4 ມື້ 300 ລ້ານກີບ! ໄວລຸ້ນອາເມຣິກາ ຮັບຈ້າງເຮັດວຽກ 12 ຊົ່ວໂມງຕໍ່ມື້

382

ບາງຄັ້ງຄົນເຮົາກໍ່ສາມາດປ່ຽນວິກິດໃຫ້ກາຍເປັນໂອກາດຂຶ້ນມາໄດ້ ເຊັ່ນໃນກໍລະນີຂອງໜຸ່ມນ້ອຍໄວລຸ້ນຄົນໜຶ່ງ ທີ່ເຫັນວ່າ ໃນເມືອງທີ່ຕົນສາໄສຢູ່ນັ້ນ ມີຫິມະຕົກໜັກຫຼາຍ ຈຶ່ງມີໄອເດຍ ສ້າງອາຊີບໃໝ່ດ້ວຍການຮັບຈ້າງກວາດຫິມະຕາມບ້ານເຮືອນ.

ເນື່ອງຈາກຕະຫຼອດໄລຍະເດືອນກຸມພາ ທີ່ຜ່ານມາ ເມືອງຊີແອດເທິລ ປະເທດອາເມຣິກາ ຕ້ອງຜະເຊີນກັບ ‘ຫິມະ’ ທີ່ຕົກໜັກທີ່ສຸດ ໃນຮອບ 70 ປີ ຈຶ່ງເຮັດໃຫ້ເສັ້ນທາງສັນຈອນຕ່າງໆຖືກຫິມະປົກຄຸມເຕັມໄປໝົດ ແລະ ບາງສະຖານທີ່ກໍ່ມີຫິມະໜາເຖິງ 25 ເຊັນຕີແມັດ.

ເດວິດ ໂຮລສ໌ເທັນ David Holsten ໜຸ່ມໄວ 18 ປີ ຈຶ່ງມີໄອເດຍການຫາເງິນຂຶ້ນມາດ້ວຍການຮັບຈ້າງກວາດຫິມະຕາມບ້ານ ເຊິ່ງສາມາດສ້າງລາຍຮັບໃຫ້ກັບຕົນໄດ້ເປັນກ້ອນເປັນກໍາ.

ເຂົາໄດ້ເລົ່າວ່າ ຈຸດເລິ່ມຕົ້ນຂອງແນວຄິດເຮັດທຸລະກິດນີ້ ມັນໄດ້ເກີດຂຶ້ນ ຂະນະທີ່ຕົນໄປຢ້ຽມຢາມແມ່ ທີ່ຜ່າຕັດປິ່ນປົວໃນໂຮງໝໍ ແລະ ໄດ້ຮັບຄໍາແນະນໍາຈາກເພື່ອນໃຫ້ໂຄສະນາບໍລິການນີ້ເທິງເວັບໄຊ.

ຜົນປະກົດວ່າ ມັນໄດ້ຮັບການຕອບຮັບເປັນຢ່າງດີ ມີຜູ້ຄົນສົນໃຈການບໍລິການຂອງຕົນຢ່າງຫຼວງຫຼາຍ ແຖມຍັງມີໄລຍະໜຶ່ງທີ່ລູກຄ້າເຖິງຂະໜາດຕ້ອງຍາດຄິວກັນຢ່າງວຸ້ນວາຍຈົນເຮັດໃຫ້ມີລູກຄ້າບາງຄົນອັບລາຄາຄ່າຈ້າງຂຶ້ນໃຫ້ເຖິງຊົ່ວໂມງລະ 1.000 ໂດລາ (ປະມານ 8.500.000 ກີບ) ເລີຍ.

ໂດຍປົກກະຕິແລ້ວ ຄ່າບໍລິການແມ່ນ ປະມານ 500-550 ໂດລາ (ປະມານ 4.290.000 – 4.720.000 ກີບ) ແລະ ເຮັດວຽກເຖິງວັນລະ 12 ຊົ່ວໂມງ ຕັ້ງແຕ່ທ່ຽງຈົນຮອດກາງຄືນ “ຂ້ອຍເຮັດວຽກເທິງຖະໜົນຈົນຮອດກາງຄືນເລີຍ ແລະ ລະຫວ່າງກຳລັງເຮັດວຽກຢູ່ນັ້ນ ກໍ່ໃຊ້ໂທລະສັບມືຖືເພື່ອນັດ ແລະ ຈັດຄິວວຽກກັບລູກຄ້າຄົນອື່ນໆ ໄປນຳ” ເດວິດ ກ່າວ.

ລູກຄ້າທີ່ໃຊ້ບໍລິການ ເດວິດ ມີຢ່າງຫຼວງຫຼາຍ ລວມທັງບໍລິສັດໃຫຍ່ໆເຊັ່ນ: ບໍລິສັດ Amazon, ຫ້າງສັບພະສິນຄ້າ Walgreens, ໂຮງແຮມຕ່າງໆ ແລະ ກໍ່ສູນລົດ ຮອນດ້າ ດ້ວຍ.

ສໍາລັບເງິນຄ່າຕອບແທນທີ່ເຂົາໄດ້ຮັບ ຫຼັງຈາກເຮັດວຽກໄປ 4 ວັນ ຕົກຢູ່ປະມານ 35.000 ໂດລາ (ປະມານ 300 ລ້ານກີບ) ເຊິ່ງເຂົາກໍ່ໄດ້ວາງແຜນເອົາໄວ້ວ່າ ຈະນໍາເງິນໄປບໍລິຈາກການກຸສົນໃຫ້ໂບດ 20% ລວມເຖິງນໍາເງິນສ່ວນໜຶ່ງໄປຊື້ອຸປະກອນມາເພິ່ມ ແລະ ທີ່ເຫຼືອແມ່ນຈະທ້ອນໄວ້ຊື້ບ້ານ ນັ້ນເອງ.

CR: dailymail.co.uk