ແອັບເປິ້ລ ອາດຫຼຸດລາຄາໄອໂຟນ ຢູ່ບາງປະເທດ ຫຼັງຍອດຂາຍຕົກ

206

ບໍລິສັດແອັບເປິ້ລອາດຫຼຸດລາຄາຂາຍໄອໂຟນ “ບາງລຸ້ນ” ແລະ “ໃນບາງປະເທດ” ເພື່ອຫວັງກະຕຸ້ນຍອດຂາຍ.

ສໍານັກຂ່າວຕ່າງປະເທດລາຍງານຈາກເມືອງຊານຟຣານຊິສໂກ ປະເທດສະຫະລັດ ອາເມຣິກາ ເມື່ອວັນພຸດ ທີ 30 ມັງກອນ ວ່າ ບໍລິສັດແອັບເປິ້ລ ໄດ້ລາຍງານເມື່ອວັນອັງຄານ ວ່າ ລາຍໄດ້ຈາກການຈໍາໜ່າຍໄອໂຟນທຸກລຸ້ນ ເຊິ່ງຖືເປັນສິນຄ້າຫຼັກຂອງ ບໍລິສັດມີຍອດຂາຍຫຼຸດລົງ 15% ໃນໄຕມາດຫຼ້າສຸດ ເມື່ອສິ້ນສຸດເດືອນທັນວາ ປີຜ່ານມາ ສ່ວນລາຍໄດ້ທັງໝົດຂອງບໍລິສັດໃນພາບລວມປະມານ 84.300 ລ້ານໂດລາ (ກວ່າ 720.000 ຕື້ກີບ) ຫຼຸດລົງ 5% ຈາກ ໂດຍໄອໂຟນລຸ້ນຫຼ້າສຸດ ຄື ໄອໂຟນ ເອັກຊ໌ເອັສ (iPhone XS) ຫຼື ໄອໂຟນ ເທັນເອັສ (iPhone TenS) ເມື່ອເດືອນກັນຍາ ປີຜ່ານມາ ມີລາຄາຂາຍເລິ່ມຕົ້ນ 999 ໂດລາ (ປະມານ 8.550.000 ກີບ).

ຂະນະດຽວກັນ ທ່ານ ທິມ ຄຸກ ປະທານຄະນະບໍລິຫານ (ຊີອີໂອ) ຂອງແອັບເປິ້ລກໍາລັງຫາລືກັບທີມງານເພື່ອ “ປັບປ່ຽນ” ລາຄາຈໍາໜ່າຍຂອງໄອໂຟນ “ບາງລຸ້ນ” ໃນຕະຫຼາດ “ບາງປະເທດ” ເພື່ອໃຫ້ສອດຄ່ອງກັບຄວາມສະຖຽນລະພາບຂອງສະກຸນເງິນທ້ອງຖິ່ນ ໃນປະເທດນັ້ນ ເມື່ອທຽບກັບສະກຸນເງິນໂດລາອາເມຣິກາທີ່ແຂັງຄ່າຂຶ້ນ ໃນໄລຍະນີ້ ເຊິ່ງຖ້າເປັນຄວາມຈິງຈະຖືວ່າເປັນເປັນຄັ້ງທີ 2 ໃນຮອບ 12 ປີ ທີ່ແອັບເປິ້ລປັບຫຼຸດລາຄາຈໍາໜ່າຍໄອໂຟນ ແຕ່ເຫດຜົນຂອງການປັບຫຼຸດລາຄາໄອໂຟນຄັ້ງທໍາອິດ ເມື່ອປີ 2007 ຕາມແນວຄິດຂອງ ທ່ານ ສະຕີຟ ຈັອບ ຜູ້ບໍລິຫານສູງສຸດຂອງແອັບເປິ້ລ ໃນໄລຍະນັ້ນ ແມ່ນເປັນຜົນຈາກຄວາມຕ້ອງການທາງຕະຫຼາດມີສູງຫຼາຍ.

ຢ່າງໃດກໍ່ຕາມ ລາຍງານຂອງແອັບເປິ້ລຍັງບໍ່ໄດ້ລະບຸວ່າ ໄອໂຟນລຸ້ນໃດທີ່ຈະມີການປັບຫຼຸດລາຄາ ແລະ ຕະຫຼາດຂອງປະເທດໃດແດ່ທີ່ຈະໄດ້ຮັບໂອກາດນີ້ ແຕ່ມີຄວາມເປັນໄປໄດ້ວ່າ “ປະເທດຈີນ” ເຊິ່ງລວມທັງຈີນແຜ່ນດິນໃຫຍ່, ຮົງກົງ, ມາເກົ໊າ ແລະ ໄຕ້ຫວັນ ຈະຢູ່ໃນແຜນການນີ້ ເນື່ອງຈາກວ່າ ຖ້າຈໍາແນກອອກເປັນພາກພື້ນພົບວ່າ ຍອດຈໍາໜ່າຍໄອໂຟນໃນຈີນຕົກລົງຫຼາຍກວ່າ 25% ເຊິ່ງຜູ້ບໍລິຫານແອັບເປິ້ລ ກ່າວວ່າ ເປັນຜົນມາຈາກສົງຄາມການຄ້າ ລະຫວ່າງ ອາເມຣິກາ ກັບ ຈີນ ແລະ ກໍ່ລະນີພິພາດເລື່ອງຫົວເຫວີ່ຍ ທີ່ເກີດການສ້າງກະແສຊາດນິຍົມໃນຈີນຢ່າງກວ້າງຂວາງ.