ຜູ້ນໍາເກົາຫຼີເໜືອເດີນທາງດ້ວຍລົດໄຟມາເຖິງຫວຽດນາມແລ້ວ

473

ທ່ານ ຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອເດີນທາງເຖິງຫວຽດນາມແລ້ວ ຫຼັງໃຊ້ເວລາດົນກວ່າ 2 ມື້ ດ້ວຍຂະບວນລົດໄຟໂດຍສານເປັນໄລຍະທາງ 4.000 ກິໂລແມັດຈາກນະຄອນຫຼວງປຽງຢາງ ເພື່ອມາປະຊຸມກັບປະທານາທິບໍດີໂດນັລ ທຣຳ ທີ່ນະຄອນຫຼວງຮາໂນ່ຍ.

ສໍານັກຂ່າວຕ່າງປະເທດລາຍງານຈາກເມືອງດົ່ງດາງ ປະເທດຫວຽດນາມ ເມື່ອວັນອັງຄານ ທີ 26 ກຸມພາ ວ່າ ຂະບວນລົດໄຟພິເສດຂອງ ທ່ານ ຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ ແລະ ຄະນະທີ່ລວມເຖິງ ທ່ານ ຄິມ ຍອງ-ຊອລ ຮອງປະທານຄະນະກໍາມະການກາງພັກແຮງງານເກົາຫຼີ ເດີນທາງເຖິງສະຖານີລົດໄຟ ໃນເມືອງດົ່ງດາງ ຂອງແຂວງຫຼັ່ງເຊີນ ທີ່ຕັ້ງຢູ່ພາກເໜືອສຸດຂອງຫວຽດນາມ ເມື່ອ ຕອນເຊົ້າຂອງວັນອັງຄານ ຕາມເວລາທ້ອງຖິ່ນ ຫຼັງໃຊ້ເວລາເດີນທາງດົນເຖິງ 2 ມື້ເຄິ່ງ ເປັນໄລຍະທາງໄກເຖິງ 4.000 ກິໂລແມັດ.

ທັງນີ້ ຜູ້ນຳເກົາຫຼີເໜືອ ໄດ້ຮັບການຕ້ອນຮັບຈາກເຈົ້າໜ້າທີ່ລະດັບສູງຂອງພັກຄອມມູນິດຫວຽດນາມ, ຕົວແທນເຍົາວະຊົນ ທີ່ມອບຊໍ່ດອກໄມ້ໃຫ້ ແລະ ການຍ່າງກວດແຖວກອງທັບກຽດຕິຍົດ ກ່ອນທີ່ຈະເດີນທາງຕໍ່ອີກ 170 ກິໂລແມັດສູ່ນະຄອນຫຼວງຮາໂນ່ຍ ລະຫວ່າງການຮັກສາຄວາມປອດໄພຢ່າງເຂັ້ມງວດຂັ້ນສູງສຸດ ໂດຍລັດຖະບານວຫຽດນາມປິດການຈະລາຈອນຖະໜົນສາຍຫຼັກຈາກແຂວງຫຼັ່ງເຊີນສູ່ນະຄອນຫຼວງຮາໂນ່ຍໝົດມື້ວັນອັງຄານ ທີ 26 ກຸມພາ ນີ້.

A car carrying North Korean leader Kim Jong Un leaves Dong Dang railway station after his arrival in Vietnamese border town Tuesday, Feb. 26, 2019, ahead of his second summit with U.S. President Donald Trump. (AP Photo/Minh Hoang)

ຂະນະທີ່ ປະທານາທິບໍດີໂດນັລ ທຣຳ ເດີນທາງດ້ວຍຍົນໂດຍສານປະຈໍາຕໍາແໜ່ງຜູ້ນໍາສະຫະລັດ “ແອຣ໌ ຟໍຊ໌ ວັນ” ມີກໍານົດເຖິງນະຄອນຫຼວງຮາໂນ່ຍ ໃນໄລຍະຕອນຄໍ່າຂອງວັນອັງຄານ ໂດຍຄະນະຜູ້ຕິດຕາມຂອງ ທຣຳ ລວມເຖິງທ່ານ ໄມຄ໌ ປອມເປໂອ ລັດຖະມົນຕີກະຊວງການຕ່າງປະເທດສະຫະລັດ ທີ່ໄດ້ເດີນທາງຢ້ຽມຢາມເກົາຫຼີເໜືອຫຼາຍຄັ້ງ ນັບຕັ້ງແຕ່ຮັບຕໍາແໜ່ງ ເມື່ອເດືອນເມສາ ປີຜ່ານມາ.

ສໍາລັບ ການພົບປະຫາລືລະຫວ່າງ ຜູ້ນໍາສະຫະລັດ ກັບ ຜູ້ນໍາເກົາຫຼີເໜືອຈະມີຂຶ້ນທີ່ນະຄອນຫຼວງຮາໂນ່ຍ ລະຫວ່າງວັນທີ 27 ເຖິງ 28 ກຸມພາ ນີ້ ຖືເປັນການປະຊຸມຮ່ວມກັນຢ່າງເປັນທາງການຄັ້ງທີ 2 ຕໍ່ຈາກການປະຊຸມຄັ້ງທໍາອິດທີ່ປະເທດສິງກະໂປ ເມື່ອເດືອນມິຖຸນາ ປີຜ່ານມາ ຢ່າງໃດກໍ່ຕາມ ຫຼາຍຝ່າຍໃຫ້ຄວາມເຫັນໄປໃນທາງດຽວກັນວ່າ “ມັນບໍ່ມີຄວາມຄີບໜ້າ” ເກີດຂຶ້ນ ຫຼັງສິງກະໂປຊໍາມິດ ໂດຍສະເພາະປະເດັນເລື່ອງ “ການປົດອາວຸດນິວເຄຣຍ” ທີ່ສະຫະລັດ ແລະ ເກົາຫຼີເໜືອຕ່າງຝ່າຍກໍ່ຍັງມີທ່າທີລະແວງຕະຫຼອດຈົນການທີ່ລັດຖະບານປຽງຢາງ ຢືນຢັນຈຸດປະສົງໃນການໃຫ້ລັດຖະບານວໍຊິງຕັນຜ່ອນຄາຍມາດຕະການຂວໍ້າບາດ ແລະ ການປົດອາວຸດນິວເຄຣຍຂອງເກົາຫຼີເໜືອຕ້ອງບໍ່ແມ່ນໃຫ້ເປັນຝ່າຍການດໍາເນີນການ “ພຽງແຕ່ດຽວ” ສ່ວນຄະນະຂອງ ທຣຳ ຍັງຢ້ຳເລື່ອງການຂວ້ຳບາດຈົນກວ່າຂະບວນການປົດອາວຸດນິວເຄຣຍ “ຈະແລ້ວສົມບູນ” ແລະ ປະເດັ້ນການຫຼຸດຈໍານວນທະຫານອາເມລິກັນໃນປະເທດເກົາຫຼີໃຕ້ຈະບໍ່ລວມຢູ່ໃນຫົວຂໍ້ຂອງການປະຊຸມຄັ້ງນີ້.