ແຂວງໃໝ່ໄຊສົມບູນກໍມີສະຖານທີ່ທ່ອງທ່ຽວຫຼາຍແຫ່ງໜ້າສົນໃຈ

615

ແຂວງ​ໄຊ​ສົມບູນ ​ເວົ້າ​ໄດ້​ວ່າ​ເປັນ​ແຂວງ​ທີ່​​ໄດ້​ຮັບ​ການ​ພັດທະນາ​ການທ່ອງທ່ຽວ​ຢູ່​ເລື້ອຍໆ​ຈົນ​ເປັນ​ທີ່​ສົນ​ໃຈ​ຂອງ​ນັກ​ທ່ອງ​ທ່ຽວ​ທັງ​ພາຍ​ໃນ ​ແລະ ຕ່າງປະ​ເທດ. ​ໂດຍ​ສະ​ເພາະ​ແມ່ນທຳມະຊາດທີ່ມີຄວາມອຸດົມ ສົມບູນ, ສວຍສົດງົດງາມ ແລະ ພິເສດມີພູເບ້ຍ ພູທີ່ສູງກວ່າໝູ່ໃນປະເທດລາວແມ່ນຕັ້ງຢູ່ແຂວງດັ່ງກ່າວ.  

ในภาพอาจจะมี ท้องฟ้า, ต้นไม้, ต้นพืช, สถานที่กลางแจ้ง, ธรรมชาติ และน้ำ

ສ່ວນສະຖານທີ່ທ່ອງທ່ຽວຫຼັກໆທີ່ສຳຄັນຂອງແຂວງມີ: ຖ້ຳເຈົ້າອະນຸວົງ, ຜາພະເຈົ້າ, ພູເບ້ຍ, ຕາດນ້ຳຍອງ, ຕາດພະແຈແຫຼ້, ຕາດປຸ່ງ, ສັນພູໝອກ, ເຮືອນເກົ່າວາງປາວ, ສິມວັດຈອມແຈ້ງ, ອ່າງນ້ຳງື່ມສອງ, ເດີ່ນບິນເກົ່າເມືອງລ້ອງແຈ້ງ, ຕາດຫ້ວຍນົກ ແລະ ອື່ນໆ. ​ລວມມີ 86 ແຫ່ງ, ໃນນີ້ຈະນໍາສນະເໜີແຫຼ່ງທ່ອງທ່ຽວທີ່ເປີດໃຫ້ບໍລິການແລ້ວ 5 ແຫ່ງໃຫ້ທ່ານໄດ້ຮັບຮູ້ເປັນພື້ນຖານດັ່ງນີ້:

ນ້ຳຕົກຕາດພະແຈ​ແຫຼ້
ເປັນນ້ຳຕົກຕາດຈາກພູຜາທີ່ສູງຊັນ ແລະ ມີນ້ຳໄຫຼຕະຫຼອດປີ, ມີຄວາມສູງປະມານ 100 ແມັດ, ບໍລິເວນອ້ອມຮອບຂອງນ້ຳຕົກຕາດມີຄວາມອຸດົມສົມບູນໄປດ້ວຍພືດພັນນາໆຊະນິດ, ມີປ່າໄມ້ຂຽວງາມ, ອາກາດຊົດຊື່ນເຢັນສະບາຍ. ຕາມ​ການບອກ​ເລົ່າ​ຂອງທ່ານ ຈົ່ງ​ລໍ່ທໍ່​ເພຍ​ຫຼວງ ​ໄດ້​ເວົ້າ​ສູ່​ຟັງ​ວ່າ: ​ໃນ​ປີ 1980 ໄດ້​ມີ​ປະຊາຊົນ​​ພົບ​ເຫັນ​ພະ​ອົງ​ໜຶ່ງທີ່ຢູ່​ໃກ້ນ້ຳຕົກຕາດ​ແຫ່ງ​ນີ້ ເຊິ່ງ​ເປັນພະສີດຳ​ມີຫຼາຍ​ແຈ ນັບຕັ້ງ​ແຕ່ນັ້ນ​ມາ​ປະຊາຊົນເຂດດັ່ງກ່າວ ​ຈຶ່ງ​ໄດ້​ເອີ້ນ​ຊື່​ຕາດ​ນີ້​ວ່າ: ‘‘ນ້ຳຕົກຕາດພະ​ແຈ​ແຫຼ້’’ ມາຈົນ​ເຖິງ​ທຸກ​ວັນນີ້.

