ວັນທີ 24-26 ເກືອບທົ່ວປະເທດອຸນຫະພູມຈະເຢັນລົງ 1-3 ອົງສາ

313

ກົມອຸຕຸນິຍົມ ແລະ ອຸທົກກະສາດໄດ້ຄາດຄະເນສະພາບອາກາດ ໃນໄລຍະວັນທີ 21 ຫາ 27 ມັງກອນ 2019ວ່າ: ໃນໄລຍະວັນທີ 21-23 ມັງກອນ 2019 ຄວາມກົດດັນສູງຂອງອາກາດໜາວເຢັນ ຈະມີກຳລັງແຮງປານກາງແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ສົມທັບກັບກະແສລົມຕາເວັນອອກ-ຕາເວັນຕົກສ່ຽງເໜືອພັດປົກຄຸມ ເຊິ່ງຈະເຮັດໃຫ້ອາກາດເຢັນ ພ້ອມມີໝອກບາງປົກຫຸ້ມຢູ່ທົ່ວໄປໃນແຕ່ລະພາກ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນແຂວງພາກເໜືອ ແລະ ອາກາດຍັງຈະໜາວເຢັນຢູ່ເຂດພູສູງ, ຮ່ອມພູ, ແຂວງ ໄຊສົມບູນ ແລະ ເຂດພູພຽງບໍລິເວນ ພ້ອມມີໝອກໜາປົກຫຸ້ມຢູ່ບາງທ້ອງຖິ່ນ.

ຈາກນັ້ນ, ໃນວັນທີ 24-26 ມັງກອນ 2019 ຄວາມກົດດັນສູງຂອງອາກາດໜາວເຢັນທີ່ປະເທດຈີນ ຈະເພີ່ມກຳລັງແຮງຂຶ້ນອີກເທື່ອໃໝ່ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ພ້ອມດຽວກັນກະແສລົມຕາເວັນອອກສ່ຽງເໜືອພັດປົກຄຸມ ເຊິ່ງຈະເຮັດໃຫ້ອຸນຫະພູມອາກາດຈະເຢັນລົງ 1-3 ອົງສາ ຢູ່ທົ່ວໄປໃນແຕ່ລະພາກ ສ່ວນຕອນບ່າຍ ອາກາດຍັງຈະຮ້ອນໂດຍສະເພາະຢູ່ແຂວງພາກກາງ ຫາ ພາກໃຕ້ ແລະ ມີລົມພັດແຮງເປັນບາງໂອກາດຢູ່ບາງທ້ອງຖິ່ນ.

ຂະນະທີ່ ກົມອຸຕຸນິຍົມ ແລະ ອຸທົກກະສາດໄດ້ລາຍງານສະພາບອາກາດໃນຕອນເຊົ້າມື້ນີ້ ວັນທີ 22 ມັງກອນ 2019 ວ່າ: ຄວາມກົດດັນສູງຂອງອາກາດເຢັນທີ່ປະເທດຈີນໄດ້ແຜ່ລົງມາປົກຄຸມຢູ່ທົ່ວພາກຂອງປະເທດລາວດ້ວຍກຳລັງປານກາງ ຫາ ແຮງ ແລະ ສົມທົບກັບລົມຕາເວັນອອກສ່ຽງເໜືອພັດປົກຄຸມ ເຊິ່ງຈະເຮັດໃຫ້ອຸນຫະພູມອາກາດຈະສືບຕໍ່ເຢັນລົງໃນຕອນກາງຄືນ ຫາ ຕອນເຊົ້າຢູ່ໃນແຕ່ລະພາກ ແລະ ອາກາດຍັງຈະໜາວເຢັນຢູ່ແຂວງພາກເໜືອ, ແຂວງ ໄຊສົມບູນ ແລະ ເຂດພູພຽບໍລະເວນ ພ້ອມມີໝອກໜາປົກຫຸ້ມໃນຕອນເຊົ້າ ແລະ ຈະມີລົມພັດແຮງຢູ່ບາງທ້ອງຖິ່ນແຂວງພາກກາງ ແລະ ພາກໃຕ້.

ໃນນັ້ນ, ອຸນຫະພູມຕໍ່າສຸດຢູ່ທີ່ ປາກຊ່ອງບໍລິເວນ ອຸນຫະພູມຢູ່ທີ່ 09 ອົງສາ; ໄຊສົມບູນ, ວຽງໄຊ,ຊໍາເໜືອ 10 ອົງສາ, ຮອງລົງມາແມ່ນ ນິຄົມ 34 ອຸນຫະພູມຢູ່ທີ່ 11 ອົງສາ, ຊຽງຂວາງ, ດາກຈຶງ, ຜົ້ງສາລີ, ເມືອງສິງ ແລະ ເມືອງ ວຽງພູຄາ 12 ອົງສາ; ຮອງລົງມາອີກແມ່ນ ອຸດົມໄຊ, ຫຼັກ 20 ອຸນຫະພູມຢູ່ທີ່ 13 ອົງສາ ແລະ ຫຼວງນໍ້າທາ, ທ່າແຕງ ອຸນຫະພູມຢູ່ທີ່ 14 ອົງສາ. ສ່ວນນະຄອນຫຼວງວຽງຈັນອຸນຫະພູມຕໍ່າສຸດຢູ່ທີ່ 19 ອົງສາ.

ສະພາບອາກາດ ປະຈຳວັນທີ 22 ມັງກອນ 2019