14 ລາຍການສິນຄ້າກຽມຮັບກາໝາຍໂອດ໊ອບ

297

ພະແນກອຸດສາຫະກຳ ແລະ ການຄ້າ ແຂວງຊຽງຂວາງ ເປີດກອງປະຊຸມປຶກສາຫາລືຄັດເລືອກສິນຄ້າ ໜຶ່ງເມືອງໜຶ່ງຜະລິດຕະພັນ ( ODOP ) ເຊິ່ງສາມາດເລືອກໄດ້ຜະລິດຕະພັນທີ່ມີທ່າແຮງກຽມສະເໜີຕິດກາໝາຍໂອດ໊ອບ 14 ລາຍການ.

ໃນວັນທີ 20 ມີນາ 2019 ຜ່ານມາທີ່ຫ້ອງປະຊຸມພະແນກອຸດສາຫະກຳ ແລະ ການຄ້າ ແຂວງຊຽງຂວາງ ໄດ້ຈັດກອງປະຊຸມປຶກສາຫາລືຄັດເລືອກສິນຄ້າ ໜຶ່ງເມືອງໜຶ່ງຜະລິດຕະພັນ ( ODOP ) ແຫ່ງຊາດຂຶ້ນ ໂດຍເປັນປະທານຂອງ ທ່ານ ທອງສະຫວັດ ມັງໜໍ່ເມກ ຫົວໜ້າພະແນກອຸດສາຫະກໍາ ແລະ ການຄ້າ ແຂວງຊຽງ ຂວາງ, ມີເຈົ້າເມືອງ – ຮອງເຈົ້າເມືອງ, ຫົວໜ້າ – ຮອງຂະແໜງ, ປະທານສະພາການຄ້າ ແລະ ອຸດສາຫະກຳ ແຂວງຊຽງ ຂວາງ.

ທ່ານ ທອງສະຫວັດ ມັງໜໍ່ເມກ ໄດ້ກ່າວການລາຍງານໂດຍຫຍໍ້ກ່ຽວກັບວຽກງານການສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ການຄ້າ ວຽກງານການສົ່ງເສີມການຜະລິດເປັນສິນຄ້າ ໜຶ່ງເມືອງໜຶ່ງຜະລິດຕະພັນ ຫຼື ( ODOP ) ຢູ່ແຂວງຊຽງຂວາງ ທີ່ປະຊຸມໄດ້ຫາລືຖອດຖອນແລກປ່ຽນຄຳຄິດເຫັນຢ່າງກົງໄປ – ກົງມາໃນການຄັດເລືອກສິນຄ້າທີ່ເປັນສິນຄ້າມາຈາກພູມປັນຍາຂອງຊາວບ້ານ ແລະ ເປັນສິນຄ້າຫຼັກຂອງບັນດາຄອບຄົວໃຫ້ເປັນສິນຄ້າ ໜຶ່ງເມືອງໜຶ່ງຜະລິດຕະພັນ ແລະ ໄດ້ຄັດເລືອກເອົາສິນຄ້າ 14 ລາຍການ ຄືື: 1). ກຸ່ມຜະລິດຊາທໍາມະຊາດພູສັນ; 2). ກຸ່ມຜະລິດເສັ້ນເຝີບ້ານນູ ເມືອງແປກ; 3). ກຸ່ມຜະລິດເຂົ້າໜົມກະລາວັດ ບ້ານລາດຮ້ວງ ເມືອງແປກ; 4). ແຈ່ວບອງ ນາງ ນ້ອງ ບ້ານລີ່ ເມືອງແປກ; 5). ຫັດຖະກໍາຕໍ່າຫູກ ນາງ ອ່ອນສີ ບ້ານໂພນສະອາດໃຕ້ ເມືອງແປກ; 6). ເຫຼົ້າສະຕິກກີວາຍ ( Stic kir wine ) ບ້ານຍວນ ເມືອງແປກ; 7). ຫັດຖະກໍາຫຼອມໂລຫະ ບ້ານນາເພຍ ເມືອງຜາໄຊ; 8). ຫັດຖະກໍາຕໍ່າຫູກ ບ້ານທາງຊຽງເໜືອ ເມືອງຜາໄຊ; 9). ຫັດຖະກໍາຖົງແດງ ບ້ານນາຊາຍທອງ ເມືອງພູກູດ; 10). ຫັດຖະກໍາຕໍ່າຫູກ ບ້ານພຽງຫົ່ງ ເມືອງໜອງແຮດ; 11). ຫັດຖະກຳຈັກສານເປ້ເຜົ່າມົ້ງ ບ້ານປ່າຂົມ ເມືອງໜອງແຮດ; 12). ຫັດຖະກຳແຄນເຜົ່າມົ້ງ ເມືອງໜອງແຮດ; 13). ຫັດຖະກຳເປ້ຫວາຍມົ້ງ ບ້ານນໍ້ຫງາດ ເມືອງໝອກ; 14). ຫັດຖະກຳຈັກສານພາເຂົ້າຫວາຍ, ຕັ່ງຫວາຍ ແລະ ຫັດຖະກຳຍູກວາດ ບ້ານນາຄ່ອນ ເມືອງໝອກ. ( ຂ່າວ: ສັນຕິ )

( ຂໍ້ມູນ: ພະແນກ ອຄ ແຂວງຊຽງຂວາງ )