ນັກວິທະຍາສາດຈີນ ພັດທະນາ ‘ກອງທັບຫຸ່ນຍົນນາໂນ’ ນ້ອຍກວ່າເສັ້ນຜົມ 40 ເທົ່າ ແລ່ນໃນເສັ້ນເລືອດຝອຍໄດ້

320

ນັກວິທະຍາສາດຊາວຈີນ ໄດ້ພັດທະນາລະບົບຫຸ່ນຍົນ ເຊິ່ງໄດ້ຮັບແຮງບັນດານໃຈມາຈາກຝູງມົດທີ່ສາມາດເຮັດພາລະກິດອັນຊັບຊ້ອນໄດ້ຫຼາຍຢ່າງເຊັ່ນການເຄື່ອນຍ້າຍອາຫານຂະໜາດໃຫຍ່ກວ່າໂຕມັນເອງ.

ຜົນການສຶກສາທີ່ຕີພິມໃນວາລະສານວິທະຍາສາດ Science Robotics ເມື່ອວັນພຸດ ທີ 20 ຜ່ານມາ ມີເນື້ອໃນເວົ້າເຖິງກອງທັບຫຸ່ນຍົນນາໂນທີ່ມີສັກກະຍະພາບທາງດ້ານການວິເຄາະ ແລະ ການຮັກສາໃນລະດັບເຊລ ຫຼື ແມ້ແຕ່ໃນລະດັບໂມເລກຸນ.

ສາສະດາຈານ Xie Hui ຈາກສະຖາບັນເທັກໂນໂລຢີຮາຣ໌ບິນ ຜູ້ນຳທີມວິໄຈ ໄດ້ກ່າວກັບສຳນັກຂ່າວຊິນຫົວ ວ່າ ຫຸ່ນຍົນໂຕໜຶ່ງມີຂະໜາດຜ່າສູນກາງ 2 ໄມໂຄຣແມັດ ເຊິ່ງນ້ອຍກວ່າເສັ້ນຜົມ 40 ເທົ່າ ເຮັດໃຫ້ມັນສາມາດແລ່ນໄປ-ມາຢູ່ໃນຫຼອດເສັ້ນເລືອດຝອຍໄດ້ສະບາຍ.

ໄມໂຄຣໂຣບອດ ຮູບຊົງໝາກຖົ່ວດິນ ສາມາດສາກພະລັງງານໄດ້ດ້ວຍສະໜາມແມ່ເຫຼັກໄຟຟ້າກະແສສະຫຼັບ ພວກມັນມີຄວາມຍືດຫຍຸ່ນສູງໃນການເຮັດພາລະກິດຫຼາຍໆຢ່າງຮ່ວມກັນ ໃນສະພາບແວດລ້ອມທີ່ມີພື້ນທີ່ຈໍາກັດ.

ເມື່ອປັບຈູນຄື້ນຄວາມຖີ່ຂອງສະໜາມແມ່ເຫຼັກ ແລະ ຄວາມເປັນຂົ້ວປະຈຸ ໃນພື້ນທີ່ສາມມິຕິ ຈະເຮັດໃຫ້ນັກວິໄຈສາມາດຄວບຄຸມໄດ້ດີ ວ່ອງໄວ ແລະ ສາມາດປ່ຽນສະພາບກັບໄປກັບມາໄດ້.

ການຕໍ່ຕົວຕິດກັນທີ່ເກີດຂຶ້ນນັ້ນຈະມີທັງຂອງແຫຼວ, ຕ່ອງໂສ້, ການໝູນວົນ (Vortex) ພວກມັນສາມາດສ້າງເສັ້ນທາງແຄບໆ ຫຼື ຊ່ອງທາງເພື່ອການຂົນສົ່ງສິ່ງທີ່ໜັກເກີນຄວາມສາມາດຂອງຂອງຫຸ່ນຍົນໂຕດຽວ.

ສາສະດາຈານ Xie ກ່າວວ່າ ໃນອະນາຄົດຝູງຫຸ່ນຍົນອາດຖືກນໍາມາໃຊ້ເພື່ອລະບຸ ແລະ ທຳລາຍເຊລທີ່ມີພະຍາດ ຫຼື ການອາໄສຢູ່ໃນຮ່າງກາຍຂອງຄົນເພື່ອເຮັດໜ້າທີ່ກວດສຸຂະພາບ ເຊິ່ງເປັນເຄື່ອງມືໃໝ່ສໍາລັບການກວດໂຣກ ແລະ ການຮັກສາໃນໄລຍະທໍາອິດ.