ຈີນບໍລິຈາກເຂົ້າສານກວ່າ 9.600 ໂຕ້ນຊ່ວຍເຫຼືອປະເທດຊູດານໃຕ້

317

ເມື່ອວັນພະຫັດ ທີ 21 ກຸມພາ ຜ່ານມາ ລັດຖະບານຈີນໄດ້ບໍລິຈາກເຂົ້າສານ ປະມານ 9.660 ໂຕ້ນ ໃຫ້ແກ່ປະເທດຊູດານໃຕ້ ເພື່ອຊ່ວຍເຫຼືອປະຊາຊົນຜູ້ທຸກຍາກ ທີ່ສຸ່ມສ່ຽງຕໍ່ຄວາມອົດຢາກຂາດເຂີນ ໂດຍປະເທດແຫ່ງນີ້ ກໍາລັງຢູ່ໃນໄລຍະຟື້ນຟູປະເທດ ຫຼັງເກີດຄວາມຂັດແຍ່ງພາຍໃນມາເກືອບ 5 ປີ.

Manasseh Lomole ປະທານຄະນະກໍາມະການບັນເທົາທຸກ ແລະ ຟື້ນຟູ ກ່າວວ່າ ເຂົ້າສານຊຸດທໍາອິດຂອງຈີນໄດ້ລຳລຽງມາຮອດຈູບາ ເມືອງຫຼວງຂອງຊູດານໃຕ້ແລ້ວ ທັງນີ້ ອາຫານທີ່ບໍລິຈາກມາຈະຖືກຈັດສົ່ງລຳລຽງໃຫ້ແກ່ບັນດາຜູ້ພັດຖິ່ນພາຍໃນປະເທດ ແລະ ຜູ້ລອດຊີວິດຈາກອຸທົກກະໄພ ແລະ ໄພແລ້ງ.

Lomole ໄດ້ກ່າວຍ້ອງຍໍຂອບໃຈການສະໜັບສະໜຸນຂອງຈີນ ທີ່ມີໃຫ້ກັບຊູດານໃຕ້ ເນື່ອງຈາກປະເທດແຫ່ງນີ້ກໍາລັງຜະເຊີນກັບໄພແຫ້ງແລ້ງຮອບໃໝ່ອີກຄັ້ງ ໂດຍກ່າວ “ຄຳຂອບໃຈປະຊາຊົນຊາວຈີນ ສໍາລັບສິ່ງທີ່ພວກເຂົາເຮັດໃຫ້ແກ່ປະຊາຊົນຊາວຊູດານໃຕ້ຂອງເຮົາ”.

ນອກຈາກອາຫານແລ້ວ ທ່ານ Lomole ໄດ້ຮຽກຮ້ອງໃຫ້ລັດຖະບານຈີນຊ່ວຍເຫຼືອດ້ານການພັດທະນາຂອງຊູດານໃຕ້ອີກດ້ວຍ ໂດຍສະເພາະດ້ານກະເສດ ເພື່ອໃຫ້ຊາວຊູດານໃຕ້ ສາມາດລ້ຽງຕົວເອງໄດ້ໃນອະນາຄົດ.

ດ້ານ ທ່ານ ເຫີຊຽງຕົ້ງ ເອກອັກຄະລາຖະທູດຈີນ ປະຈໍາຊູດານໃຕ້ ກ່າວວ່າ ການບໍລິຈາກເຂົ້າສານຄັ້ງນີ້ ເປັນພຽງຄວາມພະຍາຍາມສ່ວນໜຶ່ງຂອງຈີນ ທີ່ຕ້ອງການເສີມສ້າງຄວາມໝັ້ນຄົງໃຫ້ແກ່ຊູດານໃຕ້

“ນີ້ຄືຂອງຂວັນຈາກຄົນຈີນທີ່ມອບໃຫ້ແກ່ອ້າຍນ້ອງໃນຊູດານໃຕ້ ເຊິ່ງພວກເຮົາມີຄວາມໝັ້ນໃຈເປັນຢ່າງຍິ່ງ ວ່າ ໃນອະນາຄົດອີກບໍ່ດົນ ຫຼັງຈາກນີ້ ປະຊາຊົນໃນປະເທດຊູດານໃຕ້ ຈະສາມາດລຸກຂຶ້ນມາຢືນຫຍັດໄດ້ດ້ວຍຕົນເອງ” ທ່ານ ເຫີ ກ່າວ.

picture: ສະຖານທູດຈີນປະຈຳຊູນດານໃຕ້