ອົສຕຣາລີ ມວນອາກາດຜັນຜວນຜະເຊີນທັງນ້ຳຖ້ວມ – ອາກາດຮ້ອນອົບເອົ້າ

226

ລັດຄວີນແລນ ທາງພາກຕາເວັນອອກຂອງອົສຕຣາລີ ຜະເຊີນກັບນ້ຳຖ້ວມໜັກ ຂະນະທີ່ພາກໃຕ້ຂອງປະເທດອາກາດຮ້ອນອົບເອົ້າເປັນປະວັດການ

ສໍານັກຂ່າວຕ່າງປະເທດລາຍງານຈາກເມືອງບຣິສເບນ ປະເທດອົສຕຣາລີ ເມື່ອວັນເສົາ ທີ 2 ກຸມພາ ວ່າ ສໍານັກງານອຸຕຸນິຍົມວິທະຍາແຫ່ງຊາດຂອງອົສຕຣາລີ (BOM_AU) ພະຍາກອນການເກີດພະຍຸຟ້າຝົນຕົກແຮງເປັນພື້ນທີ່ກວ້າງ ໃນລັດຄວີນແລນ ທາງພາກຕາເວັນອອກຂອງປະເທດຕະຫຼອດໄລຍະທ້າຍອາທິດນີ້ ຂໍໃຫ້ປະຊາຊົນກຽມຄວາມພ້ອມການເກີດນ້ຳຖ້ວມກະທັນຫັນ ແລະ ຕິດຕາມຂ່າວສານຈາກທາງການຢ່າງໃກ້ຊິດ ເນື່ອງຈາກອາດຈະຕ້ອງມີການອົບພະຍົບປະຊາຊົນບາງສ່ວນ ໂດຍສະເພາະທີ່ເມືອງທາວສ໌ວິລ ທາງເໜືອຂອງລັດຄວີນແລນ ເຊິ່ງທາງ ບີໂອເອັມ_ ເອຢູ ວັດແທກປະລິມານນ້ຳຝົນສະສົມໄດ້ລະຫວ່າງ 150-200 ມິນລີແມັດ ສະເພາະເມື່ອວັນເສົາ ທີ 2 ກຸມພາ ທຽບເທົ່າປະລິມານນໍ້າຝົນທີ່ຕົກຕະຫຼອດເດືອນດຽວກັນຂອງປີທີ່ຜ່ານມາ.

ໃນອີກດ້ານໜຶ່ງອຸນຫະພູມທີ່ເມືອງພອດ ອໍກັສຕາ ໃນລັດເຊົາທ໌ອົສຕຣາລີ ທາງພາກໃຕ້ຂອງປະເທດວັດແທກໄດ້ສູງ ເຖິງ 49,5 ອົງສາ ເມື່ອວັນທີ 24 ມັງກອນ ທີ່ຜ່ານມາ ຂະນະທີ່ເມືອງເອກຂອງລັດເຊົາທ໌ອົສຕຣາລີ ຄືເມືອງແອດິເລດ ວັດແທກອຸນຫະພູມ ໃນວັນດຽວກັນໄດ້ສູງເຖິງ 46,6 ອົງສາ. ນອກຈາກນີ້ ລະດູຮ້ອນປີ 2005 ແລະ 2013 ເປັນພຽງ 2 ປີ ເທົ່ານັ້ນ ທີ່ອຸນຫະພູມສະເລ່ຍຕ່ຳກວ່າລະດູຮ້ອນຂອງປີ 2017 ບົ່ງຊີ້ວ່າພາວະການປ່ຽນແປງຂອງສະພາບອາກາດໂລກນັ້ນ ຮຸນແຮງຂຶ້ນທຸກຂະນະ.