ຄວັນພິດປົກຄຸມ ນວ ເກີນຄ່າມາດຕະຖານຜູ້ເຖົ້າ – ເດັກນ້ອຍຄວນລະວັງ

290

ປາກົດການຟ້າມືດຄຶ້ມທີ່ປົກຄຸມຢູ່ນະຄອນຫຼວງວຽງຈັນ ໃນປັດຈຸບັນກໍາລັງເປັນກະແສຮືຮາໃນສື່ສັງຄົມອອນລາຍ ກ່ຽວກັບທີ່ໄປ – ທີ່ມາຂອງຄື້ນໝອກຄວັນດັ່ງກ່າວ, ຂໍໃຫ້ພໍ່ແມ່ປະຊາຊົນເອົາໃຈໃສ່ເບິ່ງແຍງຜູ້ສູງອາຍຸ ແລະ ເດັກນ້ອຍເປັນພິເສດ ຈາກສະພາບອາກາດດັ່ງກ່າວອາດເກີດມີບັນຫາທາງເດີນຫາຍໃຈໄດ້.

ຈາກປາກົດການກຸ່ມຄວັນປົກຄຸມທົ່ວນະຄອນຫຼວງວຽງຈັນ ແລະ ແຂວງອື່ນໆຂອງປະເທດລາວ ທີ່ສະແດງໃນແອັບ AirVisual ທີ່ໃຊ້ສໍາລັບການວັດແທກລະດັບຝຸ່ນລະອອງໃນອາກາດທີ່ຊາວສື່ສັງຄົມອອນລາຍໃຊ້ວັດແທກ ແລະ ໄດ້ໂພສ໌ລົງເຟສບຸ໊ກ ເຫັນວ່າປັດຈຸບັນຄ່າວັດແທກຝຸ່ນລະອອງອາກາດໃນນະຄອນຫຼວງວຽງຈັນ ມີຄ່າເກີນມາດຕະຖານ ແລະ ຢູ່ໃນຂີດອັນຕະລາຍ ເຊິ່ງຜູ້ໃຊ້ເຟສບຸ໊ກຊື່: ລຸງໂອດ ລາຍງານວ່າ: ປະລິມານຝຸ່ນລະອອງຂະໜາດນ້ອຍ 2.5 ໄມຄຣອນ ( PM 2.5 ) ວັດໃນເວລາ 9:15 ໂມງ ຂອງວັນທີ 14 ມີນາ 2019 ທີ່ບ້ານໂພນຕ້ອງສະຫວາດ ເມືອງຈັນທະບູລີ ນະຄອນຫຼວງວຽງຈັນ ແທກໄດ້   246 g ( ໄມຄຣອນ ) ແທກໃນເດີ່ນບ້ານ, ບໍ່ໃກ້ທາງໃຫຍ່, ຂ້າງບ້ານບໍ່ຈູດຂີ້ເຫຍື້ອ ເຊິ່ງສະແດງວ່າຄ່າວັດລະດັບຝຸ່ນລະອອງຂະໜາດນ້ອຍ ຢູ່ທີ່ 246 ໄມຄຣອນ ນັ້ນແມ່ນຢູ່ໃນລະດັບສີແດງ ທີ່ເປັນອັນຕະລາຍຕໍ່ສຸຂະພາບ ເຊິ່ງມີຄ່າມາດຕະຖານດັ່ງນີ້ມີຄວາມໝາຍ ຄື: ສີຟ້າ      ( 0<25µg/m3 ) ອາກາດດີຫຼາຍ, ສີຂຽວ ( 25<50µg/m3 ) ອາກາດດີ, ສີເຫຼືອງ ( 50<100µg/m3 ) ປານກາງ, ສີສົ້ມ ( 100<200µg/m3 ) ມີຜົນກະທົບຕໍ່ສຸ     ຂະພາບ ຕ້ອງລະວັງ ແລະ ສີແດງ  ( >200 µ g/m3 ) ແມ່ນອັນຕະລາຍ.

