ບັງກລາເທດ ໄລ່ລູກຈ້າງທີ່ເຂົ້າຮ່ວມການປະທ້ວງ ເກືອບ 5 ພັນຄົນ

204

ລູກຈ້າງຄ່າຈ້າງຕ່ຳບັງກລາເທດ ຂອງບໍລິສັດຕັດຫຍິບ ສິນຄ້າທີ່ມີຊື່ສຽງຂອງໂລກ ຖືກນາຍຈ້າງໄລ່ອອກເກືອບ 5.000 ພັນຄົນ ຍ້ອນສາເຫດທີ່ເຂົ້າຮ່ວມການປະທ້ວງ ເພື່ອຮຽກຮ້ອງຂຶ້ນຄ່າຈ້າງຈົນກາຍເປັນຄວາມຮຸນແຮງ ໃນເດືອນນີ້.

ສໍານັກຂ່າວເອເອັຟພີລາຍງານຈາກນະຄອນຫຼວງທາກາ ປະເທດບັງກລາເທດ ເມື່ອວັນອັງຄານ ທີ 29 ມັງກອນ ວ່າ ລູກຈ້າງຫຼາຍສິບພັນຄົນ ໃນບັງກລາເທດຍ່າງອອກຈາກໂຮງງານຕັດຫຍິບ ເພື່ອເຂົ້າຮ່ວມການປະທ້ວງແກ່ຍາວຫຼາຍວັນ ສ້າງຄວາມວຸ້ນວາຍຕໍ່ອຸດສາຫະກຳຕັດຫຍິບເຄື່ອງນຸ່ງ ມູນຄ່າ 30 ພັນລ້ານໂດລາ (ກວ່າ 250.000 ຕື້ກີບ) ແລະ ເຈົ້າໜ້າທີ່ຕຳຫຼວດປ້ອງກັນຄວາມສະຫງົບ ໃຊ້ລູກປືນຢາງ ແລະ ແກ໊ສນ້ຳຕາ ສະກັດກັ້ນກຸ່ມຜູ້ປະທ້ວງ.

ມີລູກຈ້າງເສຍຊີວິດ 1 ຄົນ ແລະ ບາດເຈັບອີກ ກວ່າ 50 ຄົນ ຈາກການປະທະກັບເຈົ້າໜ້າທີ່ຕໍາຫຼວດ ໃນເມືອງອັດຊູເລຍ ເມືອງອຸດສາຫະກໍາສໍາຄັນນອກເມືອງຂອງນະຄອນຫຼວງທາກາ ເຊິ່ງບັນດາໂຮງງານຮັບຕັດຫຍິບເຄື່ອງນຸ່ງໃຫ້ຫ້າງຮ້ານຄ້າປີກລາຍໃຫຍ່ຫຼາຍບໍລິສັດ ເຊັ່ນ: ເອັຈ໌ແອນເອັມ (H&M), ວອລມາດ (Walmart) ແລະ ອື່ນໆ

ในภาพอาจจะมี หนึ่งคนขึ้นไป และผู้คนกำลังนั่ง

ເຈົ້າໜ້າທີ່ຕຳຫຼວດ ເຜີຍວ່າ ລູກຈ້າງໂຮງງານຫຼາຍພັນຄົນທີ່ຖືກກ່າວຫາວ່າບຸກປຸ້ນສະດົມ ແລະ ທຳລາຍຊັບສິນສິ່ງຂອງໃນອາຄານຮ້ານຄ້າ ຖືກນາຍຈ້າງຊາວໄຕ້ຫວັນໄລ່ອອກ ແຕ່ສະຫະພາບລູກຈ້າງ ກ່າວຫານາຍຈ້າງເປັນຝ່າຍຂົ່ມຂູ່ຄຸກຄາມ. ທາງດ້ານ ນາຍຕໍາຫຼວດຜູ້ອາວຸໂສນະຄອນຫຼວງທາກາ ເຜີຍວ່າ ເຖິງວັນອັງຄານ ທີ 29 ມັງກອນ ມີລູກຈ້າງໂຮງງານຕັດຫຍິບ ຖືກນາຍຈ້າງໄລ່ອອກແລ້ວ 4.899 ຄົນ ໂດຍກວ່າ 1.200 ຄົນ ໃນຈໍານວນດັງກ່າວເປັນລູກຈ້າງໃນໂຮງງານດຽວກັນ ແລະ ໄດ້ຮັບຄ່າຈ້າງຂັ້ນຕົ້ນເດືອນລະ 95 ໂດລາ ຫຼື ປະມານ 814.000 ກີບ.

ແຕ່ຕົວແທນສະຫະພາບລູກຈ້າງກ່າວວ່າຈໍານວນລູກຈ້າງທີ່ຖືກໄລ່ອອກຈຳນວນຈິງແມ່ນສູງກວ່າທີ່ລະບຸຫຼາຍເກືອບ 7 ພັນຄົນ ແລະ ເກືອບ 100 ຄົນ ຖືກຕໍາຫຼວດຈັບ.

ປະເທດບັງກລາເທດ ມີໂຮງງານຕັດຫຍບ ໃນປະເທດປະມານ 4.500 ແຫ່ງ ຈ້າງລູກຈ້າງ ປະມານ 41 ລ້ານຄົນ ແລະ ເປັນປະເທດຜູ້ສົ່ງອອກສິນຄ້າເຄື່ອງນຸ່ງຫົ່ມຫຍິບທັກລາຍໃຫຍ່ອັນດັບ 2 ຂອງໂລກຮອງຈາກຈີນ.