ຄົ້ນພົບແຫຼ່ງແກັສ ຂະໜາດໃຫຍ່ເທິງເກາະສຸມາຕຣາ ປະເທດອິນໂດເນເຊຍ

274

ເລບໂຊບ ບໍລິສັດພະລັງງານລາຍໃຫຍ່ຂອງປະເທດສະເປນ ປະກາດການຄົ້ນພົບແຫຼ່ງແກັສທໍາມະຊາດຂະໜາດໃຫຍ່ ໃນແຂວງສຸມາຕຣາໃຕ້ ປະເທດອິນໂດເນເຊຍ ຮ່ວມກັບ 2 ບໍລິສັດຫຸ້ນສ່ວນຄື ເປໂຕຣນາສ ຂອງປະເທດມາເລເຊຍ ແລະ ມິດຊຸຍ ອອຍ ເອັກຊ໌ໂປລເຣຊັ່ນ (ໂມເອໂກະ) ຂອງປະເທດຍີ່ປຸ່ນ.

ສໍານັກຂ່າວເອເອັຟພີລາຍງານຈາກນະຄອນຫຼວງມາດຣິດ ປະເທດສະເປນ ເມື່ອວັນອັງຄານ ທີ 19 ກຸມພາ ວ່າ ຖະແຫຼງການຂອງບໍລິສັດເລບໂຊບ ຈາກສໍານັກງານໃຫຍ່ໃນນະຄອນຫຼວງມາດຣິດ ເມື່ອວັນອັງຄານ ລະບຸວ່າ ການຄົ້ນພົບໃນແຂວງສຸມາຕຣາໃຕ້ເປັນການຄົ້ນພົບ ແຫຼ່ງແກັສທໍາມະຊາດຂະໜາດໃຫຍ່ສຸດ ໃນຮອບ 18 ປີ ຂອງອິນໂດເນເຊຍ ແລະ 1 ໃນ 10 ແຫຼ່ງ ທີ່ໃຫຍ່ສຸດຂອງໂລກ ໃນໄລຍະ 12 ເດືອນຫຼ້າສຸດ.

ບໍລິສັດເລບໂຊບ ໃນຖານະຜູ້ປະກອບການຖືຫຸ້ນ 45% ສ່ວນເປໂຕຣນາສ ຖືຫຸ້ນ 45% ແລະ ໂມເອໂກະ ຖືຫຸ້ນສ່ວນທີ່ເຫຼືອ 10%.

ຈາກການປະເມີນຂອງບໍລິສັດເລບໂຊບ ແຫຼ່ງພະລັງງານທີ່ຄົ້ນພົບໃໝ່ ມີປະລິມານແກັສທໍາມະຊາດຢູ່ຢ່າງໜ້ອຍ 57.000 ລ້ານຄິວບິກແມັດ.

ບໍລິສັດເລບໂຊບ ຖືສັນຍາສໍາປະທານຫຼາຍໃບ ໃນອິນໂດເນເຊຍ ເຊິ່ງເປັນປະເທດທີ່ທາງບໍລິສັດເນັ້ນການລົງທຶນສໍາຫຼວດໃນອາຊີຕາເວັນອອກສຽງໃຕ້.