ອຸດົມໄຊ ວິໄຈສານພິດຕົກຄ້າງໃນພືດຜັກ ແລະ ໝາກໄມ້

367

ພະແນກກະສິກຳ ແລະ ປ່າໄມ້ແຂວງ ເຊິ່ງນຳໂດຍ ທ່ານ ພອນປະສິດ ປັນຍາສະຫວັດ ຮອງຫົວໜ້າພະແນກກະສິກຳ ແລະ ປ່າໄມ້ແຂວງອຸດົມໄຊ ສົມທົບກັບຫ້ອງການກະສິກຳ ແລະ ປ່າໄມ້ ແລະ ອຸດສາຫະກຳ ເມືອງໄຊ ໄດ້ລົງເຄື່ອນໄຫວຕິດຕາມ, ກວດກາ ແລະ ວິໄຈສານພິດຕົກຄ້າງໃນພືດຜັກ ແລະ ໝາກໄມ້ ຢູ່ທີ່ຕະຫຼາດກະສິກຳ ນວນຕາ ບ້ານໜອງແມງດາ ເມືອງໄຊ ແຂວງອຸດົມໄຊ ໃນທ້າຍອາທິດຜ່ານມານີ້.

ຮູບບໍ່ກ່ຽວກັບເນື້ອໃນຂ່າວ

ການລົງເຄື່ອນໄຫວວິໄຈໃນຄັ້ງນີ້ ກໍເພື່ອຊອກຮູ້ກ່ຽວກັບສານພິດທີ່ຕົກຄ້າງຢູ່ໃນພືດຜັກ ແລະ ໝາກໄມ້ ທີ່ແມ່ຄ້າຊາວຂາຍນຳມາຈຳໜ່າຍຢູ່ທ້ອງຕະຫຼາດ ໂດຍແນໃສ່ໃນການຊອກຫາແນວທາງສະກັດກັ້ນ ແລະ ແກ້ໄຂໃຫ້ທັນສະພາບການ, ຫຼີກລຽງບໍ່ໃຫ້ປະຊາຊົນບໍລິໂພກພືດຜັກ ແລະ ໝາກໄມ້ທີ່ມີສານພິດຕົກຄ້າງເກີນປະລິມານ ເຊິ່ງຈະສົ່ງຜົນສະທ້ອນຕໍ່ສຸຂະພາບຂອງຄົນເຮົາ ທັງເປັນການໂຄສະນາ, ເຜີຍແຜ່ໃຫ້ປະຊາຊົນຮັບຮູ້, ເຂົ້າໃຈຢ່າງກວ້າງ ຂວາງຕໍ່ກັບຜົນຮ້າຍດັ່ງກ່າວ ແລະ ຫັນມາເອົາໃຈໃສ່ໃນການບໍລິໂພກພືດຜັກ ແລະ ໝາກໄມ້ທີ່ສະອາດ ແລະ ປອດສານພິດ.

ในภาพอาจจะมี หนึ่งคนขึ้นไป, ต้นพืช, ผลไม้ และอาหาร
ຮູບບໍ່ກ່ຽວກັບເນື້ອໃນຂ່າວ

ສຳລັບຕົວຢ່າງທີ່ນຳມາວິເຄາະ, ວິໄຈໃນຄັ້ງນີ້ ປະກອບມີທັງໝົດ 68 ຕົວຢ່າງ. ໃນນັ້ນ, ປະເພດພືດຜັກສົດ ມີ 48 ຕົວຢ່າງ ແລະ ໝາກໄມ້ສົດ ມີ 20 ຕົວຢ່າງ. ຜ່ານການວິໄຈຕົວຢ່າງທັງໝົດ ເຫັນວ່າ: ປະເພດພືດຜັກສົດທີ່ມີສານພິດຕົກຄ້າງສູງ ມີຄື: ຜັກກາດຂາວ, ຫົວຜັກທຽມ, ມັນຝຣັ່ງ, ຫົວຜັກບົ່ວໃຫຍ່, ໝາກເຫຼ່ນ, ຖົ່ວເບີ, ໝາກເຜັດນ້ອຍ, ໝາກເຂືອຍາວ, ໝາກກະດອມ, ຜັກບົ້ງ, ຜັກຊີ, ຂີງໃຫຍ່, ຜັກກາດມົນ. ນອກນັ້ນ, ແມ່ນມີສານຕົກຄ້າງປານກາງ ແລະ ຕົກຄ້າງໜ້ອຍ ເຊັ່ນ: ກະລໍ່າປີ, ໝາກເຜັດໃຫຍ່, ຫົວກະຣົດແດງ, ໝາກອຶ, ຜັກຫອມ, ຜັກກາດຊອມ, ຍອດໝາກຖົ່ວນ້ອຍ ແລະ ອື່ນໆ. ສ່ວນປະເພດໝາກໄມ້ສົດທີ່ມີສານຕົກຄ້າງສູງ ປະກອບມີ: ໝາກໂປມ, ໝາກຈຸກນ້ອຍ, ສະຕໍເບີຣີ, ມັງກອນ, ລາແຊັງ, ມັງຄຸດ, ໝາກມ່ວງໃຫຍ່, ກະທັນໃຫຍ່ ແລະ ໝາກນາວບໍ່ມີແກ່ນ ເຊິ່ງໝາກໄມ້ທີ່ມີສານຕົກຄ້າງປານກາງແມ່ນໝາກລຳໄຍ.

ບັນດາພືດຜັກ ແລະ ໝາກໄມ້ ທີ່ເຫັນວ່າມີສານຕົກຄ້າງສູງສ່ວນຫຼາຍແມ່ນສິນຄ້າທີ່ນຳເຂົ້າມາຈາກປະເທດໃກ້ຄຽງ.

[ ຂ່າວ: ຄານມະນີ ຮຽນດໍຈັນ ]