ແອຣ໌ບັສ ກຽມເຊົາຜະລິດຍົນໂດຍສານ ເອ 380

244

ບໍລິສັດແອຣ໌ບັສ ປະກາດກຽມເຊົາຜະລິດຍົນໂດຍສານຂະໜາດໃຫຍ່ “ເອ 380” ພາຍໃນປີ 2021 ຫຼັງເອມິເຣດສ໌ ເຊິ່ງເປັນໜຶ່ງໃນລູກຄ້າລາຍໃຫຍ່ຫຼຸດການສັ່ງຊື້ ແລະ ສາຍການບິນແຄວນຕັສ ຍົກເລີກການສັ່ງຊື້ 8 ລໍາ.

ສໍານັກຂ່າວຕ່າງປະເທດລາຍງານຈາກເມືອງຕູລູຊ ປະເທດຝຣັ່ງ ເມື່ອວັນພະຫັດ ທີ 14 ກຸມພາ ວ່າ ບໍລິສັດແອຣ໌ບັສ ໜຶ່ງໃນຜູ້ຜະລິດຍົນໂດຍສານລາຍໃຫຍ່ຂອງໂລກຈາກເອີຣົບ ເຊິ່ງມີສໍານັກງານຢູ່ທີ່ເມືອງຕູລູຊ ທາງພາກໃຕ້ຂອງປະເທດຝຣັ່ງ ອອກຖະແຫຼງການ ເມື່ອວັນພະຫັດ ເລື່ອງການກຽມຢຸດຂະບວນການຜະລິດຍົນໂດຍສານຊູເປີຈໍາໂບ້ ລຸ້ນ ເອ 380 ພາຍໃນປີ 2021 ໂດຍໃຫ້ເຫດຜົນຢ່າງກົງໄປກົງມາວ່າ ກ່ຽວຂ້ອງກັບຄວາມຕ້ອງການຂອງຕະຫຼາດທີ່ຫຼຸດລົງ.

ຄວາມເຄື່ອນໄຫວດັ່ງກ່າວຂອງແອຣ໌ບັສເກີດຂຶ້ນບໍ່ຫຼາຍມື້ ຫຼັງແຄວນຕັສ (Qantas Airways) ເຊິ່ງເປັນສາຍການບິນແຫ່ງຊາດຂອງປະເທດອົສຕຣາລີ ໄດ້ຍົກເລີກລາຍການສັ່ງຊື້ຍົນໂດຍສານລຸ້ນນີ້ 8 ລໍາ ແລະ ອີກບໍ່ດົນຕໍ່ມາ ເອມິເຣດສ໌ ເຊິ່ງເປັນໜຶ່ງໃນສາຍການບິນຊັ້ນນໍາຂອງໂລກຈາກສະຫະລັດ ອາຣັບ ເອມິເລດສ໌ (U.A.E: United Arab Emirates) ແລະ ເປັນລູກຄ້າລາຍໃຫຍ່ທີ່ສຸດຂອງແອຣ໌ບັສ ໃນການສັ່ງຊື້ຍົນເອ 380 ໄດ້ເຈລະຈາກັບແອຣ໌ບັສ ໃນການຫຼຸດລາຍການສັ່ງຊື້ຈາກເດີມ 162 ລໍາ ເຫຼືອ 123 ລໍາ ໂດຍແອຣ໌ບັສຈະສົ່ງມອບຍົນເອ 380 ຈໍານວນ 17 ລໍາສຸດທ້າຍ ໃຫ້ແກ່ລູກຄ້າໃຫ້ທັນກໍານົດ ຄື 14 ລໍາ ສໍາລັບເອມິເຣດສ໌ ແລະ ອີກ 3 ລໍາ ເປັນຂອງອອລ ນິບປອນ ແອຮ໌ເວ (ANA: All Nippon Airways) ສາຍການບິນຂອງຍີ່ປຸ່ນ ຢ່າງໃດກໍ່ຕາມລາຍງານຂອງແອຣ໌ບັສ ລະບຸວ່າ ເຖິງການຫຼຸດຈໍານວນລາຍການສັ່ງຊື້ຍົນເອ 380 ແຕ່ ເອມິເຣດສ໌ ໄດ້ສັ່ງຊື້ຍົນລຸ້ນອື່ນຂອງແອຣ໌ບັສ ອີກ 70 ລໍາ ທີ່ລວມເຖິງ ເອ 350 ແລະ ເອ 330 ນີໂອ.

ไม่มีคำอธิบายรูปภาพ
ไม่มีคำอธิบายรูปภาพ

ດັ່ງນັ້ນ ແອຣ໌ບັສລາຍງານຜົນກໍາໄລສຸດທິຕະຫຼອດປີຜ່ານມາ 3.100 ລ້ານເອີໂຣ (ກວ່າ 29.900 ຕື້ກີບ) ເພິ່ມຂຶ້ນຈາກສະຖິຕິຂອງປີ 2017 ແມ່ນ 2.700 ລ້ານເອີໂຣ (ກວ່າ 26 ພັນຕື້ກີບ) ເພິ່ມຂຶ້ນ 29% ແຕ່ຍອມຮັບວ່າ ການຢຸດຂະບວນການຜະລິດຍົນຂະໜາດໃຫຍ່ລຸ້ນນີ້ ອາດຈະສົ່ງຜົນກະທົບຕໍ່ອະນາຄົດຂອງພະນັກງານ ປະມານ 3.000 ເຖິງ 3.500 ຄົນ.

ທັງນີ້ ເອ 380 ເປັນຍົນໂດຍສານຂະໜາດ 2 ຊັ້ນ ທົດລອງບິນຄັ້ງທໍາອິດ ເມື່ອປີ 2005 ແລະ ສົ່ງມອບໃຫ້ແກ່ສິງກະໂປ ແອຣ໌ໄລນ໌ ເປັນສາຍການບິນແຫ່ງທໍາອິດ ໃນອີກ 2 ປີຕໍ່ມາ ແລະ ເປັນໜຶ່ງໃນລູກຄ້າ ສໍາຄັນຂອງແອຣ໌ບັສ ສໍາລັບຍົນລຸ້ນນີ້ ຮ່ວມກັບເອມິເຣດສ໌, ແຄວນຕັສ ແລະ ລຸຟຕ໌ຮັນຊາ (lufthansa airline) ສາຍການບິນທີ່ໃຫຍ່ທີ່ສຸດຂອງປະເທດເຢຍລະມັນ.