ບໍ່ຕ້ອງມີຄົນຂັບ! ຈີນສຳເລັດການທົດລອງລົດເມ 5ຈີ ສາມາດແລ່ນເອງແບບອັດຕະໂນມັດ

232

ຊົມພາບການທົດລອງລົດເມໄຟຟ້າເທັກໂນໂລຍີ 5G ທີ່ຈັດຂຶ້ນໃນເມືອງຈີ່ໜານ ມົນທົນຊານຕົງ ທາງພາກຕາເວັນອອກຂອງປະເທດຈີນ ພາຍໃນລົດເມຄັນນີ້ໄດ້ຮັບການຕິດຕັ້ງເທັກໂນໂລຍີໄວ້ຢ່າງຫຼວງຫຼາຍເຊັ່ນເຄື່ອງກວດຈັບເຣດາດ້ວຍເຣເຊີ, ກ້ອງວົງຈອນປິດຄວາມລະອຽດສູງ, ລະບົບນໍາທາງ ແລະ ກໍານົດຕໍາແໜ່ງ.

ລົດເມຄັນດັ່ງກ່າວສາມາດອອກແລ່ນໄດ້ໂດຍອັດຕະໂນມັດ ຂັບຂີ່ຢູ່ເທິງຖະໜົນຫົນທາງ, ລ້ຽວສີ່ແຍກ ແລະ ຈອດຕາມສະຖານີຕ່າງໆໄດ້ເອງ ມັນສາມາດເຮັດວຽກໄດ້ຄ່ອງຕົວທັງໃນຕອນກາງເວັນ ແລະ ກາງຄືນ ຫຼື ແມ້ແຕ່ສະພາບແວດລ້ອມທີ່ເຕັມໄປດ້ວຍໝອກ ແລະ ຝົນຕົກ.

ນອກຈາກນີ້ ຍັງສາມາດເຮັດໄດ້ຫຼາຍກວ່າຄົນຂັບອີກ ເພາະມັນເຊື່ອມຕໍ່ກັບອິນເຕີເນັດພາຍໃຕ້ເຄືອຂ່າຍ 5G ເຊິ່ງຈະສາມາດກວດຈັບໄຟຈະລາຈອນໄດ້ເມື່ອແລ່ນເຂົ້າມາໃກ້ໃນໄລຍະ 1-2 ກິໂລແມັດ ເຊິ່ງຄົນຂັບບໍ່ສາມາດເຮັດໄດ້ “ທ່ານ ທຽນເລີ່ຍ ຮອງຫົວໜ້າໜ່ວຍງານອອກແບບອິເລັກໂທຣນິກອັດຕະໂນມັດຂອງກຸ່ມລົດບັນທຸກໜັກແຫ່ງຊາດຈີນ ໄດ້ໃຫ້ສໍາພາດເຊັ່ນນີ້.