ในภาพอาจจะมี ต้นพืช, ต้นไม้, สถานที่กลางแจ้ง, ธรรมชาติ และน้ำ
ນ້ຳຕົກຕາດພະແຈ​ແຫຼ້

ນ້ຳຕົກຕາດພະແຈແຫຼ້ ຕັ້ງຢູ່ບ້ານ ນ້ຳຄຽນ ຫ່າງຈາກເທດສະບານເມືອງຮົ່ມ ປະມານ 6 ກິໂລ ແມັດ, ທິດ​ເໜືອຕິດກັບ​ບ້ານ​ອ່າວ​ໃຕ້, ທິດ​ໃຕ້​ຕິດກັບ​ບ້ານນ້ຳຄຽນ, ທິດຕາ​ເວັນ​ອອກ​ຕິດ​ກັບ​ພູສາ​ມ​ເສົ້າ ​ແລະ ທິດ​ໃຕ້​ຕິດ​ກັບ​ບ້ານ​ຊຽງມີ. ການເຂົ້າເຖິງແມ່ນມີຄວາມສະດວກສະບາຍ ສາມາດນຳໃຊ້ລົດຈັກ ແລະ ລົດໃຫຍ່ເຂົ້າເຖິງໄດ້.

ນ້ຳຕົກຕາດຍອງ
ນ້ຳຕົກຕາດຍອງ ເປັນນ້ຳຕົກຕາດ 3 ຊັ້ນຕິດຕໍ່ກັນ ເຊິ່ງມີຄວາມສູງປະມານ 30 ແມັດ.​​ ໃນ​ເມື່ອ​​ກ່ອນ​ປະຊາຊົນ​ເຂດດັ່ງກ່າວເຊື່ອຖື​ກັນວ່າ: ນ້ຳຕົກຕາດ​ຍອງ ເປັນ​ສະຖານທີ່​ສັກສິດ ແລະ ເປັນບ່ອນສັກ ກະ​ລະ​ບູຊາ​ຂອງ​ຊາວບ້ານທັງຫຼາຍ, ເພາະວ່າທຸກວັນ​ສິນ 15 ຄ່ຳຈະໄດ້ຍິນ​ສຽງ​ຄ້ອງ​, ສຽງ​ກອງ​ດັງອອກມາຈາກຮ່ອມພູຂອງນ້ຳຕົກ​ຕາດ​ດັ່ງກ່າວ ແລະ ຕາມການບອກເລົ່າຂອງຜູ່​ເຖົ້າ​ຜູ່ແກ່​ອາວຸ​ໂສໄດ້​ເລົ່າສູ່ຟັງວ່າ: ໃນເມື່ອກ່ອນນ້ຳຕົກຕາດຍອງ ​ເປັນ​ສະຖານ​ທີ່ປະຕິ​ບັດ​ທຳທາງ​ພຸດທະ​ສາສະໜາຂອງພະສົງ. ນອກນັ້ນ ປະຊາຊົນຍັງພົບເຫັນຮອຍຕີນຄົນບູຮານ ແລະ ຮອຍຕີນໝາຕິດຢູ່ພະລານຫີນຢູ່ຕີນຕາດຊັ້ນທີ 2.

ในภาพอาจจะมี สถานที่กลางแจ้ง, ธรรมชาติ และน้ำ

ນ້ຳຕົກຕາດຍອງ ຕັ້ງຢູ່ບ້ານປາກຍອງ ເມືອງທ່າໂທມ ແຂວງໄຊສົມບູນ ແລະ ນອນຢູ່ໃນເຂດປ່າສະຫງວນຂອງບ້ານ ເຊິ່ງຫ່າງຈາກເສັ້ນທາງເລກ 1 ປະມານ 2 ກິໂລແມັດ, ເສັ້ນທາງເຂົ້າເຖິງເປັນທາງດິນແດງ, ສະດວກສະບາຍໃນການເຂົ້າເຖິງໄດ້ທັງສອງລະດູ ແລະ ສາມາດນ້ຳໃຊ້ລົດທຸກປະເພດ.

