ຜູ້ນໍາເກົາຫຼີເໜືອຈະເດີນທາງດ້ວຍລົດໄຟຢ້ຽມຢາມຫວຽດນາມ

225

ລັດຖະບານຮາໂນ່ຍກໍາລັງເລັ່ງກຽມການຕ້ອນຮັບ ທ່ານ ຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອໃ ນການເດີນທາງມາຢ້ຽມຢາມຫວຽດນາມດ້ວຍລົດໄຟ ແລະ ຕໍ່ດ້ວຍລົດໃຫຍ່ມາເຖິງນະຄອນຫຼວງຮາໂນ່ຍ ເພື່ອປະຊຸມກັບປະທານາທິບໍດີໂດນັລ ທຣຳ ຜູ້ນໍາສະຫະລັດ ໃນທ້າຍສິ້ນເດືອນກຸມພາ ນີ້.

ສໍານັກຂ່າວຕ່າງປະເທດລາຍງານຈາກນະຄອນຫຼວງຮາໂນ່ຍ ປະເທດຫວຽດນາມ ເມື່ອວັນພະຫັດ ທີ 21 ກຸມພາ ໂດຍອ້າງຂໍ້ມູນຈາກແຫຼ່ງຂ່າວທີ່ກ່ຽວຂ້ອງກັບການກຽມວຽກງານດ້ານໂລຈິສຕິກ ແລະ ຄວາມປອດໄພ ວ່າ ຫຼາຍຝ່າຍໃນຫວຽດນາມກໍາລັງເລັ່ງກຽມອໍານວຍຄວາມສະດວກໃຫ້ກັບ ທ່ານ ຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ ແລະ ຄະນະໃນການເດີນທາງມາຢ້ຽມຢາມຫວຽດນາມ ທີ່ໃຊ້ການຄົມມະນາຄົມທາງບົກ ໂດຍສານດ້ວຍຂະບວນລົດໄຟ ເຊິ່ງແຕກຕ່າງຈາກການປະຊຸມຄັ້ງທໍາອິດ ກັບປະທານາທິບໍດີໂດນັລ ທຣຳ ປະເທດສິງກະໂປ ເມື່ອເດືອນມິຖຸນາ ປີຜ່ານມາ ທີ່ຜູ້ນໍາເກົາຫຼີເໜືອ ແລະ ຄະນະເດີນທາງດ້ວຍຍົນ.

ທັງນີ້ ຖ້າຕ້ອງການເດີນທາງເຖິງນະຄອນຫຼວງຮາໂນ່ຍຕາມກໍານົດ ຄືພາຍໃນວັນທີ 25 ກຸມພາ ນີ້ ຜູ້ນໍາເກົາຫຼີເໜືອ ແລະ ຄະນະຕ້ອງອອກເດີນທາງລ່ວງໜ້າຢ່າງນ້ອຍ 2 ມື້ເຄິ່ງ ຈາກນະຄອນຫຼວງປຽງຢາງ ຜ່ານປະເທດຈີນ ແລະ ຂະບວນລົດໄຟຈະສິ້ນສຸດທີ່ຈຸດຜ່ານແດນ ໃນເມືອງດົ່ງດາງ ແຂວງຫຼັ່ງເຊີນ ທາງພາກເໜືອຂອງປະເທດຫວຽດນາມ ຕໍ່ຈາກນັ້ນ ທ່ານ ຄິມ ຈອງ-ອຶນ ແລະ ຄະນະ ຈະເດີນທາງຕໍ່ດ້ວຍລົດໃຫຍ່ອີກ ປະມານ 170 ກິໂລແມັດ ມາເຖິງນະຄອນຫຼວງຮາໂນ່ຍ.

ຂະນະທີ່ ສະຖານທີ່ຈັດກອງປະຊຸມລະຫວ່າງ ຜູ້ນໍາສູງສຸດຂອງເກົາຫຼີເໜືອ ກັບ ປະທານາທິບໍດີໂດນັລ ທຣຳ ຜູ້ນໍາສະຫະລັດ ລະຫວ່າງວັນທີ 27-28 ກຸມພາ ນີ້ ມີລາຍວງານວ່າ ສະຖານທີ່ປະຊຸມ ອາດຈະເປັນທຳນຽບລັດຖະບານຫວຽດນາມ ເຊິ່ງເປັນສະຖາປັດຕະຍະກໍາເກົ່າແກ່ ຕັ້ງແຕ່ສະໄໝອານານິຄົມ ຫຼື ໂຮງແຮມເມໂທຣໂພລ ຫຼື ໂຮງແຮມເມເລຍ ທີ່ຕັ້ງຢູ່ບໍ່ໄກຈາກທຳນຽບລັດຖະບານ.

ນອກຈາກນີ້ ມີລາຍງານດ້ວຍວ່າ ທ່ານ ຄິມ ຈອງ-ອຶນ ໄດ້ປ່ຽນຄະນະທີມງານຜູ້ຕິດຕາມ ໃນການຢ້ຽມຢາມຫວຽດນາມຄັ້ງນີ້ ເກືອບທັງໝົດ.