ຈະທຳລາຍ ລະເບີດ 750 ປອນ ຢູ່ເມືອງວິລະບູລີ ມື້ນີ້

443

ເມື່ອກາງເດືອນ ມັງກອນ 2019 ຜ່ານມາ ແຫຼ່ງຂ່າວສະຫວັນນະເຂດໄດ້ລາຍງານວ່າ ມີປະຊາຊົນພົບເຫັນລູກລະເບີດ ຂະໜາດໃຫຍ່ຢູ່ໃກ້ເຂດປໍ້ານໍ້າມັນ ບ້ານ ໂນນສົມບູນ ເມືອງ ວິລະບູລີ ແຂວງ ສະຫວັນນະເຂດ ເຊິ່ງເບື້ອງຕົ້ນ ເຈົ້າໜ້າທີ່ກໍ່ໄດ້ແຈ້ງປະຊາຊົນທີ່ຢູ່ໃກ້ຄຽງອອກກ່ອນ ເພື່ອໃຫ້ໜ່ວຍງານເກັບກູ້ລະເບີດເຂົ້າມາກວດສອບ. ຫຼ້າສຸດ, ລູກບົມ 750 ປອນ ກໍໍຖືກທຳລາຍຖິມມື້ນີ້.

ພາຍຫຼັງ ທີ່ມີການກວດສອບ ກໍ່ພົບວ່າ ລູກລະເບີດດັ່ງກ່າວແມ່ນລະເບີດເກົ່າຈາກສະໄໝສົງຄາມ ຂະໜາດໃຫຍ່ ເຊິ່ງມີນໍ້າໜັກກວ່າ 750 ປອນ ຫຼື ປະມານ 340 ກິໂລກຣາມ ໃກ້ກັບນໍ້າມັນ ບ້ານໂນນສົມບູນ ເມືອງ ວິລະບູລີ ແຂວງ ສະຫວັນນະເຂດ ລະເບີດລູກນີ້ ແມ່ນໄດ້ຖືກອອກແບບໃຫ້ມີການລະເບີດແບບຖ່ວງເວລາທາດເຄມີ ເຊິ່ງສາມາດຖ່ວງເວລາໃຫ້ແຕກໄດ້ສູງເຖິງ 144 ຊົ່ວໂມງ (6 ວັນ) ເຖິງຈະບໍ່ມີຄວາມສ່ຽງທີ່ສູງ ແຕ່ກໍ່ເປັນໄປໄດ້ທີ່ຈະມີການລະເບີດດ້ວຍຕົວເອງ. ດັ່ງນັ້ນ, ຄະນະຜູ້ບໍລິຫານຂອງບໍລິສັດລ້ານຊ້າງມີເນໂຣນ (LXML) ຈຶ່ງໄດ້ຕັດສິນໃຈ ສ້າງຕັ້ງເຂດພື້ນທີ່ຂຶ້ນໃນລັດສະໝີອ້ອມລູກລະເບີດ ທີ່ຍັງບໍ່ທັນແຕກ ເພື່ອຮັບປະກັນຄວາມປອດໄພຂອງພະນັກງານ ແລະ ບັນດາຜູ້ຮັບເໝົາ.

ຈາກນັ້ນ ເຈົ້າໆເມືອງ ວິລະບູລີ ຈຶ່ງໄດ້ອອກແຈ້ງການ ເລກທີ 63/ຈມ,ວລ ລົງວັນທີ 17 ມັງກອນ 2019 ການເຖິງທຸກພາກສ່ວນ ຕະຫຼອດຮອດພໍ່ແມ່ປະຊາຊົນໃນເມືອງ ວິລະບູລີ ຈົ່ງມີສະຕິລະວັງຕົວ ເພື່ອຫຼີກລ່ຽງຄວາມສ່ຽງຈາກລູກລະເບີດທີ່ຍັງບໍ່ທັນແຕກຢູ່ບ້ານ ໂນນສົມບູນ ເມືອງ ວິລະບູລີ ແຂວງ ສະຫວັນນະເຂດ ໃຫ້ເຄື່ອນຍ້າຍໄປບ່ອນທີ່ປອດໄພກ່ອນ ຈົນລູກລະເບີດດັ່ງກ່າວນັ້ນຈະຖືກທຳລາຍຖິ້ມ.

ເຊິ່ງຫຼ້າສຸດ ວັນທີ 15 ມີນາ 2019 ນີ້, ເຈົ້າເມືອງໆ ວິລະບູລີ ກໍ່ໄດ້ອອກແຈ້ງການ ເຖິງ ຫົວໜ້າຄະນະຫ້ອງການ, ພະນັກງານ, ທະຫານຕຳຫຼວດ, ຫົວໜ້າຈຸດສຸມ, ກຸ່ມບ້ານ, ບໍລິສັດ, ຫົວໜ່ວຍທຸລະກິດຕ່າງໆ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນໃນທົ່ວເມືອງ ວິລະບູລີ ເລື່ອງການທຳລາຍລະເບີດ (ລູກບົ່ມ) ຢູ່ບ້ານ ໂນນສົມບູນ ເມືອງ ວິລະບູລີ ແຂວງ ສະຫວັນນະເຂດ.

ເຊິ່ງໃນແຈ້ງການລະບຸວ່າ: ໃນວັນທີ 15 ມີນາ 2019 ນີ້, ທາງອົງການຮາໂລທຣັດສ໌ ຈະໄດ້ທຳລາຍລູກລະເບີດນັບແຕ່ເວລາ 9:00-15:00 ໂມງ, ສະນັ້ນ, ໃຫ້ຄະນະກໍາມະການຂັ້ນເມືອງ ຮ່ວມກັບອົງການດັ່ງກ່າວຈັດຫາສະຖານທີ່ພັກຊົ່ວຄາວ ແລະ ກະກຽມເຄື່ອນຍ້າຍປະຊາຊົນ ບ້ານ ໂນນສົມບູນ ອອກຈາກສະຖານທີ່ ບ່ອນຈະລະເບີດໃນລັດສະໝີ 1.500 ແມັດມົນທົນ.

ມອບໃຫ້ເຈົ້າໜ້າທີ່ ປກສ, ປກຊ ທັງສອງກຳລັງແຕ່ງຕັ້ງອ້າຍນ້ອງ ໄປສົມທົບກັບກຳລັງ ປກສ, ປກຊ ບ້ານ ເຮັດໜ້າທີ່ ປ້ອງກັນເວນຍາມ ເພື່ອຮັບປະກັນ ໃຫ້ມີຄວາມປອດໄພ ແລະ ຊັບສິນຂອງປະຊາຊົນຢ່າງເຂັ້ມງວດ.

ຢ່າງໃດກໍ່ຕາມຫາກວ່າລະເບີດລູກນີ້ຖືກທຳລາຍແນວໃດນັ້ນ ທ່ານຜູ້ອ່ານທາງເມືອງວິລະບູລີຊ່ວຍສົ່ງຂ່າວໃຫ້ແອັດມິນແນ່ເດີ້ ເພື່ອແຈ້ງໃຫ້ທ່ານຜູ້ອ່ານທົ່ວປະເທດໄດ້ຮັບຊາບນຳ!!!!

ຂໍ້ມູນ: ເມືອງວິລະບູລີ