ກຸ່ມຄ້າຢາ ຫຼັ່ງໄຫຼເຂົ້າມອບຕົວ ຫຼັງທາງການບັງກລາເທດໃຊ້ມາດຕະການຂັ້ນເດັດຂາດ

232

ກຸ່ມຜູ້ຕ້ອງສົງໄສຄ້າຢາເສບຕິດ ແລະ ຜູ້ສ້າງຕົວເປັນຜູ້ມີອິດທິພົນ ກວ່າ 100 ຄົນ ກຽມເຂົ້າມອບຕົວຕໍ່ເຈົ້າໜ້າທີ່ບັງກລາເທດ ໃນອາທິດນີ້ ຫຼັງຈາກທາງການໃຊ້ມາດຕະການຂັ້ນເດັດຂາດ ເພື່ອກວາດລ້າງຢາເສບຕິດ.

ສໍານັກຂ່າວເອເອັຟພີລາຍງານຈາກນະຄອນຫຼວງທາກາ ປະເທດບັງກລາເທດ ເມື່ອວັນອັງຄານ ທີ 12 ກຸມພາ ວ່າ ລັດຖະບານບັງກລາເທດເປີດສາກສົງຄາມກວາດລ້າງຢາເສບຕິດໃນເດືອນພຶດສະພາ 2018 ຫຼັງຈາກຢາເສບຕິດໄດ້ແຜ່ລະບາດໄປທົ່ວປະເທດ ລວມເຖິງປະຊາກອນ 165 ລ້ານຄົນ ຂອງພາກພື້ນອາຊີໃຕ້ ສ່ວນຫຼາຍເປັນປະເພດຢາບ້າທີ່ມີລາຄາຖືກ ປະຕິບັດການກວາດລ້າງຈົນເຖິງຂະນະນີ້ ມີຜູ້ຕ້ອງສົງໄສຄ້າຢາເສບຕິດຖືກເຈົ້າໜ້າທີ່ວິສາມັນ ເກືອບ 300 ຄົນ ໂດຍ 40 ຄົນ ໃນຈໍານວນນີ້ຢູ່ໃນເມືອງເທັກນາບ ທາງພາກຕາເວັນອອກສຽງໃຕ້ ແລະ ມີຜູ້ຖືກຈັບມາດໍາເນີນຄະດີ ປະມານ 25.000 ຄົນ.

ລັດຖະບານບັງກາລາເທດປະກາດຂີດເສັ້ນຕາຍໃຫ້ໂອກາດບັນດາຜູ້ຄ້າຢາເສບຕິດເຂົ້າມອບຕໍ່ຕົວເຈົ້າໜ້າທີ່ທາງການ ພາຍໃນກາງເດືອນກຸມພາ.

ຕໍາຫຼວດເຜີຍວ່າ ຈະມີກຸ່ມຂະບວນການຄ້າຢາເສບຕິດ ແລະ ກຸ່ມຜູ້ສ້າງຕົວເປັນຜຸ້ມີອິດທິພົນລະດັບເຈົ້າພໍ່-ເຈົ້າແມ່ທັງຫຼາຍເຂົ້າມອບຕົວ ໃນວັນທີ 16 ກຸມພາ ຫຼາຍກວ່າ 100 ຄົນ ທີ່ເມືອງເທັກນາບ ເຊິ່ງເປັນສູນກາງສໍາຄັນຂອງຂະບວນການລັກລອບຂົນຢາເສບຕິດ ແລະ ເມືອງນີ້ຢູ່ໃນເຂດຄັອກ ບາຊາ ທີ່ມີຜູ້ລີ້ໄພຊາວໂລຮີນຈາຈາກມຽນມາ ປະມານ 1 ລ້ານຄົນ ອາໄສຢູ່ຕາມສູນພັກເຊົາຫຼາຍແຫ່ງ.

ທ່ານ ມາຊູດ ຮອສເຊັນ ຜູ້ບັນຊາການຕໍາຫຼວດຄັອກ ບາຊາ ກ່າວວ່າ ການມອບຕັ້ງຄັ້ງນີ້ ນັບເປັນປະວັດສາດ ແລະ ເປັນຄວາມສໍາເລັດອັນຍິ່ງໃຫຍ່ສໍາຫຼັບປະຕິບັດການກວາດລ້າງຢາເສບຕິດຂອງລັດຖະບານ ເຊິ່ງອາດຈະປຽບທຽບໄດ້ກັບການມອບຕົວຂອງຂະບວນການຄ້າຢາເສບຕິດລາຍໃຫຍ່ “ເມເດລລິນ”  ຂອງປະເທດໂຄລົມບີ ໃນປີ 2002 ທ່ານໄດ້ເຜີຍອີກວ່າ ຢາບ້າ ໄດ້ໄຫຼເຂົ້າສູ່ຄັອກ ບາຊາ ແລະ ຜູ້ລີ້ໄພຊາວໂລຮີນຈາຈໍານວນຫຼາຍຖືກຈ້າງໃຫ້ຂົນສົ່ງຢາ.

PIC:AFP
CR:dailynews