ເສືອດໍາປະກົດຕົວໃນທະວີບອາຟຣິກາເປັນຄັ້ງທໍາອິດ ໃນຮອບ 100 ປີ

587

ທີມນັກວິໄຈຂອງສະຫະລັດ ແລະ ຊ່າງພາບອິດສະລະຊາວອັງກິດ ສາມາດບັນທຶກພາບເສືອດໍາໂຕໜຶ່ງໄດ້ ພາຍໃນໄລຍະເວລາໃກ້ຄຽງກັບບໍລິເວນເຂດອານຸລັກທາງພາກກາງຂອງປະເທດເຄນຢາ ຖືເປັນຫຼັກຖານທາງວິທະຍາສາດຄັ້ງທໍາອິດ ໃນຮອບ 100 ປີ ວ່າ ຍັງມີເສືອດໍາອາໄສຢູ່ໃນທະວີບ.

ສໍານັກຂ່າວຕ່າງປະເທດລາຍງານຈາກນະຄອນຫຼວງໄນໂຣບີ ປະເທດເຄນຢາ ເມື່ອວັນທີ 14 ກຸມພາ ວ່າ ວາລະສານລະບົບນິເວດວິທະຍາ ອາຟຣິກັນ ສະບັບປະຈໍາເດືອນມັງກອນ ທີ່ຜ່ານມາ ເຜີຍແຜ່ຜົນງານການວິໄຈຂອງ ທ່ານ ນິໂຄລາສ ພິນໂຟລດ໌ ຈາກມະຫາວິທະຍາໄລຊານດິເອໂກ ໃນລັດແຄລິຟໍເນຍ ຂອງສະຫະລັດ ວ່າ ຕົນ ແລະ ທີມງານ ໄດ້ຕັ້ງກ້ອງບັນທຶກພາບໃນໄລຍະຫ່າງໄກ ພາຍໃນອານາບໍລິເວນຂອງເຂດອານຸລັກລອຍຊາບາ ທາງຕອນກາງຂອງປະເທດເຄນຢາ ເຊິ່ງສາມາດບັນທຶກຮູບຖ່າຍ ແລະ ພາບເຄື່ອນໄຫວຂອງເສືອດໍາໂຕໜຶ່ງໄດ້ດ້ວຍຄວາມບັງເອີນ ເມື່ອໄລຍະຕົ້ນປີຜ່ານມາ.

ເລື່ອງລາວດັ່ງກ່າວສ້າງຄວາມຍິນດີເປັນຢ່າງຍິ່ງ ໃຫ້ແກ່ບັນດານັກອານຸລັກເນື່ອງຈາກສະທ້ອນໃຫ້ເຫັນຄວາມອຸດົມສົມບູນຂອງຜືນປ່າເຂດນີ້ ແລະ ແນ່ນອນວ່າ ເສືອດໍາເປັນໜຶ່ງໃນສັດປ່າໃກ້ສູນພັນ ແລະ ຄວນຄ່າຢ່າງຍິ່ງແກ່ການອານຸລັກ ຂະນະດຽວກັນ ທ່ານ ວິລ ເບີຣາດ-ລູຄັສ ຊ່າງພາບອິດສະລະຊາວອັງກິດ ເຜີຍແຜ່ພາບເສືອດໍາໂຕໜຶ່ງ ເຊິ່ງລາວສາມາດບັນທຶກໄວ້ໄດ້ ໃນບໍລິເວນດຽວກັບທີມງານຂອງ ພິນໂຟລດ໌ ດ້ວຍ ເຖິງຍັງບໍ່ຊັດເຈນວ່າ ມັນເປັນໂຕດຽວກັນ ຫຼື ບໍ່ ແຕ່ຖືເປັນການຢືນຢັນກະແສຂ່າວຈາກຫຼາຍຝ່າຍລວມເຖິງຊາວບ້ານໃນບໍລິເວນນັ້ນ ວ່າ ມີການພົບເຫັນເສືອດຳອອກມາຍ່າງເລາະຢູ່ເປັນໄລຍະ.

ນອກຈາກນີ້ ຂໍ້ມູນຈາກທັງສອງຝ່າຍຍັງເປັນ “ຫຼັກຖານທີ່ມີມູນຄວາມຈິງ” ອັນທໍາອິດວ່າ ຍັງມີເສືອດໍາອາໄສຢູ່ໃນທະວີບອາຟຣິກາ ນັບຕັ້ງແຕ່ຫຼັກຖານຢືນຢັນພາບຖ່າຍເສືອດໍາທີ່ປ່າແຫ່ງໜຶ່ງ ໃນນະຄອນຫຼວງແອດດິສ ອາບາບາ ປະເທດເອທິໂອເປຍ ເມື່ອປີ 1919 ອີກປະການໜຶ່ງບໍລິເວນທີ່ມີການພົບຄວາມເຄື່ອນໄຫວຂອງເສືອດໍາໃນຄັ້ງນີ້ ຍັງເປັນພື້ນທີ່ໃກ້ຄຽງກັບກອງຖ່າຍຮູ້ເງົາຂອງ ມາເວລ ທີ່ກວດລາຍໄດ້ມະຫາສານ ເມື່ອປີຜ່ານມາ ເລື່ອງ “ແບລັກ ແພນເທີ”  ທີ່ເຄີຍມາປັກຫຼັກຖ່າຍທຳດ້ວຍ.

PIC: IG: Will Burrard-Lucas