ປະຊາຊົນທ່ານໜຶ່ງຢູ່ບ້ານໜອງໄຮ ເມືອງຫາດຊາຍຟອງ ກ່າວວ່າ: ສະພາບອາກາດຢູ່ໃນນະຄອນຫຼວງວຽງຈັນ 2 ວັນຜ່ານມາຮູ້ສຶກວ່າມີກຸ່ມຄວັນປົກຄຸມຫຼາຍໃນຕອນເຊົ້າຄ້າຍຄືກັບລະດູໜາວ ແຕ່ວ່າອາການທາງເດີນຫາຍໃຈຮູ້ສຶກຫາຍໃຈຝືດໆ, ເຈັບຫົວ ແລະ ມີອາການຈາມ ບໍ່ຮູ້ວ່າເປັນຍ້ອນຫຍັງ ແລະ ໄດ້ມາຮູ້ຂ່າວໃນສື່ສັງຄົມອອນລາຍວ່າ ນະຄອນຫຼວງວຽງຈັນ ມີອາກາດປົນຄວັນພິດເກີນຄ່າມາດຕະຖານ.

ທ່ານ ວັນນະ ພັນພົງສາ ຮອງຫົວໜ້າພະແນກຕິດຕາມ ແລະ ວິໄຈຄຸນນະພາບສິ່ງແວດລ້ອມ ສະຖາບັນຄົ້ນຄວ້າຊັບພະຍາກອນທຳມະຊາດ ແລະ ສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ສໍາພາດທາງໂທລະສັບກັບທີມຂ່າວໜັງສືພິມ ເສດຖະກິດ – ການຄ້າ ວ່າ: ສາເຫດທີ່ພາໃຫ້ເກີດຟ້າມືດຄຶ້ມປົກຄຸມນະຄອນຫຼວງວຽງຈັນ ໃນປັດຈຸບັນນີ້ແມ່ນເກີດມາຈາກໄຟໄໝ້ປ່າຈາກທັງໃນປະເທດ ແລະ ປະເທດອ້ອມຂ້າງ ກໍຄືປະເທດໄທ ແລະ ມຽນມາ ຈຶ່ງສົ່ງຜົນໃຫ້ເກີດມີຝຸ່ນລະອອງມົນລະພິດເກີນຄ່າມາດຕະຖານຂຶ້ນປົກຄຸມໃນບາງສ່ວນຂອງປະເທດລາວ ເຊິ່ງຄວັນດັ່ງກ່າວນີ້ ຖ້າສູບດົມເຂົ້າໄປຫຼາຍເກີນໄປອາດກໍ່ໃຫ້ເກີດເປັນພະຍາດມະເຮັງໄດ້, ຂໍ້ຄວນລະວັງຄືເດັກນ້ອຍ ແລະ ຜູ້ເຖົ້າ ໃຫ້ເອົາໃຈໃສ່ເບິ່ງແຍງເປັນພິເສດເພາະວ່າອາດເປັນພູມແພ້ທາງເດີນຫາຍໃຈໄດ້ງ່າຍ ແລະ ສໍາລັບໄລຍະການຈາງຫາຍຂອງຄວັນນີ້ ແມ່ນມັນຈະຄ່ອຍໆຈາງຫາຍໄປຕາມແລວຂອງລົມພັດ. ພ້ອມດຽວກັນນັ້ນ, ທ່ານຍັງກ່າວອີກວ່າ ຂໍໃຫ້ທຸກຄົນຢ່າແຕກຕື່ນເກີນໄປສາມາດໃຊ້ຊີວິດຕາມປົກກະຕິໄດ້ ພຽງແຕ່ໃຫ້ລະມັດລະວັງຫຼາຍຂຶ້ນໂດຍສະເພາະການອອກກາງແຈ້ງໃຫ້ໃຊ້ຜ້າປິດ ປາກ – ດັງ ເພື່ອຫຼຸດຜ່ອນການສູບດົມມົນລະພິດດັ່ງກ່າວ.