“ຫຼິງຫຼິງ ປິຍະດາ” ຄວງຄູ່ “ຕັອດ ລີນ້າ” ຖ່າຍແບບງານແຟຊັນ ລະດົມທຶນຊ່ວຍເຫຼືອຊົນເຜົ່າແລນແຕນ

571

ສອງສາວ ເຈົ້າແມ່ຂອງວົງການແຟຊັນ ຫຼິງຫຼິງ ປິຍະດາ ແລະ ຕັອດ ລີນ້າ ຖ້າໃຜທີ່ຕິດຕາມວົງການແຟຊັນຂອງລາວ ກໍ່ຈະປາກົດໃບໜ້າຂອງທັງສອງຄົນນີ້ ເທິງເວທີຂອງງານແຟຊັນໂຊຕ່າງໆຢູ່ຕະຫຼອດ. ຫຼ້າສຸດທັງສອງຄົນ ກໍ່ຄວງຄູ່ມີສ່ວນຮ່ວມໃນການຈັດງານແຟຊັນໂຊ ພາຍໃຕ້ຄຳຂັວນ “ມອບຮັກແດ່ແລນແຕນ” ຫຼື Love for Lantan ເພື່ອລະດົມທຶນຊ່ວຍເຫຼືອຊາວເຜົ່າແລນແຕນ.

ຊາວເຜົ່າແລນແຕນ ແຂວງຫລວງນ້ຳທາ ເປັນໜຶ່ງໃນບັນດາເຜົ່າທີ່ສາມາດຜະລິດແພເປັນຂອງຕົນເອງໄດ້. ງານແຟຊັນໂຊທີ່ຈັດໂດຍ Her Works ພາຍໃຕ້ຄຳຂັວນ “ມອບຮັກແດ່ແລນແຕນ” ບໍ່ແມ່ນງານແຟຊັນໂຊທຳມະດາທົ່ວໄປ ແຕ່ເປັນການຈັດງານທີ່ມີຈຸດປະສົງເພື່ອປະກອບສ່ວນໃນການຊ່ວຍສົ່ງເສີມຊົນເຜົ່າໃນການຕ່ຳແຜ່ນແພ, ພັດທະນາທັກສະ ແລະ ຊີວິດຂອງຊາວເຜົ່າແລນແຕນ.

ສາວ ຕັອດ ລີນ້າ

ໃນງານແຟຊັນໂຊນີ້ ຈະມີການລະດົມທຶນເພື່ອໃຊ້ເຂົ້າໃນການຈ້າງນັກອອກແບບເພື່ອຊ່ວຍເຫຼືອຊ່າງສີມືໃນການສ້າງສັນຜົນງານໃໝ່ໆຂອງພວກເຂົາໃນອະນາຄົດ. ກິດຈະກຳນີ້ມີເປົ້າໝາຍເພື່ອເສີມສ້າງຄວາມຮູ້ຂອງຊ່າງສີມືຈາກຊົນເຜົ່າດັ່ງກ່າວ ກ່ຽວກັບຕະຫຼາດໃນປັດຈຸບັນ ແລະ ເຮັດໃຫ້ພວກເຂົາສາມາດປະດິດຜະລິດຕະພັນຕ່າງໆໃຫ້ກົງກັບຄວາມຕ້ອງການຂອງຕະຫຼາດ ແຕ່ຄົງໄວ້ເຊິ່ງເອກະລັກຂອງງານສີມືຂອງພວກເຂົາ. ພ້ອມນີ້ ກິດຈະກຳດັ່ງກ່າວນີ້ ຈະສ້າງໃຫ້ຊຸມຊົນຂອງຊົນເຜົ່າມີໂອກາດທາງດ້ານທຸລະກິດ ເພື່ອໃຫ້ມີຊີວິດການເປັນຢູ່ທີ່ດີຂຶ້ນ ແລະ ຊຸກຍູ້ການສຶກສາຂອງເດັກນ້ອຍ.

ສາວ ຫຼິງຫຼິງ ປິຍະດາ

ໂດຍງານນີ້ ກໍ່ໄດ້ ສາວ ຫຼິງຫຼິງ ປິຍະດາ ນາງແບບຜູ້ມີຊື່ສຽງ ແລະ ປະສົບການຜ່ານງານເວທີມາເປັນຢ່າງຫຼວງຫຼາຍ ປະສານພະລັງກັບໂຕແມ່ແຫ່ງວົງການແຟຊັນລາວສາວ ຕັອດ ລີນ້າ ຜູ້ຢູ່ເບື້ອງຫຼັງເວທີແຟຊັນຕ່າງໆເຊັ່ນ ລາວຊູເປີໂມເດວ ແລະ ລາວແຟຊັນວີກ ເປັນຕົ້ນ ມາຮ່ວມເຜີຍແຜ່ມອບຄວາມຮັກ ແລະ ຄວາມງົດງາມຂອງເຄື່ອງນຸ່ງຫົ່ມ ໃນງານແຟຊັນໂຊ ມອບຮັກແດ່ແລນແຕນ ໃນຄັ້ງນີ້.

LOVE FOR LANTAN

CR:Muan.Sanook
Credit Picture: Her Works