ເກີດເຫດໄຟໄໝ້ເຮືອບັນທຸກນ້ໍາມັນ ນອກຝັ່ງໄຄຣເມຍ ຕາຍ 14 ສູນຫາຍ 5

211

ມີລູກເຮືອເສຍຊີວິດ 14 ຄົນ ແລະ ສູນຫາຍອີກ 5 ຄົນ ຈາກເຫດໄຟໄໝ້ເຮືອບັນທຸກນ້ໍາມັນນອກຊາຍຝັ່ງໄຄຣເມຍ ເມື່ອວັນຈັນ ທີ່ຜ່ານມາ.

ສໍານັກຂ່າວເອເອັຟພີລາຍງານຈາກນະຄອນຫຼວງມອສໂກ ປະເທດຣັສເຊຍ ເມື່ອວັນຈັນ ທີ 21 ມັງກອນ ວ່າ ທ່ານອາເລັກຊີ ຄຣາຟເຊນໂກ ໂຄສົກສໍານັກງານຂົນສົ່ງທາງທະເລ ແລະ ແມ່ນ້ໍາຂອງລັດຖະບານກາງຣັສເຊຍ ເປີດເຜີຍວ່າ ພົບຜູ້ເສຍຊີວິດແລ້ວ 14 ຄົນ ແຍກເປັນ 11 ສົບ ຢູ່ເທິງເຮືອ ແລະ ອີກ 3 ສົບ ຢູ່ໃນນ້ໍາ ຫຼັງເກີດເຫດໄຟໄໝ້ເຮືອບັນທຸກນ້ໍາມັນ 2 ລໍາ ທີ່ຈົດທະບຽນນຳໃຊ້ໃນປະເທດແທນຊາເນຍ ຂະນະກຳລັງຂົນຖ່າຍນ້ໍາມັນ ເຫດເກີດເມື່ອວັນຈັນ ທີ່ຜ່ານມາ ໃນເຂດທະເລນອກຊາຍຝັ່ງໄຄຣເມຍພາກພື້ນທີ່ຜະໜວກກັບປະເທດຣັສເຊຍ.

ໂຄສົກສໍານັກງານຂົນສົ່ງທາງທະເລ ແລະ ແມ່ນ້ໍາຂອງລັດຖະບານກາງຣັສເຊຍ ກ່າວຕໍ່ໄປວ່າ ເຮືອບັນທຸກນ້ໍາມັນ 2 ລໍາ ຊື່ແຄນດີ້ ກັບ ມາເອັສໂຕຣ ມີລູກເຮືອເປັນຊາວອິນເດຍ ກັບ ຕັວກກີ ໂດຍເຮືອແຄນດີ້ມີລູກເຮືອ 17 ຄົນ ສ່ວນເຮືອມາເອັສໂຕຣ ມີລູກເຮືອ 14 ຄົນ ເຊິ່ງກໍ່ຍັງມີລູກເຮືອສູນຫາຍ 5 ຄົນ ແຕ່ກໍ່ສາມາດຊ່ວຍເຫຼືອໄວ້ໄດ້ 12 ຄົນ ປະຕິບັດການຄົ້ນຫາ ແລະ ກູ້ໄພຍັງດໍາເນີນຕໍ່ໄປທາງເຈົ້າໜ້າທີ່ໃນເມືອງເຄີດຂອງໄຄຣເມຍກຽມການຊ່ວຍ ເຫຼືອຜູ້ເຄາະຮ້າຍໃນເຫດໄຟໄໝ້ເຮືອບັນທຸກນ້ໍາມັນ ເຊິ່ງເກີດຂຶ້ນຂະນະທີ່ມີການຂົນຖ່າຍນ້ໍາມັນຈາກເຮືອລໍາໜຶ່ງໄປໃຫ້ເຮືອອີກລໍາໜຶ່ງ.

ອຸບັດເຫດເກີດຂຶ້ນໃກ້ກັບຊ່ອງແຄບເຄີດ ເຊິ່ງເປັນຈຸດລໍ່ແຫຼມຄັ້ງໃໝ່ຂອງຄວາມຕຶງຄຽດ ລະຫວ່າງ ຣັສເຊຍ ກັບ ຢູເຄຣນ ເພາະວ່າເມື່ອເດືອນພະຈິກ ປີທີ່ຜ່ານມາ ຣັສເຊຍໄດ້ຢຶດເຮືອຂອງກອງທັບເຮືອຢູເຄຣນໄວ້ 3 ລໍາ ບໍລິເວນຊ່ອງແຄບເຄີດ ຂະນະພະຍາຍາມແລ່ນຈາກທະເລດໍາຜ່ານໄປຫາທະເລອາຊອບ ຖືເປັນການປະທະກັນດ້ານກໍາລັງທະຫານຄັ້ງທໍາອິດ ລະຫວ່າງ ຣັສເຊຍ ກັບ ຢູເຄຣນ ນັບຕັ້ງແຕ່ປີ 2014 ເປັນຕົ້ນມາ ເຊິ່ງຣັສເຊຍຜະໜວກເອົາດິນແດນໄຄຣເມຍຈາກຢູເຄຣນ ແລະ ຍັງມີການກໍ່ຄວາມບໍ່ສະຫງົບຂອງຝ່າຍສະໜັບສະໜຸນຣັສເຊຍ ໃນພື້ນທີ່ທາງຕາເວັນອອກຂອງຢູເຄຣນ.