ມາຊິໂດເນຍ ແຈ້ງປ່ຽນຊື່ປະເທດກັບຢູເອັນ ຢຸດຕິຄວາມຂັດແຍ່ງກັບ ກຣີຊ

381

ລັດຖະບານມາຊິໂດເນຍ ຍື່ນເອກະສານຕໍ່ເລຂາທິການສະຫະປະຊາຊາດ ແຈ້ງການປ່ຽນຊື່ປະເທດເປັນ “ມາຊິໂດເນຍເໜືອ” ຢຸດຕິຄວາມຂັດແຍ່ງຍາວນານ ເກືອບ 30 ປີ ກັບ ປະເທດກຣີຊ ຢ່າງເປັນທາງການ.

ສໍານັກຂ່າວຕ່າງປະເທດລາຍງານຈາກນະຄອນນິວຍອກ ປະເທດສະຫະລັດ ອາເມຣິກາ ເມື່ອວັນພຸດ ທີ 13 ກຸມພາ ວ່າ ສະຫະປະຊາຊາດ (UN) ອອກຖະແຫຼງການ ເມື່ອວັນພຸດວ່າ ທ່ານ ອັນໂຕນິໂອ ກູເຕຣ໌ເຣສ ເລຂາທິການຢູເອັນ ໄດ້ຮັບເອກະສານເຊິ່ງລົງນາມໂດຍປະທານາທິບໍດີຢໍແກ ອີວານັອຟ ແຈ້ງການປ່ຽນຊື່ປະເທດຈາກເດີມຄື “ມາຊິໂດເນຍ” ຫຼື “ສາທາລະນະລັດມາຊິໂດເນຍ” ເປັນ “ມາຊິໂດເນຍເໜືອ ” ຫຼື “ສາທາລະນະລັດມາຊິໂດເນຍເໜືອ (Republic of North Macedonia)” ໂດຍ ທ່ານ ກູເຕຣ໌ເຣສ ໄດ້ສະແດງຄວາມຍິນດີກັບທັງລັດຖະບານມາຊິໂດເນຍເໜືອ ແລະ ກຣີຊ ທີ່ສາມາດຢຸດຕິຂໍ້ພິພາດທີ່ຍືດເຍື້ອຍາວນານເກືອບ 30 ປີ ໄດ້ຢ່າງສັນຕິ.

ในภาพอาจจะมี ท้องฟ้า และสถานที่กลางแจ้ง

ຄວາມເຄື່ອນໄຫວດັ່ງກ່າວເກີດຂຶ້ນໃນວັນດຽວກັບທີ່ລັດຖະບານມາຊິໂດເນຍເໜືອ ປະກາດເລື່ອງການປ່ຽນຊື່ປະເທດລົງໃນບົດບັນຍັດເພື່ອປູທາງສູ່ການເຂົ້າເປັນສະມາຊິກທັງຂອງສະຫະພາບເອີຣົບ (EU)  ແລະ ອົງການສົນທິສັນຍາແອັດແລນຕິກເໜືອ (ນາໂຕ) ຕໍ່ໄປ ເນື່ອງຈາກໜຶ່ງໃນຂໍ້ຕົກລົງລະຫວ່າງທັງສອງປະເທດຄື ປະເທດກຣີຊ ຈະບໍ່ຄັດຄ້ານການສະໝັກຂອງມາຊິໂດເນຍອີກຕໍ່ໄປ ເມື່ອໃດກໍ່ຕາມທີ່ມີການປ່ຽນຊື່ປະເທດ.

ในภาพอาจจะมี เมฆ, ท้องฟ้า, รองเท้า และสถานที่กลางแจ้ง

ທັງນີ້ ນັບຕັ້ງແຕ່ການຫຼົ້ມສະຫຼາຍຂອງປະເທດຢູໂກສລາເວຍ ເມື່ອປີ 1991 ລັດຖະບານເອເທັນ ຮຽກຮ້ອງໃຫ້ ປະເທດມາຊິໂດເນຍ ປ່ຽນຊື່ປະເທດມາຕະຫຼອດ ໂດຍໃຫ້ເຫດຜົນວ່າເປັນຊື່ດຽວກັບ ພາກພື້ນມາຊິໂດເນຍທີ່ຢູ່ທາງເໜືອຂອງກຣີຊ ແລະ ເປັນຊື່ຊ້ຳກັບອານາຈັກມາຊິໂດເນຍຂອງອາເລັກຊານເດີ ມະຫາຣາດ ກະສັດທີ່ມີຊື່ສຽງທີ່ສຸດໃນປະວັດສາດກຣີຊ. ນອກຈາກນີ້, ຊາວກຣີກຍັງມີຄວາມວິຕົກກັງວົນວ່າລັດຖະບານມາຊິໂດເນຍອາດໃຊ້ປະເດັນເລື່ອງ “ຊື່ທີ່ຄືກັນ” ຂອງ 2 ພາກພື້ນນີ້ ເປັນເຫດຜົນຂອງການຜະໜວກດິນແດນສ່ວນທີ່ເປັນພາກເໜືອ ກຣີຊ ນີ້ ໃນອະນາຄົດ. ຢ່າງໃດກໍ່ຕາມ, ລັດຖະບານຂອງທັງສອງປະເທດໄດ້ເຈລະຈາຢຸດຕິບັນຫານີ້ໄດ້ໃນທີ່ສຸດ ແລະ ລັດສະພາຂອງມາຊິໂດເນຍໃຫ້ຄຳປະຕິຍານກ່ອນ ເມື່ອເດືອນຕຸລາ ປີທີ່ຜ່ານມາ ຕາມດ້ວຍລັດສະພາຂອງກຣີຊ ເມື່ອທ້າຍເດືອນທີ່ຜ່ານມາ.