ນ້ຳຕົກຕາດປຸ່ງ
ເປັນນ້ຳຕົກຕາດທີ່ອຸດົມສົມບູນ​ໄປ​ດ້ວຍ​ຊັບພະຍາກອນ​ປ່າ​ໄມ້ພືດພັນນາໆຊະນິດ, ມີສັດ​ບົກ ແລະ ສັດ​ນ້ຳ​ອາ​ໄສຢູ່ເປັນຈຳນວນ​ຫຼວງ​ຫຼາຍ, ຕາດດັ່ງກ່າວຖືກຄົ້ນພົບໃນປີ 1990. ຕອນ​ລຸ່ມຂອງ​ຕາດ​ນີ້​ມີ​ບໍ່ນ້ຳ ຫຼື ບວກ​ນ້ຳເຄັມ​ເຊິ່ງ​ເອີ້ນ​ອີກຄຳ​ເວົ້າ​ໜຶ່ງ​ວ່າ​: “ປຸ່ງ” ມີຄວາມກວ້າງປະມານ 4-5 ​ແມັດ​ມົນທົນ. ໃນເມື່ອກ່ອນປະກົດ​ວ່າ​ມີ​ຝູງ​ສັດປ່າ​ຈຳພວກ: ຊ້າງ, ໝີ, ​ເໝີຍ, ກວາງ, ໝູ​ປ່າ ແລະ ນົກ​ໜູ​ນາໆ​ຊະນິດລົງ​ມາ​ກິນ ນໍ້າ ​ແລະ ດິ​ນທີ່​ເຄັມ​ໃນປຸ່ງແຫ່ງນີ້, ດັ່ງນັ້ນ ປະຊາຊົນໃນເຂດດັ່ງກ່າວ ຈຶ່ງໃສ່ຊື່ນ້ຳຕົກຕາດແຫ່ງນີ້ວ່າ​: “ນໍ້າ​ຕົກຕາດປຸ່ງ”.

ในภาพอาจจะมี ต้นพืช, สถานที่กลางแจ้ง, ธรรมชาติ และน้ำ
ນ້ຳຕົກຕາດປຸ່ງ

ນ້ຳຕົກຕາດປຸ່ງ ຕັ້ງຢູ່ບ້ານນ້ຳຄຸຍ, ເມືອງລ້ອງຊານ ຫ່າງ​ຈາກ​ຕົວ​ເມືອງປະມານ 3 ກິໂລແມັດ, ສາມາດເຂົ້າເຖິງໄດ້ຍ່າງສະດວກສະບາຍ ແລະ ເປີດບໍລິການແກ່ນັກທ່ອງທ່ຽວເຂົ້າໄປທ່ຽວຊົມທຸກໆວັນ ເລີ່ມແຕ່ 8:30 ເຊົ້າຫາ 18:00 ໂມງ.

ຜາພະເຈົ້າ
ຕັ້ງຢູ່ບ້ານພູຫົວຊ້າງ ເມືອງອະນຸວົງ ເປັນຜາທຳມະຊາດທີ່ສວຍງາມມີຄວາມສູງປະມານ 313​ ແມັດ, ລວງຮອບ 400 ແມັດ, ເນື້ອທີ່ 4 ເຮັກຕາ. ໃນ​ເມື່ອ​ກ່ອນສະໄຫມເຈົ້າອານຸວົງເຮັດເສິກກັບສະຫຍາມກໍ່ໄດ້ມາລີ້ໄພຢູ່ຜານີ້ ເພາະມີຄວາມເຊື່ອວ່າຖ້າຜູ້ໃດມາລີ້ຢູ່ນີ້ຈະບໍ່ມີໃຜຊອກເຫັນເນື່ອງຈາກວ່າຄົນສະໄຫມບູຮານໄດ້ຖືເອົາຜານີ້ເປັນສະຖານທີ່ບວງສວງຜີຟ້າ, ຜີແຖນ, ຜີປ່າ ແລະ ຜີດົງ; ຜານີ້ຈຶ່ງມີຄວາມສັກສິດ ແລະ ເປັນບ່ອນເຄົາລົບບູຊາທາງສາສະໜາ ຂອງປະຊາຊົນລາວບັນດາເຜົ່າຈົນຮອດປະຈຸບັນ ຍ້ອນຄວາມສັກສິດຄືແນວນັ້ນເພິ່ນຈຶ່ງເອີ້ນຜານີ້ວ່າ: ຜາພະເຈົ້າ.

