ເກີດເຫດຂະນວນລົດໄຟ ຂອງອີຍິບ ລະເບີດ ໃນສະຖານີ ເສຍຊີວິດ 25 ຄົນ

305

ລົດໄຟໂດຍສານຂອງປະເທດ ອີຍິບ ແລ່ນຕຳແລວກັ້ນ ແລະ ຖັງນ້ຳມັນລະເບີດ ເຮັດໃຫ້ໄຟລຸກລາມຕູ້ໂດຍສານທີ່ສະຖານີຫຼັກໃນນະຄອນຫຼວງໄຄໂຣ ເມື່ອວັນພຸດ ມີຜູ້ເສຍຊີວິດຢ່າງໜ້ອຍ 25 ຄົນ.

ສໍານັກຂ່າວຕ່າງປະເທດລາຍງານຈາກນະຄອນຫຼວງໄຄໂຣ ປະເທດອີຍິບ ເມື່ອວັນພຸດ ທີ 27 ກຸມພາ ວ່າ ຂະບວນລົດໄຟໂດຍສານທີ່ແລ່ນມາດ້ວຍຄວາມໄວສູງ ແລ່ນຕຳແລວກັ້ນທາງທີ່ຢູ່ສົ້ນສຸດຂອງລາງລົດໄຟ ໃນສະຖານີຣາມເສສ ນະຄອນຫຼວງໄຄໂຣ ອຸບັດຕິເຫດຄັ້ງນີ້ ເກີດການກະທົບຢ່າງຮຸນແຮງເຮັດໃຫ້ຖັງນ້ຳມັນຂອງລົດໄຟລະເບີດ ແລະ ເກີດໄຟລຸກໄໝ້ລາມຕູ້ຂະບວນໂດຍສານ ພົບຜູ້ເສຍຊີວິດຢ່າງໜ້ອຍ 25 ຄົນ ໄດ້ຮັບບາດເຈັດ ກວ່າ 47 ຄົນ ຖືກນໍາສົ່ງໂຮງໝໍຂອງສະຖານີລົດໄຟໄຄໂຣ ເຊິ່ງ ທ່ານ ໂມຮໍາເໝັດ ຊາອິດ ຜູ້ອໍານວຍການໂຮງໝໍຂອງສະຖານີລົດລົດໄຟ ເຜີຍວ່າ ຈຳນວນຜູ້ເສຍຊີວິດອາດເພິ່ມຂຶ້ນ ເນື່ອງຈາກຜຸ້ບາດເຈັບ ອາການສາຫັດຫຼາຍຄົນ.

ທາງດ້ານ ນາຍົກລັດຖະມົນຕີມອສຕາຟາ ມັດບູລີ ຂອງອີຍິບ ເດີນທາງໄປກວດກາສະຖານທີ່ເກີດເຫດທັນທີ ພ້ອມກັບໃຫ້ຄໍາໝັ້ນຈະນຳຕົວຜຸ້ຕ້ອງຮັບຜິດຊອບມາລົງໂທດ.

ລະບົບລົດໄຟຂອງອີຍິບມີສະຖິຕິຄວາມປອດໄພລະດັບຕ່ຳຫຼາຍ ສາເຫດຫຼັກແມ່ນເກີດຈາກລົດໄຟທີ່ເກົ່າໂຊມ, ຂາດການສ້ອມແປງ ແລະ ການບໍລິຫານຈັດການທີ່ບໍ່ໄດ້ມາດຕະຖານ ໃນຮອບປີ 2017 ເກີດອຸບັດຕິເຫດລົດໄຟຕຳກັນ ຫຼື ຕົກລາງ ໃນປະເທດອີຍິບ 1.793 ຄັ້ງ ສູງຂຶ້ນຈາກ 1.249 ຄັ້ງ ໃນປີ 2016.