ຄົນອິນເດຍ ກວ່າ 100 ຄົນ ຕາຍຍ້ອນກິນເຫຼົ້າເຖື່ອນ

343

ມີຜູ້ເສຍຊີວິດຢ່າງໜ້ອຍ 105 ຄົນ ແລະ ລົ້ມປ່ວຍເຂົ້າຮັບການປິ່ນປົວໃນໂຮງໝໍຫຼາຍສິບຄົນ ໃນ 2 ລັດ ທາງພາກເໜືອຂອງອິນເດຍ ຫຼັງຈາກດື່ມເຫຼົ້າພື້ນບ້ານທີ່ຕົ້ມກັ່ນເອງ.

ສໍານັກຂ່າວຣອຍເຕີລາຍງານຈາກນະຄອນຫຼວງນິວເດລີ ປະເທດອິນເດຍ ເມື່ອວັນຈັນ ທີ 11 ກຸມພາ ວ່າ ຊາວອິນເດຍເສຍຊີວິດຢ່າງໜ້ອຍ 105 ຄົນ ແລະ ລົ້ມປ່ວຍນອນໂຮງໝໍອີກຫຼາຍສິບຄົນ ຈາກການດື່ມເຫຼົາເຖື່ອນ ໃນ 2 ລັດ ທາງພາກເໜືອຄືລັດອຸດຕຣາຂັນ ແລະ ລັດອຸດຕະຣະປະເທດ ໂດຍກຸ່ມຄົນເຫຼົ່ານີ້ມີອາການເຈັບທ້ອງ ແລະ ຫາຍໃຈລໍາບາກ ທາງເຈົ້າໜ້າທີ່ຕໍາຫຼວດ ເມືອງຫຣິດວາຣ໌ ໃນລັດອຸດຕຣາ00ຂັນ ເຜີຍວ່າ ຕໍາຫຼວດສາມາດຈັບກຸມຜູ້ຕ້ອງສົງໄສຄ້າເຫຼົ້າເຖື່ອນໄປດໍາເນີນຄະດີ 4 ຄົນ.

ໜັງສືພິມອິນເດຍ ເອັກຊ໌ເພຣສ ແລະ ທາມສ໌ ອັອຟ ອິນເດຍ ລາຍງານວ່າ ນັບຮອດວັນຈັນ ຈໍານວນຜູ້ເສຍຊີວິດ ໃນເມືອງຫຣິດວາຣ໌ ມີ 36 ຄົນ ລົ້ມປ່ວຍເຂົ້າຮັບການປິ່ນປົວທີ່ໂຮງໝໍອີກ 18 ຄົນ ສ່ວນຜູ້ເສຍຊີວິດ ໃນລັດອຸດຕະຣະປະເທດ ມີຢ່າງໜ້ອຍ 69 ຄົນ.

ຜູ້ເສຍຊີວິດຈາກການດື່ມເຫຼົ້າເຖື່ອນທີ່ເອີ້ນກັນວ່າ “ຮູຊ” ຫຼື “ເຫຼົ້າບ້ານນອກ” ເກີດຂຶ້ນເປັນປະຈໍາໃນປະເທດອິນເດຍ ໂດຍສະເພາະໃນເຂດຊົນນະບົດທີ່ປະຊາຊົນຜູ້ມັກດື່ມເຫຼົ້າຈໍານວນຫຼາຍບໍ່ມີເງິນຊື້ເຫຼົາຖືກກົດໝາຍ.

ຈຳນວນຜູ້ເສຍຊີວິດຫຼ້າສຸດ ຖືເປັນຄັ້ງທີ່ຮ້າຍແຮງທີ່ສຸດຂອງອິນເດຍ ນັບຕັ້ງແຕ່ມີຜູ້ເສຍຊີວິດຈາກການດື່ມເຫຼົ້າເຖື່ອນ 172 ຄົນ ໃນລັດເບງກອລຕະເວັນຕົກ ເມື່ອປີ  2011.