ່າງທັງສອງປະເທດ.

ຢ່າງໃດກໍ່ຕາມ ການພັດທະນາຄວາມຮ່ວມມືລະຫວ່າງ ຈີນ ກັບ ອິຕາລີ ຕາມແຜນໜຶ່ງແຖບໜຶ່ງເສັ້ນທາງ ຍັງບໍ່ຈົບພຽງເທົ່ານີ້ ໂດຍທ່ານກອນເຕ ມີກໍານົດຢ້ຽມຢາມນະຄອນຫຼວງປັກກິ່ງຢ່າງເປັນທາງການ ລະຫວ່າງວັນທີ 26-27 ເມສາ ນີ້ ເພື່ອຫາລືຕໍ່ຍອດ ໂດຍເນັ້ນເລື່ອງເສດຖະກິດເປັນສິ່ງສໍາຄັນ. ອີກປະການໜຶ່ງ ມູນຄ່າການຄ້າລະດັບທະວິພາຄີ ເມື່ອປີຜ່ານມາ ປະກົດວ່າ ອິຕາລີຍັງເປັນຝ່າຍຂາດດຸນຕໍ່ຈີນຢູ່ 17.600 ລ້ານເອີໂຣ (ກວ່າ 170.000 ຕື້ກີບ) ແຕ່ລັດຖະບານໂຣມຫວັງເປັນຢ່າງຍິ່ງ ວ່າ ການຕັດສິນໃຈເຂົ້າຮ່ວມເປັນຫຸ້ນສ່ວນຍຸດທະສາດການຄ້າກັບຈີນໃນຄັ້ງນີ້ ຈະຊ່ວຍຫຼຸດສ່ວນຕ່າງການເສຍປຽບທາງການຄ້າໄດ້ແດ່.