ເກົາຫຼີເໜືອເຕືອນ ທຣຳ ກ່ອນເຖິງຮາໂນ່ຍຊໍາມິດ

251

ລັດຖະບານເກົາຫຼີເໜືອເຕືອນປະທານາທິບໍດີໂດນັລ ທຣຳ ຜູ້ນໍາສະຫະລັດ “ຢ່າເຊື່ອຝ່າຍອື່ນຫຼາຍເກີນໄປ” ບໍ່ເຊັ່ນນັ້ນການປະຊຸມຮ່ວມກັນຄັ້ງທີ 2 ທີ່ນະຄອນຫຼວງຮາໂນ່ຍ “ຈະບໍ່ມີຄວາມໝາຍ”.

ສໍານັກຂ່າວຕ່າງປະເທດລາຍງານຈາກນະຄອນຫຼວງຮາໂນ່ຍ ປະເທດຫວຽດນາມ ເມື່ອວັນຈັນ ທີ 25 ກຸມພາ ວ່າ ສໍານັກຂ່າວກາງເກົາຫຼີ (KCNA: Korean Central News Agency) ລາຍງານເມື່ອວັນອາທິດ ວ່າ ການທີ່ປະທານາທິບໍດີໂດນັລ ທຣຳ “ຟັງສຽງວິພາກວິຈານ” ຈາກບຸກຄົນອື່ນຫຼາຍເກີນໄປ ມັນໄດ້ສ້າງບົດຮຽນສໍາຄັນທີ່ຈະສົ່ງຜົນໃຫ້ຄວາມພະຍາຍາມລະດັບທະວິພາຄີ “ບໍ່ມີຄວາມຄືບໜ້າ “ແລະ ຍັງຜະເຊີນກັບທາງຕັນ ນັບຕັ້ງແຕ່ການພົບຫາລືຄັ້ງທໍາອິດທີ່ປະເທດສິງກະໂປ ເມື່ອເດືອນມິຖຸນາ ປີຜ່ານມາ ດ້ວຍເຫດນີ້ ຖ້າການປະຊຸມຄັ້ງທີ 2 ທີ່ນະຄອນຫຼວງຮາໂນ່ຍຈົບດ້ວຍ “ການຊໍ້າຮອຍ” ແບບດຽວກັບທີ່ປະເທດສິງກະໂປ ເຊິ່ງຖືວ່າ “ເຂົ້າທາງ” ຝ່າຍທີ່ບໍ່ເຫັນດີກັບເລື່ອງນີ້ ຊາວອາເມຣິກັນຈະບໍ່ມີທາງລອດພົ້ນຈາກ “ໄພຄຸກຄາມດ້ານຄວາມໝັ້ນຄົງ “.

ເຖິງວ່າລາຍງານຂອງເຄຊີເອັນເອ ບໍ່ໄດ້ໃຫ້ຂໍ້ມູນເພິ່ມຕື່ມວ່າ ໄພຄຸກຄາມທີ່ວ່ານັ້ນກ່ຽວກັບຫຍັງ ແຕ່ລະບຸວ່າ ຖ້າ ທຣຳ “ເຊື່ອຄົນອື່ນຫລາຍເກີນໄປ” ເຊິ່ງໝາຍເຖິງນັກວິຈານ ແລະ ນັກວິເຄາະທາງການເມືອງຕະຫຼອດຈົນສະມາຊິກສະພາຄອງເກຣສ ບໍ່ວ່າຈະມາຈາກຝ່າຍໃດກໍຕາມ ຄວາມຝັນໃນການຟື້ນຟູຄວາມສໍາພັນກັບລັດຖະບານປຽງຢາງ ແລະ ການສ້າງສັນຕິພາບເທິງແຫຼມມະຫາສະມຸດເກົາຫຼີ ກໍ່ຈະຄ່ອຍໆທົດຖອຍລົງໄປນຳ.

ທັງນີ້ ລາຍງານດັ່ງກ່າວໄດ້ເຜີຍແຜ່ອອກມາ ລະຫວ່າງທີ່ ທ່ານ ຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ ແລະ ຄະນະອອກເດີນທາງດ້ວຍຂະບວນລົດໄຟສາຍພິເສດ ຈາກນະຄອນຫຼວງປຽງຢາງ ສູ່ຊາຍແດນຫວຽດນາມ ເມື່ອຄືນວັນເສົາ ແລ້ວເດີນທາງຕໍ່ດ້ວຍລົດໄປນະຄອນຫຼວງຮາໂນ່ຍ ເພື່ອກຽມພົບປະຫາລືເປັນຄັ້ງທີ 2 ກັບ ທຣໍາ ທີ່ເມືອງຫຼວງຂອງຫວຽດນາມ ລະຫວ່າງວັນທີ 27 ເຖິງ 28 ກຸມພາ ນີ້ ຂະນະທີ່ຜູ້ນໍາສະຫະລັດ ໄດ້ຂຽນຂໍ້ຄວາມຜ່ານທະວິດເຕີ ວ່າ “ປະທານຄິມ” ເຊິ່ງໝາຍເຖິງ ທ່ານ ຄິມ ຈອງ-ອຶນ ອາດຈະຮູ້ດີກວ່າໃຜ ວ່າ ການບໍ່ມີອາວຸດນິວເຄຣຍຈະສາມາດຊ່ວຍໃຫ້ເກົາຫຼີເໜືອກາຍເປັນໜຶ່ງໃນປະເທດທີ່ມີພັດທະນາການທາງເສດຖະກິດຢ່າງວ່ອງໄວທີ່ສຸດໃນໂລກ.

ຢ່າງໃດກໍ່ຕາມ ລັດຖະບານປຽງຢາງຢ້ຳມາຕະຫຼອດວ່າ ເກົາຫຼີເໜືອຈະບໍ່ມີທາງເປັນຝ່າຍດຽວທີ່ຕ້ອງ “ປົດນິວເຄຣຍ” ນອກຈາກນີ້ ທຣໍາ ກ່າວດ້ວຍວ່າປະເດັນກ່ຽວກັບການຫຼຸດຈໍານວນທະຫານອາເມຣິກັນເທິງແຫຼມມະຫາສະມຸດເກົາຫຼີ ຈະບໍ່ເປັນໜຶ່ງໃນຫົວຂໍ້ຂອງການຫາລືຄັ້ງນີ້ຢ່າງແນ່ນອນ ໂດຍປັດຈຸບັນ ສະຫະລັດມີທະຫານປະຈໍາການຢູ່ໃນເກົາຫຼີໃຕ້ ປະມານ 28.500 ຄົນ.