ທ່ານນາຍົກ ເນັ້ນຄົ້ນຄວ້າຫຼຸດລັດຖະກອນລົງເພີ່ມຄຸນນະພາບໃຫ້ຂຶ້ນ

368

ທ່ານນາຍົກ ທອງລຸນ ສີສູລິດ ໄດ້ເນັ້ນໃນຂະແໜງພາຍໃນເລັ່ງປັບປຸງຫຼາຍບັນຫາ ໂດຍສະເພາະການປັບປຸງການຈັດຕັ້ງບໍລິຫານລັດໃຫ້ກະທັດຮັດ, ໜັກແໜ້ນ, ເຂັ້ມແຂງ ແລະ ມີປະສິດທິຜົນ ພ້ອມຫຼຸດຈຳນວນລັດຖະກອນລົງ ແລະ ປັບປຸງຄຸນນະພາບ ເພື່ອເຮັດວຽກໃຫ້ມີປະສິດທິພາບສູງຂຶ້ນ.

ໃນໂອກາດເຂົ້າຮ່ວມ ແລະ ໂອ້ລົມຕໍ່ກອງປະຊຸມສະຫຼຸບວຽກງານຂະແໜງພາຍໃນ ແລະ ສະຫຼຸບການຈັດຕັ້ງປະຕິບັດວຽກງານ 3 ສ້າງ ປະຈຳປີ 2018 ແລະ ທິດທາງແຜນການ ປະຈຳປີ 2019 ໃນວັນທີ 13 ກຸມພາ 2019 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ທີ່ຜ່ານມານີ້. ທ່ານ ທອງລຸນ        ສີສຸລິດ ນາຍົກລັດຖະມົນຕີ ໄດ້ເນັ້ນໃຫ້ກະຊວງພາຍໃນເອົາໃຈໃສ່ຫຼາຍບັນຫາສຳຄັນ ຄື: ຄົ້ນຄວ້າກົງຈັກການຈັດຕັ້ງກອງປະຊຸມໃຫຍ່ຂອງພັກ ສະໄໝທີ XI ຈະມີແນວທາງປັບປຸງແນວໃດ, ອັນໃດເໝາະ ແລະ ອັນໃດບໍ່ທັນເໝາະສົມຕາມຈິດໃຈກະທັດຮັດ, ໜັກແໜ້ນ, ເຂັ້ມແຂງ ແລະ ມີປະສິດທິຜົນຮັບໃຊ້ປະຊາຊົນຢ່າງແທ້ຈິງ; ຄົ້ນຄວ້າຕໍາແໜ່ງງານ ແລະ ພະນັກງານໃຫ້ແທດເໝາະ ເພື່ອປັບປຸງກົງຈັກຂອງລັດຖະບານ ຊຸດທີ IX; ຄົ້ນຄວ້າຮ່ວມກັບກະຊວງຕ່າງໆແນໃສ່ຫັນຫົວໜ່ວຍວິຊາການໄປກຸ້ມຕົນເອງ; ສືບຕໍ່ອອກບັດລັດຖະກອນໃຫ້ສຳເລັດ ໃນປີ 2020; ຄົ້ນຄວ້າວິທີຄຸ້ມຄອງລັດຖະກອນໃຫ້ເປັນລະບົບທັນສະໄໝ; ກວດກາຊຸກຍູ້ການຈັດຕັ້ງປະຕິບັດມະຕິ, ຄຳສັ່ງຂອງນາຍົກລັດຖະມົນຕີ ວ່າດ້ວຍລັດຖະກອນ ໂດຍສົມທົບກັບສຳນັກງານນາຍົກລັດຖະມົນຕີ; ຖ້າມີການຮ້ອງຂໍຄວາມເປັນທຳເລື່ອງວຽກລັດຖະກອນ ຂໍໃຫ້ຕິດຕາມກວດກາແກ້ໃຫ້ຮູ້ວ່າມີແທ້ ຫຼື ບໍ ແລະ ສະເໜີວິທີແກ້ໄຂໃຫ້ສົມເຫດສົມຜົນຖືກຕ້ອງ ແລະ ທັນການ. ຖ້າເປັນໄປໄດ້ແມ່ນໃຫ້ແກ້ໄຂຢູ່ກັບທີ່ດ້ວຍ ຄວາມໂປ່ງໃສ ແລະ ຄົ້ນຄວ້າລະດົມນັກທຸລະກິດ ເພື່ອສ້າງຂະບວນການໃດໜຶ່ງແນໃສ່ລະດົມທຶນຊ່ວຍເຫຼືອເມືອງ – ບ້ານທີ່ທຸກຍາກໃຫ້ສາມາດຫຼຸດພົ້ນອອກຈາກຄວາມທຸກຍາກ.

