ຕູ່ ຮີໂຣ້ ເປີດຕົວເອັມວີເພງ “ເຈັບແທ້” ໂດຍມີ ກາຍ ແລະ ແພັດ ຮ້ອງຮ່ວມນຳ

451

ຫຼັງຈາກທີ່ໄດ້ເຜີຍແຜ່ເພງອອກມາກ່ອນໜ້ານີ້ ເພງ “ເຈັບແທ້” ເຊິ່ງເປັນເພງແນວໃໝ່ ປະສົມປະສານລູກທົ່ງ, ສະຕິງ ແລະ ມີແຣັບມາປະສົມນໍາອີກ ເປັນເພງໃໝ່ຫຼ້າສຸດ ຂອງ ຕູ່ ຮີໂຣ້ ຖືວ່າເປັນນັກຮ້ອງທີ່ມີຊື່ສຽງລະດັບໜຶ່ງ.

ຫຼ້າສຸດກໍ່ໄດ້ປ່ອຍເອັມວີເພງອອກມາແລ້ວໂດບມີ ຕູ່ ຮີໂຣ້ເປັນຕົວຫຼັກໃນເອັມວີ ແລະ ໄດ້ສາວ ຕູ່ ທິດາ ສິດທິໄຊ Miss Tourism International Laos 2018 ຜູ້ທີ່ໄດ້ຮັບລາງວັນ Miss Socialite ໃນເວທີການປະກວດດັ່ງກ່າວ ຢູ່ກົວລາລຳເປີ ປະເທດມາເລເຊຍ ມາຮ່ວມເປັນຜູ້ສະແດງຫຼັກໃນເອັມວີດ້ວຍ ນອກນັ້ນ ຍັງມີຜູ້ສະແດງຮ່ວມອີກຫຼາຍໆຄົນ.

ເພງ “ເຈັບແທ້” ກໍ່ໄດ້ ກາຍ ບີ ຮີໂຣ້ ມາຮ່ວມຮ້ອງປະສານໃນທ່ອນແຣັບ ສ່ວນ ກາຍ ເອງ ກໍ່ມີຜົນງານຫຼາຍເພງ ທັງເພງດ່ຽວ ແລະ ຂອງວົງ ເປັນທີ່ຮູ້ຈັກກັນໃນເມື່ອກ່ອນ ແລະ ກໍ່ໄດ້ຫ່າງຫາຍໄປໄລຍະໜຶ່ງ  ແຕ່ການກັບມາຄັ້ງນີ້ ບໍ່ທໍາມະດາເດີ້ ເພາະເພງນີ້ ກາຍ ເປັນຄົນແຕ່ງເອງ ພ້ອມຮ້ອງທ່ອນແຣັບນໍາ.

ນອກຈາກນັ້ນ ຍັງໄດ້ສາວ ສາວແພັດ ເພັດດາວອນ ນັກຮ້ອງສຽງດີແນວລຸກທົ່ງເອກກະລັກ ທີ່ສ້າງຊື່ສຽງໃຫ້ກັບປະເທດເຮົາ ໂດຍສາມາດຄວ້າແຊມ 21 ສະໄໝ ໃນເວທີຂອງລາຍການ ເສິກວັນດວນເພງ ເປັນລາຍການປະກວດຮ້ອງເພງຂອງປະເທດໄທ ຖືວ່າໃຜໆກໍ່ຮູ້ຈັກ ສາວ ແພັດ ເປັນຢ່າງດີ ເມື່ອມາຮ່ວມຮ້ອງເພງນີ້ເຊັ່ນດຽວກັນ.

ສໍາລັບເພງນີ້ ມີເນື້ອໃນກ່ຽວກັບ ຄວາມຮູ້ສຶກຂອງຄົນອົກຫັກ ວ່າມັນເຈັບແບບນີ້ນໍ້ ມັນເຈັບຈົນຕ້ອງມີນໍ້າຕາອອກມາ ເຈັບຄັກ ເຈັບແທ້ໆເລີຍ ຄົນອົກຫັກຟັງແລ້ວ ບອກເລີຍວ່າແທງໃຈແທ້ໆ ຍິ່ງເປັນເພງທີ່ມີຄວາມປະສົມປະສານກັນ ລະຫວ່າງ ສະຕິງ ແຣັບ ແລະ ລູກທົ່ງ ກໍ່ຍິ່ງເພີ່ມຄວາມອິນ ຍິ່ງຕອກຍໍ້າຄວາມເຈັບປວດຂອງຄົນອົກຫັກອອກມາໄດ້ດີເລີຍ.