ນ້ຳຖ້ວມ ໃນເມືອງທາງພາກເໜືອອົສຕຣາລີຍັງວິກິດ

290

ສະຖານະການອຸທົກກະໄພ ທີ່ເມືອງທາວສ໌ວິລ ໃນລັດຄວີນແລນ ຂອງອົສຕຣາລີ “ຍັງວິກິດ” ເພາະຝົນທີ່ຕົກລົງມາຢ່າງຕໍ່ເນື່ອງ ເພີ່ມລະດັບນ້ໍຳສະສົມສູງກວ່າ 1 ແມັດ ທາງເຂື່ອນຫຼັກຈໍາເປັນຕ້ອງມີການເປີດປະຕູລະບາຍນ້ຳອອກ.

ສໍານັກຂ່າວຕ່າງປະເທດລາຍງານຈາກເມືອງທາວສ໌ວິລ ປະເທດອົສຕຣາລີ ເມື່ອວັນຈັນ ທີ 4 ກຸມພາ ວ່າ ສໍານັກງານອຸຕຸນິຍົມວິທະຍາແຫ່ງຊາດຂອງອົສຕຣາລີ (BOM_AU) ລາຍງານສະຖານະການນໍ້າຖ້ວມໃນລັດຄວີນແລນ ໂດຍສະເພາະທີ່ເມືອງທາວສ໌ວິລ ເຊິ່ງຢູ່ແຄມຝັ່ງທາງພາກຕາເວັນອອກສຽງເໜືອນັ້ນ “ຍັງຢູ່ໃນຂັ້ນວິກິດ” ສົ່ງຜົນໃຫ້ປະຊາຊົນຫຼາຍກວ່າ 20.000 ຄົວເຮືອນ ຕ້ອງອົບພະຍົບຕັ້ງແຕ່ອາທິດ ທີ່ຜ່ານມາ ໂຊກດີທີ່ຍັງບໍ່ມີລາຍງານຜູ້ເສຍຊີວິດ ຫຼື ຜູ້ສູນຫາຍ ໂດຍລະດັບນ້ຳທີ່ຖ້ວມຂັງສະສົມຍັງສູງກວ່າ 1 ແມັດ ພາຍໃນໄລຍະພຽງອາທິດດຽວ ເຊິ່ງເປັນຜົນມາຈາກຝົນທີ່ຕົກລົງມາຢ່າງໜັກ ໃນໄລຍະເວລາດັ່ງກ່າວ ຫຼາຍກວ່າຄ່າສະເລ່ຍຕະຫຼອດປີ ເຖິງ 20 ເທົ່າ ແລະ ທຳລາຍສະຖິຕິອຸທົກກະໄພຄັ້ງໃຫຍ່ໃນພື້ນທີ່ ເມື່ອປີ 1998.

ຂະນະທີ່ ສະຖານະການໃນເມືອງອິງແຮມ ເຊິ່ງຢູ່ຫ່າງຈາກເມືອງທາວສ໌ວິລ ຂຶ້ນໄປທາງເໜືອ ມີປະລິມານນ້ຳສະສົມຫຼາຍເຖິງ 506 ມິນລິແມັດ ພາຍໃນໄລຍະເວລາພຽງ 24 ຊົ່ວໂມງ ລະຫວ່າງວັນເສົາ ເຖິງ ວັນອາທິດ ທີ່ຜ່ານມາ ດ້ານທ່ານນາງ ອະນາສຕາເຊຍ ພາລາຊຊຸກ ທີ່ປຶກສາຄະນະລາຊະການຂອງລັດຄວີນແລນ ກ່າວວ່າ ທາງການໄດ້ຮັບຄວາມຊ່ວຍເຫຼືອຈາກກອງທັບທີ່ລະດົມນໍາກະສອບຊາຍມາວາງຮຽງເປັນແລວ ເພື່ອປ້ອງກັນນ້ຳຖ້ວມ ແລະ ການສັນຈອນທີ່ມີການຍົກສູງເພື່ອອົບພະຍົບປະຊາຊົນ ແຕ່ ທ່ານນາງ ພາລາຊຊຸກ ຢ້ຳເຕືອນປະຊາຂົນໃຫ້ຕື່ນຕົວຕະຫຼອດເວລາ ເນື່ອງຈາກເຈົ້າໜ້າທີ່ຈໍາເປັນຕ້ອງເປີດປະຕູລະບາຍນ້ຳທຸກບານຂອງເຂື່ອນຣອສສ໌ ເຊິ່ງເປັນເຂື່ອນຫຼັກໃນເຂດ ເພື່ອລະບາຍນ້ຳທີ່ອັ່ງລົ້ນລະດັບ ແລະ ເພື່ອຮອງຮັບມວນນ້ຳໃໝ່ຈາກຝົນທີ່ກໍາລັງຈະຕົກລົງມາອີກ ໃນອາທິດນີ້.

ເຖິງວ່າ ອຸນຫະພູມທີ່ຮ້ອນອົບເອົ້າ ແລະ ອິດທິພົນຈາກພາຍຸ ຫຼື ຮ່ອງມໍລະສຸມເປັນສະພາບອາກາດທີ່ຊາວອົສຕຣາລີຕ້ອງເຜີນທຸກໆປີ ໃນໄລຍະຕົ້ນປີ ແຕ່ສະຖານະການໃນປີນີ້ ມີຄວາມຮຸນແຮງກວ່າປົກກະຕິ ໂດຍອຸນຫະພູມທີ່ເມືອງແອດິເລດ ໃນລັດເຊົາທ໌ອົສຕຣາລີ ນັ້ນ ມີສະຖິຕິສູງທີ່ສຸດ 2 ຄັ້ງ ສະເພາະເມື່ອເດືອນມີນາ ທີ່ຜ່ານມາ ຄື 47,7 ອົງສາ ແລະ 49,5 ອົງສາ.