ເກີດເຫດ ຍົນໂດຍສານ ໄລອ້ອນ ແອຣ໌ ແລ່ນໄຖອອກນອກຣັນເວ

935

ຍົນໂດຍສານຂອງສາຍການບິນໄລອ້ອນ ແອຣ໌ ແລ່ນໄຖອອກນອກຣັນເວ ທີ່ເກາະບໍແນວປະເທດອິນໂດເນເຊຍ ຂະນະຝົນກຳລັງຕົກຢ່າງໜັກ ແຕ່ໂຊກດີບໍ່ມີໃຜໄດ້ຮັບບາດເຈັບ.

ສໍານັກຂ່າວຣອຍເຕີລາຍງານຈາກປະເທດອິນໂດເນເຊຍ ເມື່ອວັນເສົາ ທີ 16 ກຸມພາ ວ່າ ໂຄສົກຂອງສາຍການບິນໄລອ້ອນ ແອຣ໌ ຖະແຫຼງການວ່າ ຍົນໂດຍສານໂບອິ້ງ 737-800 NG ຂອງສາຍການບິນໄລອ້ອນ ແອຣ໌ ຖ້ຽວບິນລະຫວ່າງຈາກາຕ້າ ກັບ ປອນເຕີຍນັກ ເທິງເກາະບໍແນວ (island of Borneo) ເກີດອຸບັດເຫດແລ່ນໄຖອອກນອກຣັນເວ ຂະນະພະຍາຍາມລົງຈອດທີ່ສະໜາມບິນຊູປາດິໂອ ນອກເມືອງປອນເຕຍນັກ ເມື່ອວັນເສົາ ທີ 16 ກຸມພາ ລະຫວ່າງສະພາບຝົນທີ່ຕົກລົງມາຢ່າງໜັກ ແຕ່ຜູ້ໂດຍສານ 182 ຄົນ ແລະ ເຈົ້າໜ້າທີ່ຂອງສາຍການບິນ 7 ຄົນ ປອດໄພ ບໍ່ມີໃຜໄດ້ຮັບບາດເຈັບ.

ສໍາລັບສະໜາມບິນຊູປາດິໂອ ແຂວງເວລກາລິມັນຕັນ ເທິງເກາະບໍແນວ ປະເທດອິນໂດເນເຊຍ ຖືເປັນສູນກາງດ້ານການບິນໃນລະດັບພາກພື້ນ ແຕ່ໃຫ້ບໍລິການໜ້ອຍຫຼາຍສໍາລັບຖ້ຽວບິນລະຫວ່າງປະເທດ.

ສື່ທ້ອງຖິ່ນລາຍງານດ້ວຍວ່າ ອຸບັດຕິເຫດຄັ້ງນີ້ ເຮັດໃຫ້ຕ້ອງປິດຣັນເວສະໜາມບິນ ເຊິ່ງຕົວແທນຂອງສະໜາມບິນ ແລະ ແອຣ໌ເນຟ (AirNav) ຜູ້ໃຫ້ບໍລິການດ້ານການຈະລາຈອນທາງອາກາດຂອງອິນໂດເນເຊຍກໍ່ຍັງບໍ່ໄດ້ໃຫ້ຄວາມເຫັນເທື່ອ.

ສາຍການບິນໄລອ້ອນ ແອຣ໌ ເຄີຍປະສົບອຸບັດເຫດຮ້າຍແຮງເປັນຍົນໂດຍສານໂບອິ້ງ 737 ແມັກຊ໌ ຕົກໃນທະເລຊະວາ ເມື່ອເດືອນຕຸລາ ປີຜ່ານມາແລ້ວ ເຮັດໃຫ້ມີຜູ້ເສຍຊີວິດ 189 ຄົນ ແລະ ຕາມລາຍງານຂອງເຄືອຂ່າຍຄວາມປອດໄພການບິນ ລະບຸວ່າ ຕັ້ງແຕ່ປີ 2002 ເປັນຕົ້ນມາ ໄລອ້ອນ ແອຣ໌ ມີອຸບັດເຫດມາແລ້ວ 11 ຄັ້ງ.

CR: gulf-times