ในภาพอาจจะมี ท้องฟ้า, สถานที่กลางแจ้ง, ธรรมชาติ และน้ำ

ສຳລັບເສັ້ນທາງເຂົ້າຫາຜາພະເຈົ້າ ​ແມ່ນ​ຢູ່​ເຂດເທດສະບານເມືອງອະນຸວົງ ເມື່ອຂີ່ລົດກາຍຈາກໂຮງແຮມພູເບ້ຍ ຈະມີເສັ້ນທາງຍ່າງເຂົ້າໄປໃນໝູ່ບ້ານ ແລະ ຈະມີທາງຂຶ້ນໄປເທິງຜາພະເຈົ້າ ເຊິ່ງໄລຍະທາງຂຶ້ນໄປເຖິງບ່ອນຊົມວີວ ປະມານ 200 m.

ຕາດ​ພູ​ຫຍ້າ​ເຖົ້າ
ນ້ຳຕົກຕາດພູ​ຫຍ້າ​​ເຖົ້າ ແມ່ນ​ນ້ຳຕົກຕາດ​ທຳ​ມະ​ຊາດ​ທີ່​ສວຍ​ງາມ​ຕັ້ງ​ຢູ່​ບ້ານ​ທົ່ງ​ຄູນ ​ຕາມ​ເສັ້ນທາງ5B ຫ່າງ​ຈາກ​ເທດສະບານເມືອງອານຸວົງໄປ​ທາງ​ທິດຕາ​ເວັນຕົກ. ຕາດ​ແຫ່ງ​ນີ້ມີ​ຄວາມ​ຍາວ​ປະມານ 40 ແມັດ. ​​ໃນ​ລະຫວ່າງປີ 1992-1995 ທ່ານ ​ພັນ​ເອກ​ ສີມາ ເປັນ​ເຈົ້າ​ເມືອງ​ ເພິ່ນ​ໄດ້​ໄປ​ບູລະນະ​ໃຫ້​ສາມາດ​​ໄປ​ທ່ອງ​ທ່ຽວ​ໄດ້​ໃນ​​ວັນພັກລັດຖະການ ​ແລະ ໃນ​ວັນ​ບຸນ​ຕ່າງໆກໍ່ມີ​ຄົນໄປ​ທ່ອງ​ທ່ຽວຈົນ​ເຖິງ​ທຸກ​ວັນ​ນີ້.

ในภาพอาจจะมี ต้นพืช, สถานที่กลางแจ้ง, ธรรมชาติ และน้ำ
ຕາດ​ພູ​ຫຍ້າ​ເຖົ້າ

ຕາດພູຫຍ້າເຖົ້າ ຫ່າງຈາກເທດສະບານເມືອງອະນຸວົງ ປະມານ 5 ກິ​ໂລ​ແມັດ, ສາມາດເຂົ້າໄປທ່ຽວໃນຕາດໄດ້ດ້ວຍພະຫະນະລົດທຸກ​ຊະນິດ ເມື່ອເດີນທາງເຖິງສະຖານທີ່ຈອດລົດຈະມີທາງຍ່າງເຂົ້າຫາຕາດພູຫຍ້າເຖົ້າ.

ໃນ 5 ແຫຼ່ງທ່ອງທ່ຽວທີ່ນໍາສະເໜີມານັ້ນ ເປັນພຽງສ່ວນໜຶ່ງຂອງສະຖານທີ່ທ່ອງທ່ຽວໃນແຂວງໄຊສົມບູນ ແລະ ແນ່ນອນຄົງບໍ່ອາດອະທິບາຍເຖິງຄວາມສວຍງາມ, ຄວາມໜ້າຫຼົງໄຫຼໃນມົນສະເໜ່ທໍາມະຊາດ ແລະ ຄວາມຊື່ນຊອບປະທັບໃຈຢ່າງໃດ ນອກຈາກທີ່ໄດ້ໄປສໍາຜັດດ້ວຍຕົນເອງເທົ່ານັ້ນ.