ในภาพอาจจะมี 9 คน, ผู้คนกำลังนั่ง และสถานที่ในร่ม

ທ່ານກ່າວຕື່ມວ່າ: ສຳລັບຂົງເຂດວຽກງານລັດຖະກອນ ປັດຈຸບັນເຫັນວ່າຈຳນວນລັດຖະກອນມີທັງໝົດ 1,8 ແສນຄົນ, ຄົ້ນຄວ້າຫຼຸດຜ່ອນຈຳນວນພົນລັດຖະກອນໃຫ້ໄດ້ຕາມສັດສ່ວນທີ່ເໝາະສົມ ໂດຍເນັ້ນດ້ານຄຸນນະພາບ ແລະ ພັດທະນາໃຫ້ລັດຖະກອນມີຄຸນນະພາບສູງຂຶ້ນ, ຕິດຕາມ ແລະ ຊຸກຍູ້ບັນຈຸລັດຖະກອນໃໝ່ ປະຈຳປີ 2019 ຈຳນວນ 1.500 ຄົນ ທີ່ໄດ້ອະນຸມັດໄປແລ້ວ; ກວດກາຄືນຈຳນວນພົນ ແລະ ປະຫວັດຂອງລັດຖະກອນ, ສືບຕໍ່ຊຸກຍູ້ນຳໃຊ້ລະບົບການກວດຜ່ານບັນຊີຈຳນວນພົນເຊື່ອມຕໍ່ກັບບັນຊີເງິນເດືອນໃຫ້ເປັນບັນຊີດຽວ ແລະ ອອກບັດພະນັກງານລັດຖະກອນໃຫ້ສຳເລັດໃນທົ່ວປະເທດ.

ในภาพอาจจะมี หนึ่งคนขึ้นไป, ท้องฟ้า, ต้นไม้, สนามบาสเก็ตบอล, สถานที่กลางแจ้ง และธรรมชาติ

ກ່ອນໜ້ານີ້, ນາຍົກລັດຖະມົນຕີ ໄດ້ອອກຂໍ້ຕົກລົງ ວ່າດ້ວຍການແບ່ງຕົວເລກລັດຖະກອນໃໝ່ປີ 2019 ສະບັບເລກທີ 05/ນຍ ລົງວັນທີ 21 ມັງກອນ 2019 ຄື: ເຫັນດີອະນຸມັດແບ່ງຈຳນວນຕົວເລກລັດຖະກອນໃໝ່ ( ໂກຕາ ) ໃຫ້ບັນດາກະຊວງ, ອົງການຈັດຕັ້ງຂັ້ນສູນກາງ ແລະ ທ້ອງຖິ່ນ ໃນປີ 2019 ຈຳນວນ 1.500 ຄົນ. ສຳລັບບັນດາກະຊວງ, ອົງການທຽບເທົ່າກະຊວງ ຈຳນວນ 1.349 ຄົນ. ໃນນີ້, ກະຊວງສຶກສາທິການ ແລະ ກີລາ ( ລັດຖະກອນບໍລິຫານ ແລະ ລັດຖະກອນຄູ ) ຈຳນວນ 936 ຄົນ, ກະຊວງສາທາລະນະສຸກ ( ລັດຖະກອນບໍລິຫານ ແລະ ລັດຖະກອນແພດ ) ຈຳນວນ 220 ຄົນ, ກະຊວງກະສິກຳ ແລະ ປ່າໄມ້ ຈຳນວນ 33 ຄົນ, ກະຊວງການເງິນ ຈຳນວນ 25 ຄົນ,  ສ່ວນທີ່ເຫຼືອແມ່ນແບ່ງຕາມຄວາມເໝາະສົມຂອງແຕ່ລະກະຊວງ; ສະພາແຫ່ງຊາດ, ຫ້ອງວ່າການປະທານປະເທດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ ແລະ ອົງການກວດສອບແຫ່ງລັດ ຈຳນວນ 30 ຄົນ; ອົງການຈັດຕັ້ງພັກ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ຈຳນວນ 22 ຄົນ; ສະຖາບັນ, ພິພິທະພັນ, ສະຫະພັນ ແລະ ອົງການ ຈຳນວນ 10 ຄົນ; ບັນດາແຂວງ, ນະຄອນຫຼວງວຽງຈັນ ແລະ ເມືອງ ຈຳນວນ 89 ຄົນ.

