ເກືອບ 40 ປີ! ຄົ້ນພົບເຜິ້ງໃຫຍ່ທີ່ສຸດໃນໂລກ ປະກົດຕົວຄັ້ງທໍາອິດ

862

“ເຜິ້ງໃຫຍ່ວອລເລສ” ເຊິ່ງເປັນເຜິ້ງຂະໜາດໃຫຍ່ທີ່ສຸດໃນໂລກ ປະກົດຕົວທີ່ປ່າແຫ່ງໜຶ່ງ ເທິງເກາະໂມລຸກກະ ປະເທດອິນໂດເນເຊຍ ຫຼັງນັກຄົ້ນຄວ້າກ່າວວ່າບໍ່ເຫັນມັນເລີຍ ນັບຕັ້ງແຕ່ປີ 1981 ຈົນຄິດວ່າມັນອາດຈະສູນພັນໄປແລ້ວ.

ສໍານັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນສຸກ ທີ 22 ກຸມພາ ວ່າ ອົງກອນອະນຸລັກສັດປ່າໂລກ (GWC: Global Wildlife Conservation) ຈາກອາເມຣິກາ ໄດ້ລາຍງານ ເມື່ອວັນພະຫັດ ຜ່ານມາ ວ່າ ທີມນັກສໍາຫຼວດຂອງ GWC  ຮ່ວມກັບນັກຄົ້ນຄວ້າກ່ຽວກັບແມງໄມ້ຈາກມະຫາວິທະຍາໄລພຣິນຕັນໄດ້ພົບເຫັນກັບ ເຜິ້ງໃຫຍ່ວອລເລສ (Wallace’s giant bee) ໂດຍບັງເອີນລະຫວ່າງການລົງພື້ນທີ່ສໍາຫຼວດປ່າຕຶບໜາແຫ່ງໜຶ່ງ ໃນແຂວງມາລູກູເໜືອ ທາງພາກເໜືອຂອງໝູ່ເກາະໂມລຸກກະ ປະເທດອິນໂດເນເຊຍ ແລະ ສາມາດບັນທຶກພາບຂອງມັນໄວ້ກ່ອນປ່ອຍກັບຄືນສູ່ທໍາມະຊາດຄືເກົ່າ.

ທັງນີ້ ລາຍງານຂອງ GWC ໃຫ້ຂໍ້ມູນດ້ວຍວ່າ ເຜິ່ງໃຫຍ່ວອເລສ ໄດ້ຮັບການຂະໜານນາມຕາມຊື່ຂອງ ທ່ານ ອັນເຟລດ ຣັສເຊລ ວວລເລສ ນັກສໍາຫຼວດ ແລະ ຜູ້ຊ່ຽວຊານດ້ານສັດ ແລະ ຕົ້ນໄມ້ ຊາວອັງກິດ ເຊິ່ງມີຫຼັກຖານເປັນຜູ້ຄົ້ນພົບ ເຜິ້ງໃຫຍ່ສາຍພັນດັ່ງກ່າວທີ່ຖືວ່າມີຂະໜາດໃຫຍ່ທີ່ສຸດໃນໂລກ ເທົ່າທີ່ເຄີຍມີການບັນທຶກໄວ້ ເມື່ອປີ 1858 ຂະນະທີ່ ຜູ້ຊ່ຽວຊານຄົ້ນພົບການປະກົດຕົວຂອງເຜິ້ງຊະນິດນີ້ ຄັ້ງຫຼ້າສຸດເມື່ອປີ 1981 ແລະ ບໍ່ມີຂໍ້ມູນຢ່າງເປັນທາງການອີກຈຶ່ງຖືເປັນຄັ້ງທໍາອິດ ໃນຮອບ 38 ປີ ທີ່ມີການຄົ້ນພົບເຜິ້ງໃຫຍ່ວອລເລສ ຢ່າງເປັນທາງການ.

ຂະນະທີ່ ຂໍ້ມູນຂອງສະຫະພາບລະຫວ່າງປະເທດເພື່ອການອະນຸລັກທໍາມະຊາດ (IUCN: International Union for Conservation of Nature) ຈັດໃຫ້ເຜິ້ງໃຫຍ່ວອລເລສ ຢູ່ໃນ “ບັນຊີແດງ” ທີ່ໝາຍຄວາມວ່າໃກ້ສູນພັນ ແລະ ມີຄວາມຈໍາເປັນຢ່າງຍິ່ງທີ່ຕ້ອງມີການອະນຸລັກ ເພື່ອຄວາມສົມດຸນຂອງລະບົບນິເວດ ໂດຍເຜິ້ງໃຫຍ່ວອລເລສ ເມື່ອໃຫຍ່ເຕັມທີ່ ຈະມີຄວາມຍາວຂອງລໍາຕົວ ປະມານ 4 ເຊັນຕີແມັດ ແລະ ເມື່ອກາງປີກສອງຂ້າງອອກຈະມີຄວາມກວ້າງ ກວ່າ 6 ເຊັນຕີແມັດ.

Picture: sydney.edu.au