ອັອງຊານ ຊູຈີເຊີນ ຊວນຕ່າງປະເທດລົງທຶນໃນປະເທດມຽນມາ

222

ອັອງຊານ ຊູຈີ ມົນຕີແຫ່ງລັດຂອງມຽນມາ ຮຽກຮ້ອງຕໍ່ນັກລົງທຶນທົ່ວໂລກໃຫ້ເຂົ້າໄປລົງທຶນໃນມຽນມາ ໂດຍໃຫ້ຄຳໝັ້ນລັດຖະບານຈະສານຕໍ່ການປະຕິຮູບເສດຖະກິດຮອງຮັບ.

ສໍານັກຂ່າວຣອຍເຕີລາຍງານຈາກນະຄອນຫຼວງເນປິດໍ ປະເທດມຽນມາ ເມື່ອວັນສຸກ ທີ 1 ກຸມພາ ວ່າ ທ່ານນາງ ອັອງຊານ ຊູຈີ ມົນຕີແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ ກ່າວຄຳປາໄສໃນງານການປະຊຸມວ່າດ້ວຍການລົງທຶນ “ອິນເວດສ໌ ມຽນມາ ຊໍາມິດ 2019” ເຊິ່ງຈັດໂດຍສະຫະພັນຫໍການຄ້າ ແລະ ອຸດສາຫະກໍາແຫ່ງສະຫະພາບມຽນມາ ໃນນະຄອນຫຼວງເນປິດໍ ວ່າ ມຽນມາ ມີຫຼາຍອົງປະກອບທີ່ເອື້ອອຳນວຍຕໍ່ການລົງທຶນຂອງຕ່າງປະເທດ ເຊັ່ນ ສັກກະຍາພາບທາງເສດຖະກິດ, ສະຖານທີ່ທາງດ້ານພູມສາດອັນດຶງດູດ, ຕະຫຼາດພາຍໃນປະເທດທີ່ກໍາລັງເຕີບໃຫຍ່ ແລະ ປະຊາກອນໄວໜຸ່ມສາວ.

ไม่มีคำอธิบายรูปภาพ

ທ່ານນາງ ຊູຈີ ເຜີຍລາຍການປະຕິຮູບທີ່ລັດຖະບານຂອງຕົນໄດ້ດໍາເນີນການໄປແລ້ວ ນັບຕັ້ງແຕ່ເຂົ້າມາບໍລິຫານ ໃນປີ 2016 ພ້ອມກັບໃຫ້ຄໍາໝັ້ນສານຕໍ່ການປະຕິຮູບ ແລະ ເສີມສ້າງບັນຍາກາດທີ່ເປັນມິດຕໍ່ການລົງທຶນ.

ຈົນເຖິງປັດຈຸບັນ ບັນດານັກລົງທຶນຈາກຕ່າງປະເທດສະແດງຄວາມບໍ່ພໍໃຈ ທີ່ການບໍລິຫານວຽກງານຂອງລັດຖະບານມຽນມາສ່ວນໃຫຍ່ ແມ່ນເນັ້ນໃຫ້ຄວາມສໍາຄັນກັບຂະບວນການສ້າງສັນຕິພາບ, ຢຸດຕິຄວາມຂັດແຍ່ງກັບກຸ່ມຕິດອາວຸດຊົນກຸ່ມນ້ອຍຫຼາຍກຸ່ມໃນປະເທດ ແລະ ໃຫ້ຄວາມສົນໃຈໜ້ອຍເກີນໄປກັບການປະຕິຮູບເສດຖະກິດ.

ในภาพอาจจะมี หนึ่งคนขึ้นไป และผู้คนกำลังนั่ง

ໃນການປາໄສ ທ່ານນາງ ຊູຈີ ບໍ່ໄດ້ກ່າວເຖິງວິກິດຂອງຊາວໂຣຮີນຈາ ໃນລັດຍະໄຂ່ ທາງພາກຕາເວັນຕົກຂອງປະເທດ ແລະ ຜົນກະທົບທີ່ມີຄວາມກັງວົນຕໍ່ການລົງທຶນ ນັກທຸລະກິດຈໍານວນຫຼາຍກໍ່ກັງວົນ ແລະ ຢ້ານວ່າ ມາດຕະການຂວ້ຳບາດຂອງຊາດຕາເວັນຕົກທີ່ເຄີຍທຳລາຍເສດຖະກິດຂອງປະເທດໃນຍຸກ ລັດຖະບານທະຫານອາດຖືກນໍາມາໃຊ້ອີກຄັ້ງ. ກອງທຶນການເງິນລະຫວ່າງປະເທດ (IMF: International Monetary Fund) ເຜີຍ ເມື່ອອາທິດທີ່ຜ່ານມາ ວ່າ ຈາກຂໍ້ມູນຂອງອົງກອນບົ່ງຊີ້ວ່ານັກລົງທຶນຕ່າງປະເທດບາງສ່ວນຢຸດພັກການຕັດສິນໃຈລົງທຶນໃນມຽນມາຈົນກວ່າຈະມີຄວາມຊັດເຈນກ່ຽວກັບຜົນກະທົບຈາກວິກິດຂອງຊາວໂຣຮີນຈາ.

ไม่มีคำอธิบายรูปภาพ

ສະຫະພາບເອີຣົບ (EU: European Union) ກໍາລັງພິຈາລະນາການຂວ້ຳບາດທາງການຄ້າຕໍ່ມຽນມາ ຈາກບັນຫາການລະເມີດສິດທິມະນຸດຕໍ່ຊາວໂຣຮີນຈາ ໂດຍ ອີຢູ ອາດຈະຖອດຖອນສິດທິພິເສດທາງການຄ້າການສົ່ງອອກສິນຄ້າຂອງມຽນມາໂດຍບໍ່ເສຍພາສີ ໄປຕະຫຼາດອີຢູ ເຊິ່ງເປັນກຸ່ມການຄ້າຂະໜາດໃຫຍ່ທີ່ສຸດຂອງໂລກ, ການຂວ້ຳບາດຈະສົ່ງຜົນກະທົບຢ່າງໜັກຕໍ່ອຸດສາຫະກໍາສິ່ງຫຍິບຖັກເຄື່ອງນຸ່ງຫົ່ມຂອງມຽນມາທີ່ສ້າງລາຍໄດ້ເຂົ້າປະເທດຈໍານວນມະຫາສານຕໍ່ປີ ແລະ ອາດຈະສົ່ງຜົນໃຫ້ແຮງງານຫຼາຍສິບພັນຄົນວ່າງວຽກ.

ເດືອນທີ່ຜ່ານມາ ທະນາຄານໂລກຖະແຫຼງຄາດການຕົວເລກຈີດີພີຂອງມຽນມາຈະຫຼຸດລົງສູ່ລະດັບ 6,2% ໃນປີງົບປະມານ 2018-2019 ຈາກ 6,8% ໃນປີກ່ອນໜ້າ.