ในภาพอาจจะมี หนึ่งคนขึ้นไป, ผู้คนกำลังนั่ง, หน้าจอ, สำนักงาน, ตาราง และสถานที่ในร่ม

ສະເພາະທະນາຄານ ແຫ່ງ ສປປ ລາວ ໃຫ້ກຳນົດຈຳນວນຕົວເລກລັດຖະກອນໃໝ່ຂອງຕົນຕ່າງຫາກໃຫ້ເໝາະສົມ ແລະ ຕາມຄວາມສາມາດໃນການສະໜອງງົບປະມານ ເຊິ່ງບໍ່ນອນຢູ່ໃນຈຳນວນ 1.500 ຄົນ, ມອບໃຫ້ທະນາຄານ ແຫ່ງ ສປປ ລາວ ນຳສະເໜີໂກຕາລັດຖະກອນໃໝ່ຂອງຕົນຫາກະຊວງພາຍໃນ ເພື່ອຊາບ ແລະ ຕິດຕາມ; ການບັນຈຸລັດຖະກອນໃໝ່ຕ້ອງບົນພື້ນຖານຫຼັກການຄວາມສະເໝີພາບ, ເປີດເຜີຍ, ພາວະວິໄສ ແລະ ເປັນທຳ. ຜູ້ທີ່ຖືກບັນຈຸເຂົ້າເປັນລັດຖະກອນຕ້ອງຜ່ານລະບົບການສອບເສັງເຂົ້າເປັນລັດຖະກອນ ແຫ່ງ ສປປ ລາວ ບົນພື້ນຖານຕຳແໜ່ງງານວ່າງ ແລະ ວິຊາສະເພາະທີ່ຕ້ອງການໃນກົງຈັກການຈັດຕັ້ງ ແລະ ໃຫ້ບັນຈຸເຂົ້າໃສ່ຂັ້ນເມືອງ, ຂັ້ນແຂວງເປັນຕົ້ນຕໍ ແລະ ຫ້າມຮັບເອົາພະນັກງານອາສາສະໝັກເຂົ້າມາເປັນລັດຖະກອນໂດຍບໍ່ໄດ້ຜ່ານການສອບເສັງ; ການອະນຸມັດຕົວເລກລັດຖະກອນໃໝ່ແຕ່ລະສົກງົບປະມານ ແມ່ນອະນຸມັດພຽງຄັ້ງດຽວ ແລະ ມີຜົນບັງຄັບໃຊ້ສະເພາະໃນສົກງົບປະມານທີ່ລັດຖະບານອະນຸມັດເທົ່ານັ້ນ; ພະນັກງານຕາມສັນຍາທີ່ໄດ້ຮັບບັນຈຸເປັນລັດຖະກອນແລ້ວໃຫ້ຕັດອອກບັນຊີພະນັກງານຕາມສັນຍາ ແລະ ບໍ່ອະນຸຍາດໃຫ້ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນ ຮັບເອົາພະນັງການຕາມສັນຍາຕື່ມອີກ; ຕົວເລກລັດຖະກອນໃໝ່ທີ່ອະນຸມັດປີ 2019 ຈຳນວນ 1.500 ຄົນ ບັນຈຸໃຫ້ສຳເລັດກ່ອນວັນທີ 1 ກໍລະກົດ 2019.

CR:laoedaily